¹ Maya ngintu Gawai Roti Ti Enda Beragi, ka dikumbai Gawai Paska, nyau semak. ² Sida tuai imam enggau sida pengajar Adat begigaka jalai munuh Jesus, laban sida takutka orang mayuh. ³ Udah nya Sitan tama ngagai Judas, ke dikumbai Iskariot, siku ari sida ke dua belas. ⁴ Judas mupuk lalu berandau enggau sida tuai imam, enggau bala pemesai ke nyaga Rumah Sembiang, pasal jalai iya nyual Jesus ngagai sida. ⁵ Sida gaga amat ati, lalu besetuju deka meri iya duit. ⁶ Nya alai Judas besetuju, lalu belabuh begigaka peluang nyual Jesus ngagai sida, lebuh orang mayuh nadai dia. ⁷ Hari Gawai Roti Ti Enda Beragi pen nyau datai, alai anak domba Gawai Paska deka disayat. ⁸ Nya alai Jesus ngasuh Petrus seduai Johanes, ku Iya, “Alai seduai mupuk, lalu nyendiaka pemakai Gawai Paska ke kitai, ngambika kitai makai.” ⁹ Seduai iya lalu nanya, “Dini alai Nuan ngasuh kami duai nyendiaka nya?” ¹⁰ Disaut Jesus, “Dingaka tu: lebuh seduai tama ngagai nengeri, siku lelaki ke mai tepayan ai deka betemu enggau seduai. Titihka iya ngagai rumah ti alai iya tama, ¹¹ lalu sebut ngagai orang ke bempu rumah nya, ‘Pengajar nanya ngagai nuan, “Dini alai bilik temuai, alai Aku deka makai pemakai Gawai Paska enggau murid Aku?” ’ ¹² Iya deka madahka ngagai seduai siti bilik ti besai di sadau, ka udah dikemas. Sediaka semua utai dia ke kitai.” ¹³ Seduai iya mupuk, lalu nemu semua utai munyi ka udah dipadahka Jesus ngagai seduai iya. Seduai iya lalu nyendiaka pemakai Gawai Paska. ¹⁴ Lebuh jam nyau cukup, Iya lalu belatur duduk ba mija, sama enggau sida rasul. ¹⁵ Ku Iya bejaku ngagai sida, “Aku bisi amat ati deka makai pemakai Gawai Paska tu enggau kita sebedau Aku kena perinsa, ¹⁶ laban, Aku madah ngagai kita, Aku enda makai pemakai tu datai ke iya dikamatka dalam Perintah Allah Taala.” ¹⁷ Iya lalu ngambi mangkuk, lalu lebuh Iya udah meri terima kasih, Iya lalu bejaku, “Ambi tu, lalu bagi entara bala kita, ¹⁸ laban, Aku madah ngagai kita, belabuh ari diatu Aku enda ngirup anggur tu nyentuk ngagai maya Perintah Allah Taala datai.” ¹⁹ Iya lalu ngambi roti, lalu lebuh Iya udah meri terima kasih, Iya mecahka roti nya, lalu nyuaka nya ngagai sida, ku Iya, “Tu tubuh Aku, ka diberi ke kita. Kereja tu kena ngingatka Aku.” ²⁰ Baka nya mega, lebuh sida udah badu makai, Iya ngambi mangkuk, ku Iya, “Mangkuk tu ka dituang ke kita nya sempekat baru Allah Taala ka ditanggam ngena darah Aku. ²¹ Tang, peda kita! Orang ke nyual Aku bisi enggau Aku ba mija tu! ²² Laban Anak Mensia deka mati, nitihka atur Allah Taala, tang tulah orang ke nyual Iya!” ²³ Sida lalu belabuh betanya ngagai pangan diri, sapa ari bala sida ke deka ngereja nya. ²⁴ Sida murid mega bekelikuhka sapa ari bala sida ke tau dikumbai pemadu besai. ²⁵ Tang ku Iya bejaku ngagai sida, “Raja orang bansa bukai merintah orang