¹ Yesus pansut ari Rumah Sembayang, alu leboh Iya benung bejalai ninggal ka rumah nya, sida murid Iya datai alu nunjuk ka ngagai Iya semua rumah ti dalam Rumah Sembayang nya. ² Tang ko Iya nyaut sida, “Kita meda semua utai to. Tang enggau bendar Aku madah ngagai kita, nadai sige batu nya deka mengkang betusun dito, tang semua deka di runtuh ka magang.” ³ Leboh Yesus duduk ba Bukit Zaitun, sida murid datai ngagai Iya kediri, alu bejako, “Padah ka ngagai kami, kemaya semua utai to deka nyadi, alu nama tanda ti nunjuk ka Nuan deka datai baru, enggau pengujung dunya?” ⁴ Disaut Yesus, “Bejaga kita, enggai ke urang nesat ka kita. ⁵ Laban mayoh urang deka datai dalam nama Aku, ko sida, ‘Aku to Kristus!’ alu sida deka nesat ka mayoh urang. ⁶ Lalu kita deka ninga munyi perang, enggau berita pasal perang. Tang anang takut, laban utai nya enda tao enda nyadi, tang pengujung empai datai. ⁷ Laban bansa site deka beperang ngelaban bansa site, alu menua site deka beperang ngelaban menua site, alu lapar pungkang enggau tanah berenyang deka nyadi ba mayoh bengkah endur. ⁸ Semua utai to deka nyadi baka indu ke radai deka beranak. ⁹ “Udah nya sida deka nangkap kita, merinsa ka kita, alu munuh kita, alu semua bansa deka begedi ka kita ketegal nama Aku. ¹⁰ Udah nya mayoh urang deka ngeleka ka pengarap, alu nyual pangan diri, sereta begedi ka pangan diri. ¹¹ Lalu mayoh nabi ti pelesu deka pansut, alu nesat ka mayoh urang. ¹² Lalu laban penyai deka nambah-menambah, mayoh urang enda age rindu ka pangan diri. ¹³ Tang urang ke tan datai ke ujung, deka diselamat ka. ¹⁴ Lalu Berita Badas pasal Perintah Allah Taala deka di tusi di serata dunya, nyadi ka saksi ngagai semua bansa. Udah nya baru pengujung datai. ¹⁵ “Nya alai leboh kita meda utai ti jai, ti balat ngenakut ka, ti dikenang nabi Daniel, bediri ba endur ti kudus (awak ka urang ke maca mereti ka utai to), ¹⁶ awak ka urang ke diau di Yudea ngerari ka diri ngagai bukit. ¹⁷ Awak ka urang ke ba atas perabung enda nurun ngambi utai ari alam rumah iya, ¹⁸ alu awak ka urang ke di umai, enda nikal alu ngambi gare iya. ¹⁹ Naka meh penusah indu ke ngandung enggau sida indai ke nusu ka anak leboh maya nya! ²⁰ Besampi kita, ngambi ka kita ukai rari leboh musin celap, tao ka leboh hari Sabat! ²¹ Laban leboh maya nya ila penusah ti besai deka nyadi, baka ti nadai udah kala nyadi kenyau ari penumbuh dunya nyentuk ngagai sari to, tao ka jemah ila. ²² Lalu enti penyampau hari nya enda dikurang ka, nadai mensia uleh diselamat ka. Tang ketegal bala nembiak ke udah dipilih Allah Taala, penyampau hari nya deka dikurang ka. ²³ “Udah nya, enti urang nyebut ngagai kita, ‘Peda kita! Nyin Kristus!’ tao ka ‘Nyin Iya!’ anang arap ka nya. ²⁴ Laban Kristus ti pelesu, enggau nabi ti pelesu endang deka pansut, alu ngereja kereja ajih, enggau kereja ti nyelai, kena sida nesat ka nembiak ti udah dipilih Allah Taala, enti uleh. ²⁵ Dinga kita! Aku udah madah ka utai to sebedau iya nyadi. ²⁶ “Nya alai, enti urang madah ngagai kita, ‘Peda kita! Nyin Iya di menua puang din,’ anang kita kia. Tao ka enti sida nyebut ngagai kita, ‘Peda kita! Iya bisi di bilik!’ anang kita arap ka nya. ²⁷ Laban Anak Mensia deka datai baka kilat ti nyelar ari timur ngagai barat. ²⁸ Dia endur bangkai, dia meh endur alai burung ti bepakai ka bangkai deka begelumu.” ²⁹ “Enda lama udah bekau penusah ti besai nya nyadi, mata hari deka piam, alu bulan nadai agi mancar, alu bintang deka laboh ari langit, alu kuasa ti di langit deka beguncang. ³⁰ Udah nya tanda Anak Mensia deka pansut di langit, alu semua mensia di dunya deka ngulit, alu sida deka meda Anak Mensia datai ba atas remang ari surga, ngena kuasa enggau mulia ti besai. ³¹ Terumpit ti besai deka di sepu, alu Anak Mensia deka ngasoh bala malaikat Iya bejalai, alu sida deka ngempuru ka semua urang ke udah di pilih Allah Taala ari semua ujung dunya. ³² “Pelajar ka ari kayu ara. Leboh dan iya nyau geduk, alu belabuh bekantuk, kita nemu musin panas nyau damping. ³³ Baka nya mega leboh kita meda semua utai to, kita nemu Iya nyau damping, udah datai ba mua pintu. ³⁴ Enggau bendar Aku madah ngagai kita, rebak ti diato empai mati sebedau semua utai to udah nyadi magang. ³⁵ Langit enggau dunya deka enyau, tang leka jako Aku enda enyau. ³⁶ “Tang nadai urang nemu hari tao ka jam utai to deka nyadi. Malaikat ke di surga enda nemu, alu Anak Mensia pen enda mega nemu. Semina Apai aja nemu. ³⁷ Baka leboh maya Nuh menya, baka nya meh gaya penatai Anak Mensia. ³⁸ Laban berapa hari sebedau bah besai nyadi, urang majak makai ngirup, jadi melaki-bini, nikah, nyentuk ngagai hari Nuh tama ke dalam bandung, ³⁹ alu sida nadai nemu utai, nyentuk ngagai maya ai bah datai alu naban ka semua sida. Baka nya meh gaya penatai Anak Mensia. ⁴⁰ Leboh maya nya ila, dua iko urang deka kerja di umai: siko di taban ka, alu siko di tinggal ka. ⁴¹ Dua iko indu deka ngisar: siko di taban ka, alu siko di tinggal ka. ⁴² Nya alai, bejaga-jaga kita, laban kita enda nemu hari Tuhan kita deka datai. ⁴³ Tang kita enda tao enda nemu to, enti urang ke bempu rumah nemu kemaya pencuri deka datai, iya tentu deka bejaga alu enda ngasoh rumah iya di rumpak. ⁴⁴ Nya alai kita enda tao enda sedia, laban Anak Mensia deka datai ba jam ti enda disangka kita. ⁴⁵ “Nya alai, sapa kuli ke tetap ati sereta bepenemu-dalam, ke udah diasoh tuan iya ngemata ka semua kuli ti bukai, ngambi ka bisi meri sida pemakai ba maya ti patut. ⁴⁶ Beberekat meh kuli nya ke di temu tuan iya ngereja pengawa nya, leboh tuan iya datai! ⁴⁷ Enggau bendar Aku madah ngagai kita, tuan iya deka ngasoh kuli nya ngemata ka semua reta tengkira iya. ⁴⁸ Tang enti kuli nya jai, iya deka bejako alam ati diri, ‘Tuan aku laun datai’ ⁴⁹ alu iya belabuh bepalu ka kuli ti bukai, alu makai ngirup enggau urang ke pemabuk. ⁵⁰ Leboh tuan iya datai ba hari enggau jam ti enda di sangka iya, tao ka di temu iya, tuan iya deka mepat iya, ⁵¹ alu muai iya sama enggau urang ke pura-pura ngapa, ngagai endur alai urang deka nyabak sereta begerit ngeli.