¹ Leboh maya nya, kena hari Sabat, Yesus bejalai nengah umai gandum. Sida murid Iya lapar alu belaboh ngerurut tangkai gandum, alu bepakai ka igi gandum. ² Tang leboh urang Farisi meda nya, sida alu bejako ngagai Yesus, “Peda Nuan, sida murid Nuan ngereja utai ti nda disagi Adat leboh hari Sabat!” ³ Ko Yesus bejako ngagai sida, “Kati kita nadai udah kala maca pasal utai ti dikereja Daud leboh iya enggau bala iya lapar, ⁴ pasal iya ke tama ngagai rumah Allah Taala, alu makai roti ti udah diberi ngagai Allah Taala, ti nda tau diempa iya, nitihka Adat, tauka diempa urang ke enggau iya, tang semina tau diempa imam aja? ⁵ Kati kita nadai udah kala maca alam Adat, pasal sida imam ke sengaja ngelanggar Adat hari Sabat alam Rumah Sembayang genap hari Sabat, tang enda dikumbai salah? ⁶ Aku madah ngagai kita, utai ti besai agi ari Rumah Sembayang bisi ditu. ⁷ Lalu enti kita nemu reti jako, ‘Aku beguna ka pengasih, ukai persembahan’, kita tentu nda ngukum urang ke nadai penyalah, ⁸ laban Anak Mensia Tuhan atas hari Sabat.” ⁹ Yesus alu mupuk ari endur nya, alu tama ngagai rumah ibadat. ¹⁰ Alam rumah ibadat nya bisi siko lelaki ke parai jari sepiak. Alu sida nanya Yesus, “Kati kitai ngelanggar Adat enti kitai ngerai ka urang leboh hari Sabat?” Sida nanya munyi nya ngambi ka sida ulih nyalahka Iya. ¹¹ Ko Yesus bejako ngagai sida, “Baka ni enti siko ari bala kita bisi siko jelu bedus, alu jelu nya laboh ngagai lubang kebung leboh hari Sabat, nda ke iya deka ngulih ka jelu nya ari lubang nya? ¹² Mensia lebih berega agi ari bedus! Nya alai kitai nda ngelanggar Adat enti kitai ngereja pengawa ti badas leboh hari Sabat.” ¹³ Udah nya Iya alu bejako ngagai urang ke parai jari nya, “Unjurka jari nuan.” Urang nya alu ngunjur ka jari iya, alu jari iya gerai, baka jari iya ti sepiak. ¹⁴ Tang urang Farisi pansut alu baum ngiga jalai munuh Yesus. ¹⁵ Leboh Yesus nemu sida bepekat ngelaban Iya, Iya alu mupuk ari endur nya. Mayoh amat urang nitihka Iya, alu Iya ngeraika semua sida, ¹⁶ alu nagang sida madahka pasal Iya ngagai urang bukai. ¹⁷ To ngamatka jako ti udah disebut Tuhan ngena nabi Yesaya: ¹⁸ "Peda meh, tu Nembiak Aku ti udah dipilih Aku. Aku rindu sereta gaga ati ke Iya. Aku deka nuang Roh Aku ba Iya, alu Iya deka madah ka atur ti lurus ngagai urang bansa bukai. ¹⁹ Iya nda bekelikuh tauka merak ke nyawa, alu Iya nda bejako nyarih ba sebelah jalai raya. ²⁰ Iya enggai matah ka buluh ti pecah, tauka madam ka kelita ti kelap-kelap ti ka padam, datai ke Iya udah ngasoh atur ti lurus menang, ²¹ alu semua urang bansa bukai deka andal ati ke Iya.” ²² Siko lelaki ke buta sereta bago laban iya dirasuk antu, dibai ngagai Yesus, alu Iya ngerai ka urang nya. Urang nya alu uleh bejako sereta meda. ²³ Lalu semua urang mayoh balat alit ati, ko sida, “Kati Iya amat Anak Daud?” ²⁴ Tang leboh urang Farisi ninga jako sida nya, sida alu bejako, “Iya muru antu ngena kuasa Beelzebul ti nyadi raja antu.” ²⁵ Yesus nemu peragam ati sida, alu ko Iya bejako ngagai sida, “Genap bengkah menua ti bepecah-belah alu beripih ngelaban diri empu, deka rusak, alu nadai nengri tauka ruang bilik ti bepecah-belah alu beripih ngelaban diri empu, ulih tan. ²⁶ Lalu enti Sitan muru Sitan, iya beripih ngelaban diri empu. Nya alai baka ni ko perintah iya uleh tan? ²⁷ Lalu enti Aku muru antu ngena kuasa Beelzebul, kuasa sapa dikena bala nembiak kita muru antu? Nya alai sida