¹ Leboh maya nya, sida murid datai ngagai Yesus, alu nanya, “Sapa urang ke pemadu besai alam Perintah surga?” ² Iya alu ngangau ka siko anak mit, alu ngasoh iya bediri ba tengah-tengah sida. ³ Iya alu bejako, “Enggau bendar Aku madah ngagai kita, enti kita enda berubah alu nyadi baka anak mit, kita enda uleh tama ngagai Perintah surga. ⁴ Barang sapa ngemaroh ka diri baka anak mit to, deka nyadi urang ke pemadu besai alam Perintah surga. ⁵ Barang sapa nerima anak mit baka to alam nama Aku, nerima Aku. ⁶ Enti kita ngasoh siko ari sida anak mit ke arap ka Aku, bedosa, badas age enti batu kilang ti besai ditancang ka ba rekung urang nya, alu iya di tengelam ka ngagai tasik ti dalam. ⁷ Tulah meh dunya laban utai ti ngasoh mensia bedosa! Penguji endang enda tao enda datai, tang tulah meh urang ke ngasoh penguji nya datai! ⁸ Lalu enti jari tauka kaki nuan mai nuan bedosa, tetak alu buai iya! Manah age nuan tama ngagai pengidup nadai jari tauka kaki sepiak, ari ke bisi dua piak jari tauka kaki, tang nuan dibuai ngagai api ti enda nemu padam. ⁹ Lalu enti mata nuan mai nuan bedosa, keruk alu buai iya! Badas age nuan tama ngagai pengidup mai sige aja leka mata, ari ke bisi dua ige leka mata, tang nuan dibuai ngagai api neraka. ¹⁰ “Bejimat kita, enggai ke kita ngemaroh ka sida ke mit to. Laban, Aku madah ngagai kita, di surga din malaikat sida endang seruran bediri di mua Apai Aku di surga. ¹¹ [Laban Anak Mensia datai ngambi ka Iya nyelamat ka urang ke tesat.] ¹² Baka ni ko pikir kita? Enti urang siko bisi seratus iko bedus, alu siko bedus nya enyau, enda ke iya deka ninggal ka sida ke semilan puluh semilan iko ba bukit, alu bejalai ngiga siko ti enyau nya? ¹³ Lalu leboh iya udah tetemu ka bedus nya, enggau bendar Aku madah ngagai kita, iya deka lebih age gaga ati ke bedus siko nya ari sida ke semilan puluh semilan iko ti enda enyau. ¹⁴ Baka nya meh Apai kita ti di surga enggai ngasoh siko pan ari sida ke mit to enyau. ¹⁵ “Enti menyadi nuan bedosa ngelaban nuan, mansang nuan ngagai iya, alu padah ka penyalah iya ngagai iya, entara seduai aja. Enti iya mending ka nuan, reti nya nuan udah ulih nguing ka ati iya. ¹⁶ Tang enti iya enggai mending ka nuan, bai siko tauka dua iko urang enggau nuan, ngambika ‘genap leka jako ditetap ka beduduk ba saksi dua tauka tiga iko urang.’ ¹⁷ Enti iya enggai mending ka sida, padah ka ngagai jemaat. Lalu enti iya enggai mending ka jemaat, gaga iya baka ke ngaga urang bansa bukai, tauka pengumpul cukai. ¹⁸ “Enggau bendar Aku madah ngagai kita: sebarang utai di tancang kita di dunya to, deka di tancang di surga, alu sebarang utai dibuka kita di dunya to, deka dibuka di surga. ¹⁹ “Aku madah ngagai kita baru: enti dua iko kita di dunya to besetuju ka utai ti di pinta kita, utai nya deka di kereja ke kita uleh Apai Aku ti di surga. ²⁰ Laban leboh dua tauka tiga iko urang begempuru alam nama Aku, Aku bisi dia enggau sida.” ²¹ Udah nya Petrus datai ngagai Yesus alu bejako, “Tuhan, enti menyadi aku bedosa ngelaban aku, berapa penyuah aku patut ngampun iya? Tujuh kali?” ²² Ko Yesus madah ngagai iya, “Ukai tujuh kali, tang tujuh puluh kali tujuh. ²³ Nya alai Perintah surga tao di banding ka enggau siko raja ke deka meresa saldo bala urang gaji iya. ²⁴ Leboh iya baru deka belaboh ngereja pengawa nya, siko urang gaji, ke udah nginjau sepuluh ribu talenta dibai betemu enggau iya. ²⁵ Laban urang gaji nya enda tebayarka utang diri, nya alai raja alu ngasoh iya dijual, sama enggau bini enggau bala anak iya, sereta enggau semua reta tengkira iya, kena mayar utang nya. ²⁶ Kuli nya alu besugang di mua raja, minta kasih ari raja. Ko iya, ‘Aku minta nuan sabar enggau aku. Aku deka mayar semua utang aku!’ ²⁷ Laban raja nya kasih ka kuli iya nya, nya alai iya ngelepas ka iya, ngampun iya alu muai utang iya. ²⁸ Tang leboh kuli nya pansut, iya betemu enggau urang siko ke sama kuli baka iya empu, ke berutang seratus dinar aja ba iya. Iya nangkap sereta nyekak urang nya, alu bejako, ‘Bayar utang nuan!’ ²⁹ Urang ke di cekak iya alu besugang, minta kasih ngagai iya, ‘Aku minta nuan sabar enggau aku. Aku deka mayar semua nya ngagai nuan!’ ³⁰ Tang iya enda sabar enggau urang nya. Iya alu nutup urang nya alam rumah penjara, datai ke urang nya udah mayar utang iya. ³¹ Leboh urang gaji ti bukai meda nya, sida tusah amat ati, alu madah ka semua pekara nya ngagai raja sida. ³² Raja alu ngangau ka kuli iya nya, alu bejako ngagai iya, ‘Nuan to kuli ti jai! Aku udah muai semua utang nuan, laban nuan minta kasih ari aku. ³³ Kati nuan enda nemu kasih ka urang ke sama kuli baka nuan empu, baka aku ke udah kasih ka nuan?’ ³⁴ Raja balat amat pedih ati, alu ngasoh kuli nya ditutup alam rumah jil, datai ke iya udah uleh mayar semua utang iya. ³⁵ Baka nya mega meh Apai Aku ti di surga deka ngereja nya ngagai genap iko kita, enti kita enda ngampun menyadi kita enggau pengabeh ati kita.”