¹ Lebuh Yesus nurun ari bukit nya, mayoh amat urang nitih ka Iya. ² Siko lelaki ke sakit kusta datai ngagai Iya, belutut di mua Iya, alu bejako, “Tuhan, enti Nuan eka, Nuan uleh ngasuh aku tuci.” ³ Yesus ngunjur ka jari, negu urang nya, alu bejako, “Aku eka. Tuci meh nuan.” Urang nya alu gerai tekala nya. ⁴ Lalu ko Yesus bejako ngagai iya, “Anang madahka to ngagai urang, tang mansang nuan ngagai imam," minta iya meresa nuan, alu beri persembahan ti diasoh Musa, kena mandangka ngagai urang mayoh, nuan udah gerai.” ⁵ Leboh Yesus tama ngagai nengri Kapernaum, siko pemesai sedadu Roma betemu enggau Iya, minta saup Iya. ⁶ Ko iya, “Tuan, nembiak aku sakit, gali di rumah, nda uleh engkebut, alu merinsa amat.” ⁷ Ko Yesus bejako ngagai iya, “Aku deka kin alu ngerai ka iya.” ⁸ Tang ko pemesai nya bejako, “Tuan, rumah aku nda patut alai Nuan datai. Tak bejako aja, alu nembiak aku deka gerai. ⁹ Laban aku empu bekereja di baruh urang, alu aku mega bisi sedadu di pegai aku. Aku bejako ngagai siko, ‘Mupuk nuan!’ alu iya mupuk. Aku bejako ngagai siko, ‘Datai kitu!” alu iya datai. Aku bejak ngagai kuli aku, ‘Kereja to!” iya alu ngereja.” ¹⁰ Lebuh Yesus ninga nya, Iya balat alit ati, alu bejako ngagai urang ke nitih ka Iya, “Enggau bendar Aku madah ngagai kita, endah di menua Israel deh Aku nadai udah kala tetemu ka pengarap/iman ti baka to. ¹¹ Aku madah ngagai kita, mayoh urang deka datai ari timur enggau ari barat, alu duduk makai enggau Abraham, Ishak enggau Yakub alam Perintah surga, ¹² tang urang ke patut bempu Perintah nya deka dibuai ngagai endur ti petang, din sida deka nyabak sereta betekerik ngeli.” ¹³ Yesus alu bejako ngagai pemesai sedadu nya, “Mupuk meh nuan. Utai ti di pecaya nuan, deka nyadi.” Nembiak pemesai nya alu gerai amat- amat pas ba maya nya. ¹⁴ Leboh Yesus tama ngagai rumah Petrus, Iya meda mentua indu Petrus gali ba peninduk iya, sakit celap angat. ¹⁵ Yesus nego jari iya, alu iya gerai. Iya angkat, alu mela empara Yesus. ¹⁶ Leboh maya nyau lemai mayoh urang ke dirasuk antu dibai ngagai Yesus, alu Iya muru roh-roh antu ngena seleka jako aja, alu ngerai ka semua sida ke sakit. ¹⁷ To ngamatka jako ti udah disebut Tuhan ngena nabi Yesaya, “Iya ngambi pemedih-pemedih kitai alu nanggung penyakit-penyakit kitai.” ¹⁸ Leboh Yesus meda pemayoh urang begelumo ngelingi Iya, Iya alu ngasoh sida murid Iya ngelayang ke seberai danau nya. ¹⁹ Siko guru Adat datai ngagai Iya, alu bejako, “Guru, aku deka bejalai enggau Nuan ngagai sebarang endur Nuan bejalai.” ²⁰ Ko Yesus bejako ngagai iya, “Munsang bisi lubang, alu burung bisi sarang, tang Anak Mensia nadai endur alai ngalika pala Diri.” ²¹ Siko ari sida murid Iya bejako ngagai Iya, “Tuhan, awak ka aku pulai dulu alu ngubur ka apai aku.” ²² Tang ko Yesus bejako ngagai iya, “Titeh ka Aku. Awak ka urang ke parai ngubur ka bala sida empu ke parai.” ²³ Leboh Yesus nepan ngagai perau, sida murid Iya alu mupuk enggau Iya. ²⁴ Tekala nya ribut biau-balai alu mangka ba danau nya, alu perau sida nyau deka karam kena umbak. Tang Yesus tinduk. ²⁵ Sida murid mansang ngagai Iya alu ngerak Iya. Ko sida, “Selamat ka kitai, Tuhan! Parai kitai to!” ²⁶ Ko Iya bejako ngagai sida, “Nama kebuah kita takut? Mit amat meh pengarap kita.” Iya angkat alu ngerara ribut enggau gelumbang. Semua utai alu teduh magang. ²⁷ Sida balat alit ati, ko sida, “Sapa urang to, datai ke ribut enggau gelumbang nurut ka Iya?” ²⁸ Leboh Yesus datai di menua Gadara, di seberai danau nya, dua iko lelaki ke dirasuk antu pansut ari pendam alu mansang ngagai Iya. Seduai to mangah amat, datai ke urang nyau nadai berani bejalai nengah jalai nya. ²⁹ Tekala nya seduai iya alu merak ka nyawa bejako, “Nama guna Nuan enggau kami, Nuan Anak Allah Taala? Kati Nuan datai deka merinsa ka kami sebedau maya ti patut?” ³⁰ Nyadi nda jauh ari endur nya bisi raban jane, benung makai. ³¹ Alu ko bala antu nya bejako ngagai Yesus, “Enti Nuan muru kami, awak ka kami tama ngagai raban jane nya.” ³² Alu ko Yesus bejako ngagai sida, “Mupuk meh kita!” Sida mupuk, alu tama ngagai raban jane nya. Semua jane nya alu belanda nurun tebiang, terejun ngagai danau, alu parai lemas. ³³ Urang ke ngibun raban jane nya alu rari, tama ngagai nengri, alu madah ka semua utai nya, enggau pasal utai ti udah nyadi ba urang ke dirasuk antu nya. ³⁴ Genap iko urang alu pansut ari nengeri nya deka betemu enggau Yesus, alu leboh sida meda Iya, sida alu minta Iya mupuk ari menua sida.