ke dipegai sida, lalu orang ke megai kuasa atas sida ngumbai diri ‘Pangan Orang Mayuh’. ²⁶ Tang utai nya enda baka nya ba bala kita. Orang ke pemadu besai dalam bala kita enda tau enda nyadi baka orang ke pemadu biak, lalu orang ke nyadi kepala enda tau enda nyadi orang ke mela. ²⁷ Laban sapa ke besai agi? Iya ke duduk ba mija, tauka iya ke mela? Tentu orang ke duduk, ukai enda? Tang Aku begulai enggau kita nyadi orang ke mela. ²⁸ Kita udah begulai enggau Aku lebuh Aku natka semua pemerinsa Aku, ²⁹ lalu Aku meri kita kuasa merintah, baka Apai ka udah meri Aku kuasa kena merintah, ³⁰ ngambika kita ulih makai ngirup ba mija Aku dalam Perintah Aku, lalu kita deka duduk ba kerusi diraja, ngakim dua belas raban bansa orang Israel. ³¹ Simon, Simon! Dinga nuan! Sitan udah minta Aku ngemendarka iya ngayak semua kita baka ke ngayak gandum, ³² 3tang Aku udah besampika nuan Petrus, ngambika pengarap nuan kering, lalu lebuh nuan udah pulai baru ngagai Aku, keringka sida menyadi nuan.” ³³ Lalu ku Petrus bejaku ngagai Iya, “Tuhan, aku sedia deka ditutup dalam rumah jil lalu mati enggau Nuan!” ³⁴ Jesus lalu nyebut ngagai iya, “Aku madah ngagai nuan, Petrus, sebedau manuk mengkukuk sehari tu, nuan udah besangkalka Aku tiga kali.” ³⁵ Ku Jesus bejaku ngagai sida, “Lebuh Aku ngasuh kita bejalai, lalu enda nyagi kita mai kandi duit, tauka kambut, tauka selipar, kati kita bisi suntuk utai?” “Nadai,” ku sida nyaut. ³⁶ Ku Iya bejaku ngagai sida, “Tang diatu, barang sapa bisi kandi duit, enda tau enda mai kandi nya, lalu baka nya mega orang ke bisi kambut. Lalu orang ke nadai pedang, enda tau enda nyual kelambi iya, lalu meli pedang. ³⁷ Laban Aku madah ngagai kita, jaku ka disebut dalam Bup Kudus, ‘Iya deka begulai enggau orang ke jai,’ enda tau enda dikamatka ba Aku, laban utai ka ditulis pasal Aku endang benung dikamatka diatu.” ³⁸ Sida murid Iya lalu bejaku, “Peda Nuan, Tuhan! Tu dua bilah pedang!” Iya lalu nyaut, “Umbas meh nya.” ³⁹ Iya pansut lalu mupuk baka selama ngagai Bukit Kana, lalu sida murid nitihka Iya. ⁴⁰ Lebuh Iya datai ba endur nya, Iya lalu nyebut ngagai sida, “Besampi ngambika kita enda kena laban penguji.” ⁴¹ Iya lalu bejalai jauh mimit ari sida, kira sepenikau batu ari sida, besugang lalu besampi, ⁴² “Apai, enti Nuan deka, ambi mangkuk tu ari Aku; ukai nitihka peneka Aku, tang awakka peneka Nuan nyadi.” ⁴³ Udah nya siku melikat ari serega pegari di mua Iya, lalu ngeringka Iya. ⁴⁴ Enggau ati ti balat tusah, Iya bebendar agi besampi, datai ke peluh Iya nyau baka darah neritik ngagai tanah. ⁴⁵ Lebuh Iya angkat ari endur Iya ke besampi, Iya pulai ngagai sida murid Iya, lalu nemu sida tinduk, laban sida lelak laban ati ka kelalu balat tusah. ⁴⁶ Iya lalu bejaku ngagai sida, “Nama kebuah kita tinduk? Angkat, lalu besampi, ngambika