¹ Kitai ke kering patut sabar enggau orang ke lemi, lalu ukai deka ngelantangka diri empu aja. ² Genap iku kitai patut ngelantangka ati pangan kitai, kena nulung sida mansang. ³ Laban Kristus ukai datai ngelantangka Diri tang, munyi ti udah ditulis, “Jaku orang ke mechat kita, udah ninggang Aku.” ⁴ Laban semua utai ti udah ditulis dulu kelia endang ditulis kena ngajar kitai, ngambika ulih pengeliat ati kitai enggau ulih peransang ari Bup Kudus, kitai bisi pengadang. ⁵ Awakka Allah Taala, ke pun pengeliat ati enggau peransang, ngiring kita idup seati enggau pangan diri, nitihka teladan Yesus Kristus, ⁶ ngambika semua kita ngemuliaka Allah Taala ti Apai Yesus Kristus Tuhan kitai. ⁷ Nya alai, sambut pangan diri, baka Kristus ke udah nyambut kita, kena ngemuliaka Allah Taala. ⁸ Laban, aku madah ngagai kita, Kristus bekereja ke orang Judah, kena mandangka Allah Taala endang tau dikarapka, ngambika Iya ngamatka semaya ti udah digaga Iya enggau aki ini sida, ⁹ sereta ngambika orang bansa bukai ulih ngemuliaka Allah Taala ketegal pengasih Iya. Munyi ti udah ditulis, “Nya alai aku deka ngaku Nuan di mua orang bansa bukai, lalu belagu muji nama Nuan.” ¹⁰ Bup Kudus mega bisi nyebut, “Rami gaga ati meh kita orang bansa bukai, sama enggau bala nembiak Tuhan!” ¹¹ Lalu Bup Kudus mega nyebut, “Puji meh Tuhan, semua kita orang bansa bukai, lalu awakka semua mensia muji Iya!” ¹² Lalu Yesaya mega nyebut, “Siku peturun Isai deka datai. Iya ke angkat lalu merintah orang bansa bukai. Sida deka manggaika pengadang sida ba Iya. ¹³ Awakka Allah Taala, ti pun pengadang, ngemenuhka kita enggau semua pengaga enggau pemaik ketegal pengarap kita, ngambika ulih kuasa Roh Kudus kita penuh laban pengadang. ¹⁴ Menyadi, aku nemu kita penuh laban pemadas, ngembuan semua penemu, lalu ulih ngajar pangan diri. ¹⁵ Tang ba pasal sekeda pekara, aku bisi udah nulis ngagai kita enggau nadai bepampul penemu, ngambika kita ingat, laban pengasih ti udah diberi Allah Taala ngagai aku, ¹⁶ ngasuh aku bekereja ke Kristus ba orang bansa bukai, ngereja pengawa imam betusuika Berita Manah Allah Taala, ngambika orang bansa bukai nyadi pemeri ti dikerinduka Allah Taala, ti dituchi Roh Kudus. ¹⁷ Nya alai, dalam Jesus Kristus, aku bisi kebuah temegahka pengawa ti dikereja aku ke Allah Taala. ¹⁸ Laban aku enggai bejakuka pasal utai bukai tang semina pasal utai ti udah dikereja Kristus ngena aku, kena mai orang bansa bukai ngasika Iya, ulih jaku enggau ulih utai ti dikereja Iya, ¹⁹ ulih kuasa kereja ajih enggau kereja ti nyelai, enggau ulih kuasa Roh Kudus. Nya alai aku udah nusui semua Berita Manah pasal Kristus berengkah ari Jerusalem nyentuk ngagai Ilirikum. ²⁰ Nya alai juluk ati aku endang seruran deka nusui Berita Manah, ukai ba endur alai orang bukai udah madahka pasal Kristus, enggai ke aku nirika eklisia ba pugu ti didudukka orang bukai, ²¹ tang, munyi ti udah ditulis, “Orang ke nadai udah kala dipadahka pasal Iya, deka meda lalu orang ke apin kala ninga pasal Iya, deka mereti.” ²² Nya kebuah aku suah enda ulih nemuai ngagai kita. ²³ Tang diatu, laban aku nadai agi utai dikereja di menua nya, lalu laban aku lama udah lelengauka kita, aku deka nemuai ngagai kita ²⁴ lebuh aku mupuk ngagai menua Spain. Laban aku endang ngarapka diri betemu enggau kita lebuh aku mansang kin, ngambika kita ulih nulung aku mupuk kin, lebuh aku udah ngelantangka diri begulai enggau kita enda lama. ²⁵ Tang diatu, aku deka mupuk ngagai Jerusalem, ngereja pengawa ke bala nembiak Tuhan din; ²⁶ Bup Kudus Rome 15:26-27 laban Masedonia enggau Akhaya udah gaga ati magi pemisi sida ngagai bala nembiak Tuhan ke suntuk di Yerusalem. ²⁷ Sida gaga ati ngereja nya. Iya ti bendar, sida berutang-budi ba orang Yahudi, laban enti orang Yahudi udah magi berekat Roh ngagai orang bansa bukai, orang bansa bukai patut mega ngena pengaya sida merekatka orang Yahudi. ²⁸ Nya alai lebuh aku udah nembuka pengawa tu, lalu udah nganjung ngagai sida semua duit ti udah digumpul, aku deka nemuai ngagai kita lebuh aku mansang ngagai menua Spanyol; ²⁹ lalu aku nemu, lebuh aku betemu enggau kita, aku deka mai semua berekat Kristus. ³⁰ Dalam nama Jesus Kristus, enggau ulih pengerindu Roh Kudus, aku minta kita, menyadi, sama bebendar besampi enggau aku ngagai Allah Taala, ke aku empu, ³¹ ngambika aku dilepaska ari jari orang ke enda arap di menua Yudea, sereta ngambika pengawa ti dikereja aku di Yerusalem diterima bala nembiak Tuhan din, ³² ngambika, ulih peneka Allah Taala, aku ulih betemu enggau kita enggau ati ti gaga, lalu ngelantangka diri begulai enggau kita. ³³ Awakka Allah Taala, ke pun pemaik, meruan enggau kita semua. Amin.