¹ Enti pia, baka ni ku kitai bejakuka pasal Abraham ke nurunka bansa kitai? ² Laban enti Abraham udah digaga lurus ulih pengawa ti dikereja iya, iya bisi utai ti tau dikemegahka iya, tang ukai di mua Allah Taala. ³ Laban nama utai ti disebut Bup Kudus? “Abraham arapka Allah Taala, lalu ketegal nya, Allah Taala ngumbai iya lurus.” ⁴ Ba orang ke bekereja, gaji ukai dikumbai pemeri, tang upah. ⁵ Tang orang ke enda ngereja pengawa, tang manggaika pengarap iya ba Allah Taala ke ngaga orang ke jai nyadi lurus, orang nya deka dikumbai lurus ketegal pengarap iya. ⁶ Nya meh gaya utai ti disebut Daud lebuh iya merekatka orang ke dikumbai Allah Taala lurus, enda ngira utai ti dikereja orang nya. Ku iya, ⁷ “Beberekat meh orang ke udah diampun ari penyalah sida, lalu dosa sida dilamun. ⁸ Beberekat meh orang ke bempu dosa ti enda dikingatka Tuhan!” ⁹ Kati berekat nya semina diberi ngagai orang ke udah ditutus, tauka diberi mega ngagai orang ke enda ditutus? Kami udah madahka Abraham dikumbai lurus ketegal pengarap iya. ¹⁰ Kemaya Abraham dikumbai lurus? Sebedau tauka udah bekau iya ditutus? Iya dikumbai lurus ukai lebuh iya udah ditutus, tang sebedau iya ditutus. ¹¹ Iya ditutus dudi agi ari nya, lalu tutus nya kena nanggam pengelurus iya ketegal pengarap iya lebuh iya apin ditutus. Nya alai Abraham nyadika apai semua orang ke arap, ke dikumbai Allah Taala lurus ketegal pengarap, taja pen sida enda ditutus. ¹² Lalu Abraham mega nyadi apai ke orang ke ditutus, ke ukai semina ditutus aja, tang idup neladan pengarap ti dikembuan apai kitai Abraham sebedau iya ditutus. ¹³ Laban semaya ti madahka Abraham deka bempu dunya ukai datai ngagai iya tauka ngagai peturun iya ulih Adat, tang ulih pengelurus ti datai ulih pengarap. ¹⁴ Laban enti waris nya diberi ngagai orang ke nitihka Adat, reti nya, pengarap nadai reti, lalu semaya nya mega nadai guna. ¹⁵ Laban Adat mai pengeringat Allah Taala. Tang enti Adat nadai, penyalah mega nadai. ¹⁶ Nya alai semaya nya bepanggai ba pengarap, ngambika semaya nya beduduk ba pengasih lalu dijamin deka diberi ngagai semua peturun Abraham, ukai semina ngagai orang ke nitihka Adat, tang mega ngagai orang ke bisi pengarap baka enggi Abraham, laban iya apai semua kitai, ¹⁷ munyi ti udah ditulis, “Aku udah ngaga nuan nyadi apai ke mayuh bengkah bansa.” Nya meh jalai Allah Taala ti dikarapka Abraham ngaga semaya Iya enggau Abraham. Iya nya meh Allah Taala ke ngangkatka orang ari mati, ke ngasuh semua utai ti nadai, nyadi bisi. ¹⁸ Abraham arap lalu andal ati, lalu iya nyadi Apai ke mayuh bengkah bansa, munyi ti udah dipadahka ngagai iya, “Baka nya meh pemayuh peturun nuan.” ¹⁹ Pengarap iya enda lemi lebuh iya berundingka tubuh diri ti nyau deka mati, (laban umur iya kira seratus taun), tauka lebuh iya berundingka Sarah ke mandul. ²⁰ Iya nadai kakang mimit arapka semaya Allah Taala, tang mansang kering sekering dalam pengarap lalu ngemuliaka Allah Taala, ²¹ laban iya nemu Allah Taala ulih ngereja utai ti udah disemaya Iya. ²² Nya alai ketegal pengarap iya, “Abraham dikumbai lurus.” ²³ Nyadi leka jaku “dikumbai lurus” ukai semina ditulis ke Abraham aja, ²⁴ tang ke kitai mega. Kitai deka dikumbai lurus enti kitai arapka Allah Taala udah ngangkatka Yesus Tuhan kitai ari mati. ²⁵ Iya udah dibunuh ketegal dosa kitai, lalu udah diangkatka ari mati ngambika kitai digaga lurus di mua Allah Taala.