¹ Menyadi, utai ti dikinginka ati aku, enggau sampi aku ngagai Allah Taala ke sida, iya nya, minta sida diselamatka. ² Aku berani besaksi madahka sida balat angkunka Allah Taala, tang pengangkun sida ke Iya ukai beduduk ba penemu ti bendar, ³ laban sida enda nemu pengelurus ti datai ari Allah Taala. Nya alai sida numbuhka penemu ke diri empu lalu enda nunduk ngagai pengelurus Allah Taala. ⁴ Laban Kristus mai pengujung ngagai Adat, ngambika genap iku orang digaga lurus ulih pengarap sida ke Iya. ⁵ Musa bisi nuliska pasal pengelurus ti datai ari Adat, ku iya, “Orang ke ngiga pengelurus beduduk ba Adat, enda tau enda idup nitihka Adat.” ⁶ Tang pengelurus ti datai ari pengarap madah: “Anang nyebut dalam ati kita, ‘Sapa deka niki ke serega?’ (reti nya, mai Kristus nurun). ⁷ “Tauka ‘Sapa deka nurun ngagai dunya ti di baruh?’ ” (reti nya, ngangkatka Kristus ari mati). ⁸ Utai ti disebut Bup Kudus nya munyi tu: “Jaku nya semak kita, ba mulut kita enggau dalam ati kita.” Nya meh pesan pengarap ti dipadahka kami, ⁹ laban enti kita ngaku ngena mulut kita Yesus nya Tuhan, lalu dalam ati kita arapka Allah Taala udah ngangkatka Iya ari mati, kita deka diselamatka. ¹⁰ Laban kita arap ngena ati kita, lalu digaga lurus, lalu kita ngaku ngena mulut kita, lalu diselamatka. ¹¹ Munyi ti disebut Bup Kudus, “Orang ke arapka Iya sigi enda asa ngapa.” ¹² Laban orang Yahudi enggau orang bansa bukai sigi nadai bida ari pangan diri; Tuhan siku nya aja ke nyadi Tuhan ke semua mensia, lalu Iya gerah mudah meri berekat ngagai semua orang ke ngangauka Iya. ¹³ Laban, “Genap iku orang ke ngangauka nama Tuhan, deka diselamatka.” ¹⁴ Tang baka ni ku orang ulih ngangauka Iya, enti sida apin arap? Lalu baka ni ku sida ulih arapka Iya, enti sida apin ninga pasal Iya? Lalu baka ni ku sida ulih ninga, enti orang nadai madahka pasal Iya ngagai sida? ¹⁵ Lalu baka ni ku orang ulih madahka pasal Iya, enti orang nya enda diasuh? Munyi ti ditulis, “Naka meh pemanah kaki orang ke nusui Berita Manah!” ¹⁶ Tang ukai semua sida nya udah ngasika Berita Manah, laban Yesaya bisi nyebut, “Tuhan, sapa udah arapka pesan kami?” ¹⁷ Nya alai, pengarap datai ari ke ningaka pesan, lalu pesan didinga ari berita pasal Kristus. ¹⁸ Tang aku nanya: kati sida nadai udah ninga? Sida endang udah ninga, laban Bup Kudus bisi nyebut, “Munyi nyawa sida udah ngelekai di serata dunya, lalu leka jaku sida udah ngelekai nyentuk ngagai ujung dunya.” ¹⁹ Aku nanya baru: Kati orang Israel enda mereti? Orang ke terubah bejaku nya Musa, “Aku deka ngasuh kita kepapaska orang ke ukai dikumbai bansa. Aku deka ngasuh kita ringat ngena siti bansa ti beli.” ²⁰ Udah nya Yesaya bejaku berani agi ari nya lebuh iya nyebut, “Aku udah ditemu orang ke enda ngiga Aku. Aku udah mandangka Diri ngagai orang ke enda nanyaka Aku.” ²¹ Tang ba pasal orang Israel, Iya nyebut, “Sepemanjai hari Aku ngangkatka jari Aku ngagai orang ke enda ngasi sereta ngelaban.”