¹ Jesus malik lalu tepedaka bala orang ke kaya nepuka pemeri sida ngagai sarang wang Rumah Sembiang, ² lalu Iya mega tepedaka siku indu ke balu sereta seranta, nepuka dua singkap duit engkeraju. ³ Ku Jesus bejaku, “Enggau bendar Aku madah ngagai kita, indu ke balu sereta seranta tu udah meri mayuh agi ari semua sida nya; ⁴ laban semua sida meri ari laluh utai ka dikemisi sida, tang indu ke seranta tu udah meri semua utai ka dikena iya beridup.” ⁵ Lebuh sekeda murid benung berandauka pasal Rumah Sembiang, pasal Rumah nya ka dilagu ngena batu ka berega, sereta enggau piring ka dienjuk ngagai Allah Taala, Iya bejaku, ⁶ “Pasal utai tu ka dipeda kita, maya deka datai alai batu tu nadai agi betusun baka tu; semua deka diruntuhka magang.” ⁷ Sida lalu nanya Iya, “Pengajar, kemaya utai nya deka nyadi, lalu nama tanda ti nunjukka utai nya deka nyadi?” ⁸ Ku Iya bejaku, “Bejaga, enggai ke orang nesatka kita; laban mayuh orang deka datai dalam nama Aku, lalu nyebut, ‘Aku tu meh Iya!’ enggau, ‘Maya nyau semak!’ Anang nitihka sida. ⁹ Lebuh kita ninga pasal perang enggau pasal pengacau ngelaban perintah nyadi, anang takut; laban utai nya endang enda tau enda dulu nyadi, tang pengujung enda datai tekala nya.” ¹⁰ Iya lalu bejaku ngagai sida, “Bansa deka beperang ngelaban bansa bukai, lalu menua deka beperang ngelaban menua bukai. ¹¹ Tanah berenyang deka balat nyadi, lalu lapar pungkang, enggau penyakit deka balat nyadi ba mayuh bengkah endur; lalu tanda ka balat ngenakutka sereta nyelai deka pegari ari langit. ¹² deka nyerahka kita ngambika kita kena pecara dalam balai gempuru, lalu ditutup dalam rumah jil, lalu kita deka dibai ngagai raja enggau gabenor ketegal nama Aku. ¹³ Tu deka meri kita peluang besaksi. ¹⁴ Nya alai kita enda tau enda mutuska runding enggai dulu berundingka jalai kita deka nyaut, ¹⁵ laban Aku deka meri kita jaku enggau penemu-dalam ka enda ulih disaut tauka disakal munsuh kita. ¹⁶ Kita deka diserahka ulih apai indai kita, menyadi lelaki kita, kaban belayan kita, enggau pangan kita, lalu sekeda kita deka dibunuh sida. ¹⁷ Kita deka dipegedika semua orang ketegal nama Aku. ¹⁸ Tang selambar pen nadai meh buk kita deka lenyau. ¹⁹ Ulih ati ti tan kita deka diselamatka. ²⁰ Lebuh kita meda Jerusalem dikelulung bala soldadu, nya baru kita deka nemu nengeri nya deka dirusak enda lama da agi. ²¹ Lebuh maya nya, orang ke diau di Judea enda tau enda rari ngagai bukit. Lalu orang ke di nengeri enda tau enda angkat ari nengeri nya, lalu orang ke di menua pesisir enda tau tama ngagai nengeri; ²² laban nya ‘Hari Bebalas,’ kena ngamatka semua utai ti udah ditulis. ²³ Naka meh penusah indu ke ngandung, enggau indu ke nusuka anak lebuh maya nya! Laban penusah ti besai deka ninggang dunya, lalu pengeringat Allah Taala deka ninggang bansa tu. ²⁴ Sida deka dibunuh ngena pedang, lalu sekeda deka ditabanka nyadi orang tangkap ngagai semua menua, lalu Jerusalem deka dilunjak orang bansa bukai, nyentuk ngagai maya timpuh orang bansa bukai udah abis. ²⁵ Tanda deka pegari ba mata hari, ba bulan enggau ba bintang, lalu semua bansa di dunya deka tusah sereta irau ninga pemalat munyi segum tasik enggau pangka gelumbang. ²⁶ Orang deka luput laban takut, irauka utai ka deka ninggang dunya, laban kuasa ka di langit deka begegar. ²⁷ Udah nya baru sida deka meda Anak Mensia datai dalam remang ngena kuasa enggau mulia ti besai. ²⁸ Lebuh utai tu belabuh nyadi, bediri lalu angkatka pala kita, laban pengelepas kita nyau semak.” ²⁹ Udah nya Iya lalu madahka siti sempama ngagai sida, “Peratika kayu ara enggau semua kayu bukai. ³⁰ Lebuh daun sida belabuh bekantuk, kita empu ulih meda sereta nemu musin panas nyau semak. ³¹ Baka nya mega, lebuh kita meda utai tu nyadi, kita deka nemu Perintah Allah Taala nyau semak. ³² Enggau bendar Aku madah ngagai kita, rebak tu apin mati sebedau semua utai tu nyadi. ³³ Langit enggau dunya deka lenyau, tang jaku Aku enda lenyau. ³⁴ Tang bejaga kita, ngambika kita enda gian ngirup, lalu mabuk, lalu selalu irauka pengidup, enggai ke kita enda ngadang lebuh Hari nya ngenyit datai, ³⁵ baka panjuk ka nyintak, laban Hari nya deka datai ngagai semua orang ke diau di serata dunya. ³⁶ Bejaga berari, besampi minta diri kering rari ari semua utai ka deka nyadi, lalu bediri di mua Anak Mensia.” ³⁷ Iya ngajar tiap hari dalam Rumah Sembiang, lalu lebuh malam hari Iya pansut ari nengeri lalu bemalam ba Bukit Kana. ³⁸ Semua orang dani tumu pagi lalu mendingka Iya dalam Rumah Sembiang.