¹ 1Semua raban Kunsil lalu angkat sereta, lalu mai Jesus ngagai Pilatus. ² Sida lalu belabuh bedawaka Iya, ku sida, “Kami nemu orang tu nesatka bansa kami, nagang kami mayar cukai ngagai Raja Besai, lalu ngumbai Diri Kristus, reti nya raja.” ³ Pilatus lalu nanya Iya, “Kati Nuan raja orang Yuhudi?” Jesus lalu nyaut iya, “Munyi ka ku nuan.” ⁴ Pilateus lalu bejaku ngagai sida tuai imam, enggau ngagai bala orang mayuh, “Aku nadai nemu kebuah kita bedawaka orang tu.” ⁵ Tang sida bebendar agi bejaku, ku sida, “Iya megau orang mayuh, ngajar di serata menua Judea, kenyau ari Galili alai Iya ke berengkah, nyentuk ngagai endur tu.” ⁶ Lebuh Pilatus ninga nya, iya lalu nanya enti Jesus nya orang Galili. ⁷ Lebuh iya ninga Jesus datai ari menua ka dipegai Herodes, iya lalu ngasuh Jesus dibai ngagai Herodes, ke bisi di Jerusalem lebuh maya nya. ⁸ Lebuh Herodes meda Jesus, iya gaga amat ati, laban iya lama udah keran deka betemu enggau Jesus, laban iya udah ninga berita pasal Jesus, lalu ngarapka diri ulih meda Jesus ngereja kereja ajih. ⁹ Herodes lalu lama nanya Jesus, tang Jesus enda nyaut iya. ¹⁰ 10Sida tuai imam enggau sida pengajar Adat bisi bediri dia, bebendar amat bedawaka Jesus. ¹¹ Indah Herodes enggau bala soldadu iya deh beduan sereta ngeleseka Jesus. Udah nya iya ngerasukka baju panjai ti manah ba Jesus, lalu ngirumka Jesus pulai baru ngagai Pilatus. ¹² Ba hari nya Herodes seduai Pilatus lalu bebaik enggau pangan diri. Sebedau nya, seduai iya endang bemunsuh enggau pangan diri. ¹³ Pilatus lalu ngempuruka sida tuai imam, tuai bansa, enggau orang mayuh, ¹⁴ lalu bejaku ngagai sida, “Kita udah mai orang tu ngagai aku, madahka Iya udah nesatka orang mayuh. Aku udah mansik Iya di mua kita empu, lalu aku nadai nemu Iya bisi udah ngereja penyalah munyi ti ku kita. ¹⁵ Herodes pen nadai mega nemu penyalah Iya, laban iya udah ngirumka Iya pulai baru ngagai aku. Orang tu nadai udah ngereja utai ka tau ngasuh Iya kena ukum bunuh. ¹⁶ Nya alai aku deka ngasuh Iya disipat, lalu ngelepaska Iya.” ¹⁷ Nyadi Pilate endang selalu ngelepaska siku orang jil ke orang mayuh ba genap Gawai Paska. ¹⁸ Semua sida lalu manjung, ku sida, “Bunuh Iya! Lepaska Barabas ke kami!” ( ¹⁹ Nyadi Barabas udah ditutup dalam rumah jil ketegal orang begau ngelaban perintah di nengeri nya, enggau ketegal iya udah munuh orang.) ²⁰ Laban Pilatus endang deka ngelepaska Jesus, nya alai iya lalu bejaku baru ngagai sida. ²¹ Tang sida majak manjung, “Regang Iya! Regang Iya!” ²² Pilatus lalu bejaku baru ketiga kali ngagai sida, ku iya, “Nama kebuah? Nama penyalah ti udah dikereja Iya? Aku nadai nemu Iya bisi udah ngereja penyalah ti tau ngasuh Iya kena ukum bunuh! Nya alai aku deka ngasuh Iya disipat, lalu ngelepaska Iya.” ²³ Tang sida majak manjung madahka Jesus enda tau enda diregang. Ke pengujung iya, Pilatus lalu nurutka sida, ²⁴ lalu meri pemutus penemu madahka peminta sida dikemendarka. ²⁵ Pilatus lalu ngelepaska orang ke dipinta sida, orang ke udah ditutup dalam rumah jil ketegal iya udah mai orang angkat ngelaban perintah lalu udah munuh orang. Pilatus lalu nyerahka Jesus ngagai sida, nurutka pinta sida. ²⁶ Lebuh sida mai Iya ari endur nya, sida nangkap siku orang ke benama Simon orang Sairin, ke baru datai ari menua pesisir deka mansang ngagai nengeri, sida lalu manggaika regang nya ba belakang Simon, lalu mejalka iya ngesan regang nya ngentudi Jesus. ²⁷ Mayuh amat orang nitihka Jesus, nyengkaum sida indu ke mandam dada diri nyabakka Iya. ²⁸ Tang Jesus nguing ngagai sida, lalu bejaku, “Kita indu Jerusalem! Anang nyabakka Aku, tang nyabakka diri empu, enggau nyabakka anak kita. ²⁹ Laban hari deka datai alai orang deka nyebut, ‘Beberekat meh indu ke mandul, ke nadai kala ngandung, ke nadai kala nusuka anak!’ ³⁰ Sida lalu belabuh bejaku ngagai bukit, ‘Tinggang kami!’ lalu bejaku ngagai munggu, ‘Lamun kami!’ ³¹ Laban enti sida ngereja nya lebuh kayu agi idup, nama utai ka deka nyadi lebuh kayu nya udah rangkai?” ³² Dua iku orang bukai, ke udah ngereja penyalah, mega dibai ngambika seduai iya dibunuh sama enggau Iya. ³³ Lebuh sida datai ba endur ka dikumbai “Keruntuk,” sida lalu ngeregang Iya dia sama enggau dua iku orang ke udah ngereja penyalah, siku muak ari kanan, lalu siku muak ari kiba Iya. ³⁴ Udah nya Jesus bejaku, “Apai, ampun sida, laban sida enda nemu utai ti dikereja diri.” ³⁵ Orang mayuh bediri dia nengkilaka Iya, tang bala tuai orang Yuhudi ngeleseka Iya. Ku sida, “Iya ngidupka orang bukai. Awakka Iya ngidupka Diri Empu, enti Iya amat Kristus ka udah dipilih Allah Taala!” ³⁶ Sida soldadu mega ngeleseka Iya. Sida mansang ngagai Iya lalu meri Iya wain ka masam, ³⁷ ku sida bejaku, “Enti Nuan amat raja orang Judah, selamatka Diri Empu!” ³⁸ Siti pelekat bisi mega diengkah ari atas Iya, “Tu Raja orang Yuhudi.” ³⁹ Siku orang ke udah ngereja penyalah ke diregang dia majak ngeleseka Jesus. Ku iya, “Kati Nuan ukai Kristus? Selamatka Diri Empu enggau kami duai!” ⁴⁰ Tang iya ke siku ngerara iya, ku iya, “Kati nuan enda nangika Allah Taala, laban nuan sama kena ukum baka Iya? ⁴¹ Tua endang patut diukum, laban tua amat udah ngereja penyalah, tang orang tu nadai udah ngereja penyalah.” ⁴² Iya lalu bejaku ngagai Jesus, “Jesus, kingatka aku lebuh Nuan datai ngagai Perintah Nuan!” ⁴³ Jesus lalu nyaut, “Enggau bendar Aku madah ngagai nuan, sehari tu nuan deka sama enggau Aku di serega.” ⁴⁴ Ba urung tengah hari semua menua petang magang, nyentuk ngagai pukul tiga ngalih hari, ⁴⁵ laban mata hari nadai mancar agi. Kain tirai dalam Rumah Sembiang lalu carik belah dua. ⁴⁶ Jesus lalu ngangau enggau nyawa ka inggar, “Apai! Aku nyerahka semengat Aku ngagai jari Nuan!” Lebuh Iya udah nyebut nya, Iya lalu ngapuska seput. ⁴⁷ Lebuh kepala soldadu meda utai ka udah nyadi, iya lalu muji Allah Taala. Ku iya, “Orang tu amat nadai penyalah!” ⁴⁸ Lebuh semua orang ke begempuru nengkila dia meda utai ka nyadi, sida lalu pulai ke rumah, mandam dada diri. ⁴⁹ Tang semua orang ke bekelala enggau Jesus, nyengkaum sida indu ke udah nitihka Iya ari Galili, bediri nengkila ari jauh. ⁵⁰ Nyadi dia bisi siku orang ke badas sereta lurus, benama Jusup. Iya tu raban Kunsil. ⁵¹ Tang iya enda besetujuka pelan enggau utai ka dikereja sida. Iya datai ari nengeri Arimatea, di menua Judea lalu iya nganti Perintah Allah Taala. ⁵² Iya mansang ngagai Pilatus, lalu minta bangkai Jesus. ⁵³ Iya nurunka bangkai Jesus, mungkus Iya ngena kain linin, lalu ngalika Iya dalam kubur ka udah ditebuk ba batu galang, lalu nadai udah kala dikena alai nguburka orang ⁵⁴ Nyadi hari nya Hari Nyendiaka Gawai, lalu hari Sabat nyau deka berengkah. ⁵⁵ Sida indu ke udah datai enggau Jesus ari Galili, nitihka Jusup lalu sida meda kubur nya, sereta meda cara bangkai Jesus digalika dalam kubur nya. ⁵⁶ Udah nya sida pulai, lalu nyendiaka rempah enggau minyak wangi. Lebuh hari Sabat, sida diau, nitihka pesan.