¹ Pagi nya, semua tuai imam enggau sida tuai bansa alu begiga ka cara munuh Yesus. ² Sida nancang Iya, mai Iya pansut, alu nyerah ka Iya ngagai Gubernur Pilatus. ³ Leboh Yudas, ke udah nyual Iya, ninga Yesus udah diukum, iya nesal ati alu mulai ka tiga puluh singkap duit pirak nya ngagai sida tuai imam, enggau tuai bansa. ⁴ Ko iya, “Aku udah bedosa nyual urang ke nadai penyalah!” Tang ko sida nyaut iya, “Kapa kami ka iboh ka nya? Nya pekara nuan empu!” ⁵ Yudas lalu ngempas ka duit nya dalam Rumah Sembayang, alu mupuk ari endur nya, alu ngantung diri. ⁶ Sida tuai imam alu ngumpul duit nya, alu ko sida, “Kitai ngelanggar Adat enti kitai nyimpan duit to dalam sarang reta Rumah Sembayang, laban to duit darah.” ⁷ Nya meri sida berandau ka nya, alu meli, ngena duit nya, sebidang tanah ari tukang periuk, nyadi ka endur alai ngubur ka urang kampar. ⁸ Nya kebuah tanah nya di kumbai, “Tanah Darah” nyentuk ngagai sari to. ⁹ Utai to nyadi kena ngamat ka jako ti udah di sebut beseruan ka nabi Yeremia: “Lalu sida ngambi tiga puluh singkap duit pirak nya, penyampau ti udah dipesetuju ka urang Israel kena sida meli Iya, ¹⁰ alu ngena duit nya sida meli tanah tukang periuk, niteh ka pesan Tuhan ngagai aku.” ¹¹ Yesus bediri di mua Gubernur, alu Gubernur nanya Iya: “Kati Nuan raja urang Yahudi?” Disaut Yesus, “Munyi ti di sebut nuan.” ¹² Tang leboh sida tuai imam enggau sida tuai bansa nyalah ka Iya, Iya enda nyaut. ¹³ Udah nya Pilatus bejako ngagai Iya, “Kati Nuan nadai ninga pemayoh utai ti disebut sida ngelaban Nuan?” ¹⁴ Tang Yesus enda nyaut Pilatus, seleka jako pen enda, alu tuan Gubernur balat amat alit ati. ¹⁵ Nyadi ba tiap hari raya Paska, tuan Gubernur endang selalu ngelepas ka siko urang ka alam penjara niteh ka pinta urang mayoh. ¹⁶ Nyadi leboh maya nya bisi siko urang ka di penjara ti tebilang penyai iya, ke benama Yesus Barabas. ¹⁷ Nya alai leboh urang mayoh udah begempuru, Pilatus alu bejako ngagai sida, “Sapa patut di lepas ka aku ke kita? Yesus Barabas, tao ka Yesus ke di kumbai Kristus?” ¹⁸ Laban Pilatus endang nemu bala tuai urang Yahudi nyerah ka Yesus ngagai iya, laban sida kepapas. ¹⁹ Leboh Pilatus benung ngakim pekara nya, bini iya ngirum ka pesan ngagai iya munyi to: “Anang ngereja utai nama-nama ngagai urang ke lurus nya, laban aku udah tusah amat ati pasal Iya dalam mimpi aku sari to.” ²⁰ Nyadi sida tuai imam enggau sida tuai bansa nyungkak urang mayoh minta Pilatus ngelepas ka Barabas, alu munuh Yesus. ²¹ Tuan Gubernur alu bejako baru ngagai urang mayoh, “Sapa ari seduai to ke dilepas ka aku ke kita?” Sida alu nyaut, “Barabas!” ²² Pilatus alu bejako, “Enti pia, nama utai ti patut dikereja aku ngagai Yesus ke dikumbai Kristus?” Semua