empu deka nyadi hakim kita. ²⁸ Tang enti Aku muru antu ngena kuasa Roh Allah Taala, reti nya Perintah Allah Taala udah datai ba kita. ²⁹ Tauka, baka ni ko urang uleh tama ngagai rumah urang ke kering alu ngerumpak utai iya, enti iya enda dulu nancang urang ke kering nya? Udah nya baru iya ulih ngerumpak utai ari rumah urang nya. ³⁰ “Urang ke nda setanah enggau Aku, ngelaban Aku, alu urang ke nda enggau Aku ngempuru, mambar-pepar. ³¹ Nya alai Aku madah ngagai kita: semua dosa ti dikereja mensia enggau jako busung sida, deka diampun, tang barang sapa bejako busung ngelaban Roh Kudus, enda diampun. ³² Barang sapa bejako ngelaban Anak Mensia, deka diampun, tang barang sapa bejako ngelaban Roh Kudus, enda diampun, nemu ka diato tauka di dunya ti deka datai. ³³ “Intu kayu galak, alu iya deka mansut ka buah ti badas. Enti kitai ngelak ka kayu ringgas, iya deka mansut ka buah ti jai. Kitai ngelala kayu ari buah iya. ³⁴ Oi, kita anak ular bebisa! Baka ni ko kita uleh nyebut utai ti badas, enti kita empu endang jai? Laban mulut kita nyebut utai ti ngemenuh ka ati kita. ³⁵ Urang ke badas mansut ka utai ti badas ari ati iya ti badas, alu urang ke jai mansut ka utai ti jai ari ati iya ti jai. ³⁶ “Aku madah ngagai kita, leboh Hari Pecara ila, urang enda tau enda madahka semua leka jako ti enda menyana ti udah disebut sida, ³⁷ laban uleh jako kita empu kita deka dikumbai lurus, alu uleh jako kita empu kita deka diukum.” ³⁸ Udah nya sekeda guru Adat enggau urang Farisi bejako enggau Iya, “Guru, kami keran deka meda tanda ari Nuan.” ³⁹ Tang ko Iya nyaut sida, “Rebak ti jai sereta butang to begiga ka tanda, tang nadai tanda deka diberi ngagai sida kelimpah ari tanda nabi Yunus. ⁴⁰ Baka Yunus ke alam perut ikan tiga hari tiga malam, baka nya meh Anak Mensia deka mengkang dalam tanah tiga hari tiga malam. ⁴¹ Urang Niniwe deka angkat sama enggau urang ke ari rebak ti diato leboh Hari Pecara ila alu besalah ka sida, laban sida urang Niniwe udah nesal ati ke dosa sida leboh sida ninga jako ajar Yunus, alu diatu utai ti besai agi ari Yunus bisi dito! ⁴² Ratu ari menua Selatan deka angkat sama enggau urang ke ari rebak ti diato leboh Hari Pecara alu besalah ka sida, laban iya udah datai ari ujung dunya deka mending ka penalam penemu Salomo, alu diatu utai ti besai agi ari Salomo bisi dito! ⁴³ “Leboh roh ti jai pansut ari urang, iya bejalai nengah menua ti rangkai ngiga endur alai belelak, tang iya nadai tetemuka endur nya. ⁴⁴ Udah nya iya bejako, ‘Aku deka pulai baru ngagai rumah ti udah ditinggal ka aku.’ Leboh iya datai ba rumah nya, iya nemu rumah nya puang, udah disapu sereta dikemas. ⁴⁵ Udah nya iya pansut, alu mai tujuh iko roh ti bukai, ti jai agi ari iya empu, alu sida tama alu diau dia. Lalu pendiau urang nya jai agi ari ti keterubah. Baka nya meh utai ti deka nyadi ba rebak ti jai tu.” ⁴⁶ Leboh Yesus agi benung bejako ngagai urang mayoh, indai enggau sida menyadi lelaki Iya bediri di luar, deka bejako enggau Iya. ⁴⁷ Siko urang alu madah ngagai Iya, “Indai enggau sida menyadi lelaki Nuan bisi di luar, deka bejako enggau Nuan.” ⁴⁸ Tang ko Yesus nyaut urang nya, “Sapa indai Aku, alu sapa menyadi lelaki Aku?” ⁴⁹ Iya alu nunjuk ngagai sida murid Iya, alu bejako, “To indai Aku, enggau menyadi lelaki Aku! ⁵⁰ Laban barang sapa ngereja utai ti dikedeka ka Apai Aku ti di surga, nya meh menyadi lelaki, menyadi indu, enggau indai Aku.”