kita enda kena laban penguji.” ⁴⁷ Lebuh Iya agi benung bejaku, bala orang lalu ngenyit datai, diuluka Judas, siku ari sida ke dua belas. Judas mansang ngagai Jesus, deka nyium Iya. ⁴⁸ Tang ku Jesus bejaku ngagai iya, “Judas, kati nuan nyual Anak Mensia ngena sium?” ⁴⁹ Lebuh sida murid ke sama enggau Jesus meda utai ka deka nyadi, sida lalu nanya, “Tuhan, kati kami tau mantap sida ngena pedang?” ⁵⁰ Siku ari bala sida lalu mantap ulun imam besai, mutuska pending kanan iya. ⁵¹ Tang ku Jesus bejaku, “Badu agi!” Iya lalu negu pending orang nya, lalu ngeraika iya. ⁵² yesus lalu bejaku ngagai sida tuai imam enggau bala polis ke nyaga Rumah Sembiang, enggau sida tuai bansa ke udah datai nangkap Iya, “Kati Aku tu penyamun alai kita datai mai pedang enggau pemalu?” ⁵³ Lebuh Aku begulai enggau kita tiap hari dalam Rumah Sembiang, kita enda nangkap Aku. Tang tu endang maya kita, maya kuasa pemetang merintah.” ⁵⁴ Sida lalu nangkap Jesus lalu mai Iya ari endur nya ngagai rumah imam besai. Tang Petrus nitih ari jauh. ⁵⁵ Lebuh sida udah nungkunka api ba tengah laman nya lalu duduk, Petrus mega duduk enggau sida. ⁵⁶ Siku indu ke ulun lalu tepedaka Petrus duduk nunga api. Iya lalu merening ngagai Petrus, lalu bejaku, “Orang tu pen udah meh enggau Iya!” ⁵⁷ Tang Petrus besangkalka nya, ku iya, “Indu, aku enda ngelala Iya!” ⁵⁸ Enda lama udah nya, siku agi orang meda Petrus lalu bejaku, “Nuan pen siku ari bala sida!” Tang ku Petrus nyaut, “Ukai!” ⁵⁹ Kira sejam udah bekau nya, siku agi orang bejaku, “Orang tu tetap udah enggau Jesus, laban iya orang Galili!” ⁶⁰ Tang ku Petrus nyaut, “Aku enda nemu utai ti ku nuan.” Tekala nya, lebuh Petrus agi benung bejaku, manuk mengkukuk. ⁶¹ Tuhan nguing lalu merening ngagai Peter. Petrus lalu ingatka jaku Tuhan, jalai Iya nyebut ngagai Petrus, “Sebedau manuk mengkukuk sehari tu, nuan udah besangkalka Aku tiga kali.” ⁶² Petrus pansut lalu duie-duie nyabak. ⁶³ Orang ke nyaga Jesus beduan Iya, lalu belabuh ngelese sereta malu Iya. ⁶⁴ Sida mega mampul mata Iya ngena kain, lalu majak nanya Iya, “Uji sangka! Sapa malu Nuan?” ⁶⁵ Sida majak nyebut mayuh macam utai bukai kena sida ngeleseka Iya. ⁶⁶ Lebuh hari nyau tawas, sida tuai bansa, tuai imam, enggau sida pengajar Adat begempuru, lalu sida mai Jesus ngagai Kunsil. ⁶⁷ Ku sida, “Padahka ngagai kami, enti Nuan tu Kristus?” Iya lalu nyaut, “Enti Aku madah ngagai kita, kita enggai arap, ⁶⁸ lalu enti Aku nanya kita, kita enggai nyaut. ⁶⁹ Tang belabuh ari diatu, Anak Mensia deka duduk muak ari kanan Allah Taala ka Bekuasa.” ⁷⁰ Semua sida lalu nanya, “Enti pia, kati Nuan tu Anak Allah Taala?” Lalu ku Iya bejaku ngagai sida, “Kita ngumbai Aku Anak Allah Taala.” ⁷¹ Sida lalu bejaku, “Kitai enda ibuh begunaka saksi bukai. Kitai empu udah ninga nya ari mulut Iya Empu!”