sida alu nyaut, “Salib ka Iya!” ²³ Pilatus alu nanya, “Nama kebuah? Nama penyalah Iya?” Tang sida manjung nyareh age, “Salib ka Iya!” ²⁴ Leboh Pilatus nemu diri nadai uleh ngereja utai nama-nama, laban urang mayoh nyau deka begau, iya ngambi ai, alu masu jari diri di mua urang mayoh, alu bejako, “Aku enda nanggung pemati urang to! Kita empu ke nanggung nya!” ²⁵ Semua urang mayoh alu nyaut, “Awak ka darah Iya ninggang kami enggau anak kami!” ²⁶ Nya alai Pilatus ngelepas ka Barabas ke sida. Iya ngasoh Yesus disipat, alu nyerah ka Iya ngambi ka Iya disalibka. ²⁷ Udah nya bala sedadu Pilatus mai Yesus ngagai istana gubernur, alu semua bala sedadu bekelingi ka Iya ²⁸ Sida alu muka gari ari tubuh Iya, alu ngerasuk ka baju panjai ti ungu ba Iya. ²⁹ Sida alu ngaga makota duri, ngengkah ka makota nya ba pala Iya, alu ngengkah ka siti tungkat buluh ba jari kanan Iya. Sida lalu besugang di mua Iya, alu ngelese ka Iya. Ko sida, “Tabi ke Nuan Raja urang Yahudi!” ³⁰ Sida alu ngeludah Iya, ngambi tungkat ari Iya, alu malu ka ngagai pala Iya. ³¹ Leboh sida udah tembu beduan Iya, sida muka baju panjai ti ungu nya ari Iya, alu ngerasuk ka gari Iya Empu baru ba Iya, alu mai Iya pansut, deka nyalibka Iya. ³² Leboh sida pansut, sida betemu enggau siko laki ke benama Simon, ari Kirene. Sida alu mejal ka Simon nya ngesan salib Yesus. ³³ Leboh sida datai ba endur siti ti di kumbai Golgota (reti nya, “Endur Alai Tengkorak”) ³⁴ sida meri Iya ngirup anggur di campur enggau empedu, tang leboh Yesus nyepi utai nya, Iya enggai ngirup nya. ³⁵ Leboh sida udah nyalibka Iya, sida alu becabut undi ke gari Iya. ³⁶ Udah nya sida duduk ngelila ka Iya. ³⁷ Ba atas pala Iya sida ngengkah ka siti pelekat ti madah ka penyalah Iya. Baka to ko jako ti dituleh ba pelekat nya, “TU MEH YESUS, RAJA URANG YAHUDI.” ³⁸ Leboh maya nya dua iko penyamun ka disalib ka sama enggau Iya, siko sepiak ari kanan, alu siko sepiak ari kiba. ³⁹ Urang ke mansa ngelese ka Yesus, ngilik ka pala sida ⁴⁰ alu bejako, “Nuan ke deka ngerubuh ka Rumah Sembayang, alu nirika iya baru dalam tiga hari, idup ka diri nuan empu! Enti Nuan Anak Allah Taala, nurun meh ari salib nya!” ⁴¹ Baka nya mega sida tuai imam enggau sida pengajar Adat, enggau sida tuai bansa mega ngelese ka Iya. Ko sida, ⁴² “Iya ngidup ka urang bukai, tang Iya enda uleh ngidup ka Diri Empu! Enti Iya amat Raja urang Israel, awak ka Iya nurun ari salib nya, ngambi ka kitai pecaya ka Iya! ⁴³ Iya ngarap ka Allah Taala. Awak ka Allah Taala meh ngelepas ka Iya, enti Allah Taala deka, laban Iya udah nyebut, ‘Aku to Anak Allah Taala.’ ” ⁴⁴ Perumpak ke disalib sama enggau Iya mega ngelese ka Iya. ⁴⁵ Ba urung tengah hari, semua menua petang magang nyentuk ngagai jam tiga ngaleh hari. ⁴⁶ Ba urung pukul tiga, Yesus ngangau enggau nyawa ti nyareh, “Eli, Eli, lama sabakhtani?” reti nya, “Allah Taala Aku, Allah Taala Aku, nama kebuah Nuan ninggalka Aku?” ⁴⁷ Leboh urang ke bediri dia ninga Iya manjung, sida alu bejako, “Iya ngangau ka Elia!” ⁴⁸ Siko ari bala sida alu belanda tekala nya, ngambi site bungai karang, nyepuh ka bungai karang nya ngagai ai anggur ti masam, nuat ka bungai karang nya ngena kayu, alu nguji ngasoh Yesus ngirup. ⁴⁹ Tang ko sida ti bukai bejako, “Anang guai dulu! Nyangka Elia bisi datai nyelamat ka Iya!” ⁵⁰ Yesus ngangau baru enggau nyawa ti nyareh, alu madam ka seput Iya. ⁵¹ Kain tirai ti digantung dalam Rumah Sembayang alu carik belah dua ari atas ke baruh. Tanah berenyang, lalu batu belah. ⁵² Kubur mega tebuka, alu mayoh nembiak Tuhan ke udah mati, diangkat ka idup baru. ⁵³ Sida pansut ari kubur leboh Yesus udah diangkat ka ari mati. Sida tama ngagai Nengri ti Kudus, alu mayoh urang meda sida. ⁵⁴ Leboh pemesai sedadu enggau bala sedadu ke sama enggau iya ngelilaka Yesus, meda tanah berenyang, enggau semua utai bukai ti nyadi, sida takut, alu ko sida, “Iya amat Anak Allah Taala!” ⁵⁵ Sida ke indu pen mayoh mega dia, ngelilaka Iya ari jauh. Sida to udah nitehka Iya ari Galilea, alu ngintu Iya. ⁵⁶ Bala sida nya nyengkaum Maria Magdalena, Maria indai Yakobus seduai Yusuf, enggau bini Zebedeus. ⁵⁷ Leboh hari nyau lemai, siko urang ke kaya ari Arimatea datai. Nama iya Yusuf. Iya to mega murid Yesus. ⁵⁸ Iya betemu enggau Pilatus, alu minta bangkai Yesus. Pilatus alu ngasoh urang nyerah ka bangkai Yesus ngagai Yusuf. ⁵⁹ Yusuf alu ngambi bangkai Yesus, alu mungkus bangkai nya ngena kain linin ti baru. ⁶⁰ Iya ngengkah ka bangkai nya dalam kubur Yusuf empu, ti udah ditebuk iya ba batu galang. Iya alu ngaring ka sigi batu ti besai ngagai mua lubang kubur nya, alu mupuk ari endur nya. ⁶¹ Maria Magdalena enggau Maria ti siko nya bisi dia, duduk nunga ngagai kubur nya. ⁶² Hari siti, iya nya hari Sabat, sida tuai imam enggau sida urang Farisi betemu enggau Pilatus. ⁶³ Ko sida, “Tuan, kami ingat ka utai ti udah disebut urang ke bula nya, leboh Iya age idup. Ko Iya, ‘Udah bekau tiga hari, Aku deka angkat idup baru.’ ⁶⁴ Nya alai, asoh urang nyaga kubur nya nyentuk ngagai hari ti ketiga, enggai ke sida murid Iya datai alu ngencuri bangkai Iya, alu madah ngagai urang mayoh, ‘Iya udah angkat idup baru ari mati,’ alu pemula ti penudi to deka jai age ari pemula ti keterubah.” ⁶⁵ Ko Pilatus bejako enggau sida, “Bai seraban penyaga, alu mupuk. Jaga kubur nya likun enggau naka uleh kita.” ⁶⁶ Sida mupuk alu ngelekat ka cap tambit ba batu ti dikena nutup kubur nya alu ngasoh penyaga nyaga kubur nya.