¹ “Anang ngereja pengawa agama di mua urang mayoh, minta diri dipeda sida, laban enti kita ngereja nya, kita nadai buleh upah ari Apai kita ti di surga. ² “Nya alai, leboh kita meri sedekah ngagai urang ke suntuk, anang mandang ka diri ngereja nya baka ti dikereja urang ke pura-pura ngapa alam sinagoge-sinagoge tao ka ba sebelah jalai raya, minta diri dipuji mensia. Enggau bendar Aku madah ngagai kita, sida udah nerima upah sida. ³ Tang leboh kita meri sedekah ngagai urang ke suntuk, anang ngawak ka jari kiba kita nemu utai ti dikereja jari kanan kita, ⁴ ngambi ka pengawa nya dikereja kita belalai, alu Apai kita ti meda utai ti dikereja kita belalai, deka ngupah kita. ⁵ “Alu leboh kita besampi, anang baka urang ke pura-pura ngapa, laban sida rindu bediri alu besampi alam rumah ibadat, enggau ba tisi jalai raya, minta diri dipeda urang. Enggau bendar Aku madah ngagai kita, sida udah nerima upah sida. ⁶ Tang leboh kita besampi, tama ke bilik, tikup ka pintu, alu besampi ngagai Apai kita ti nda dipeda. Alu Apai kita ti meda utai ti dikereja kita belalai, deka ngupah kita. ⁷ Leboh kita besampi, anang besebutka mayuh macam leka jako ti nadai reti baka urang bansa bukai, ke ngumbai sampi sida didinga laban sampi sida panjai. ⁸ Anang baka sida nya, laban Apai kita nemu utai ti di peguna kita sebedau kita minta ari Iya. ⁹ Nya alai, baka to ko cara kita patut besampi: ‘Apai kami ti di surga: Kudus ke meh nama Nuan. ¹⁰ Datai meh Perintah Nuan. Nyadi meh peneka Nuan di dunya enggau di surga. ¹¹ Beri ngagai kami sehari to pemakai umbas dipakai kami. ¹² Ampun kami penyalah kami, baka kami ke ngampun urang ke salah enggau kami. ¹³ Alu anang mai kami ngagai penguji, tang lepaska kami ari penyai. [Laban Nuan Meh kebempu Kerajaan, enggau kuasa, enggau kemuliaan nyentuk ke belama-lamaiya. Amin.'] ¹⁴ “Laban enti kita ngampun urang ke salah enggau kita, Apai kita ti di surga deka mega ngampun penyalah kita. ¹⁵ Tang enti kita enggai ngampun urang ke salah enggau kita, Apai kita pen enggai mega ngampun penyalah kita." ¹⁶ “Alu leboh kita bepuasa, anang ngayanka mua ti tusah, baka urang ke pura-pura ngapa, laban sida ngurik mua diri ngambika urang nemu sida bepuasa. Enggau bendar Aku madah ngagai kita, sida udah nerima upah sida. ¹⁷ Tang leboh kita bepuasa, empungas mua kita, alu sugu buk kita, ¹⁸ ngambi ka urang nda nemu kita bepuasa, tang semina dipeda Apai kita ti nda di peda, alu Apai kita ti meda utai ti dikereja kita belalai, deka ngupah kita. ¹⁹ “Anang nyimpan pengaya ke diri empu di dunya, endur indu gegat enggau tegar ka ngerusak, alu perumpak tama alu ngencuri, ²⁰ tang simpan pengaya ke diri empu di surga, endur indu gegat, enggau tegar nda ngerusak, alu perumpak nda tama alu ngencuri. ²¹ Laban dia endur pengaya kita, dia meh endur ati kita. ²² “Mata nyadika lampu tubuh. Nya alai, enti mata kita menyana, semua tubuh kita penuh laban penampak, tang enti mata kita enda menyana, semua tubuh kita penuh laban pemetang. ²³ Nya alai, enti penampak ti alam kita nya pemetang, naka meh pemalat pemetang nya! ²⁴ “Nadai urang uleh betuaika dua iko tuan, laban iya deka begedika siko, alu rindu ka siko, tauka angkunka siko, alu mecat siko. Kita nda uleh betuai ka Allah Taala enggau duit. ²⁵ “Nya alai Aku madah ngagai kita: anang irauka pasal pengidup kita, tauka utai ti deka diempa tauka diirup kita, tauka pasal tubuh enggau gari kita. Ukai nda pengidup beguna agi ari pemakai, alu tubuh beguna agi ari gari? ²⁶ Peda kita burung. Sida nadai betanamka utai, nadai ngetau, tauka besimpanka utai alam setor, tang taja pia, Apai kita ti di surga nupi sida! Ukai nda kita lebih berega agi ari burung? ²⁷ Kati kita uleh nginsur umur diri panjai agi ngena pengirau kita? ²⁸ “Lalu nama kebuah kita irau ka gari? Peda kita penumbuh bungai babas ba padang, baka ni ko sida tumbuh, Sida nda kereja, tauka ngaga gari ke diri empu, tang taja pia, ²⁹ Aku madah ngagai kita, endah Raja Solomon enggau semua pengaya iya, deh nadai gari ngemanah siti ari bungai nya. ³⁰ Tang enti Allah Taala ngari rumput ti di babas, ti idup sehari to alu dibuai pagila ngagai api, nda ka Iya deka ngari kita? Naka meh pengemit pengarap kita. ³¹ “Nya alai, anang irau alu nyebut: ‘Nama utai ti deka diempa kitai? tauka, ‘Nama utai ti deka diirup kitai?’ tauka ‘Nama gari ti deka dikena kitai?’ ³² Laban nya utai ti ngirau ka ati urang kapir, alu Apai kita ti di surga nemu kita beguna ka semua utai nya. ³³ Tang giga dulu Perintah Allah Taala enggau pengelurus Iya, alu semua utai nya deka mega diberi ngagai kita. ³⁴ Nya alai, anang irau ka pasal hari pagila, laban pagila bisi pengirau ke diri empu. Penusah ke sehari tu cukup ke sehari tu.