¹ Nyadi sekali, lebuh Jesus benung ngajar orang mayuh dalam Rumah Sembiang sereta nusui Berita Manah, sida tuai imam enggau sida pengajar Adat enggau bala tuai orang Yahudi, datai ² lalu bejaku ngagai Iya, “Padahka ngagai kami, nama kuasa ti dikena Nuan ngereja utai tu? Sapa meri Nuan kuasa nya?” ³ Iya lalu nyaut sida, “Aku deka nanya kita siti tanya. Padahka ngagai Aku, ⁴ Kati baptisa Johanes datai ari serega tauka ari mensia?” ⁵ Sida lalu belabuh berandauka nya enggau pangan diri. Ku sida, “Enti kitai nyebut, ‘Ari serega,’ Iya deka nyebut, ‘Nama kebuah kita enda arapka iya?’ ⁶ Tang enti kitai nyebut, ‘Ari mensia,’ semua orang deka nuku kitai ngena batu, laban sida arapka Johanes nya nabi.” ⁷ Nya alai sida lalu nyaut madahka diri enda nemu penatai baptisa nya. ⁸ Jesus lalu bejaku ngagai sida, “Aku pen enggai meh madah ngagai kita kuasa ka dikena Aku ngereja utai tu.” ⁹ Iya lalu belabuh madahka sempama tu ngagai orang mayuh: “Orang siku numbuhka sebidang kebun anggur. Iya ngasuh orang nyua kebun nya, lalu udah nya iya pegi lama amat ngagai menua bukai. ¹⁰ Lebuh maya ngetau buah anggur, Iya ngasuh siku ari bala ulun iya mansang ngagai orang ke nyua kebun nya, deka ngambi ungkup iya ari buah anggur nya. Tang bala orang ke nyua kebun nya malu ulun nya, lalu ngasuh iya pulai puang. ¹¹ Iya lalu ngirumka siku agi ulun. Tang iya mega dipalu sereta dikeleseka sida, lalu diburu sida pulai puang. ¹² Iya lalu ngirumka ulun ka ketiga. Sida ngemakalka iya, lalu muai iya ari kebun nya. ¹³ dikereja aku? Aku deka ngirumka anak tunggal aku. Nyangka sida deka bebasaka iya.’ ¹⁴ Tang lebuh bala orang ke nyua kebun nya meda anak tunggal iya nya, sida lalu berandauka nya enggau pangan diri, ku sida, ‘Tu orang ke bempu waris. Aram kitai munuh iya, ngambika pesaka tu diempu kitai!’ ¹⁵ Sida lalu muai iya ari kebun anggur nya, lalu munuh iya. Nama utai ka deka dikereja orang ke bempu kebun anggur nya ngagai bala orang ke nyua? ¹⁶ Iya deka datai lalu munuh sida lalu nyerahka kebun nya ngagai orang bukai.” ¹⁷ Tang Jesus merening ngagai sida, lalu bejaku, “Enti pia, nama reti jaku ti ditulis tu: ‘Batu ka ditulak tukang rumah udah nyadi batu ka pemadu beguna.’ ¹⁸ Genap iku orang ke labuh ninggang batu nya, deka redak, lalu batu tu deka ngeredakka orang ke ditinggang iya.” ¹⁹ Lebuh sida pengajar Adat enggau sida tuai imam nemu Iya udah nyebut jaku sempama nya kena Iya ngelaban sida, sida nguji nangkap Iya tekala nya, tang sida takutka orang mayuh. Tanya Pasal Mayar Cukai (Mathius 22.15-22; Markus 12.13-17) ²⁰ Nya alai sida nengkilaka Iya, lalu ngirumka bala pematau, ka pura-pura ngaga diri baka ke manah ati, ngambika sida ulih nangkap Iya ketegal utai ka disebut Iya, lalu nyerahka Iya ngagai tuan gabenor. ²¹ Nya alai sida nanya Iya, “Pengajar, kami nemu Nuan endang nyebut sereta ngajar utai ka ngena, lalu Nuan enda bedulika orang, tang ngajar utai ka bendar pasal jalai Allah Taala. ²² Kati kitai tau mayar cukai ngagai Raja Besai, tauka enda?” ²³ Tang Iya nemu akal sida, lalu ku Iya bejaku ngagai sida, ²⁴ “Pandangka sesingkap duit ngagai Aku. Gambar sapa enggau nama sapa tu?” Sida lalu nyaut, “Enggi Raja Besai.” ²⁵ Ku Iya bejaku ngagai sida, “Enti pia, utai Raja Besai, beri ngagai Raja Besai, utai Allah Taala, beri ngagai Allah Taala.” ²⁶ Sida lalu enda ulih manjuk Iya ngena utai ka disebut Iya di mua orang mayuh. Sida balat alit ati ke saut Iya, lalu sida enda bemunyi. ²⁷ Udah nya sekeda orang Saduki datai ngagai Iya. Nyadi orang Saduki enda arapka pengangkat ari mati. ²⁸ Sida lalu nanya Iya, “Pengajar, Musa nulis ke kitai, enti laki mati ninggalka bini, tang nadai ninggalka anak, menyadi lelaki iya enda tau enda jadi enggau balu nya, ngambika seduai iya bisi anak ngarika menyadi iya ke udah mati. ²⁹ Nyadi sekali bisi tujuh iku lelaki diri menyadi. Iya ke tuai bebini, lalu mati, nadai anak. ³⁰ Menyadi ke lumur dua ³¹ enggau ke lumur tiga jadi enggau indu nya, lalu baka nya mega semua tujuh iku sida bela mati nadai anak. ³² Ke pengujung iya, indu nya mega mati. ³³ Lebuh pengangkat orang ari mati, sapa bempu bini nya? Laban semua sida tujuh bela udah ampit jadi enggau iya.” ³⁴ Jesus lalu bejaku ngagai sida, “Orang ke rebak diatu jadi enggau pangan diri, lalu nikah, ³⁵ tang orang ke dikira patut diau ba dunya ka jemah ila, sereta patut angkat ari mati, enda jadi melaki-bini tauka nikah. ³⁶ Iya ka bendar sida enda ulih mati agi, laban sida baka melikat lalu nyadi anak Allah Taala, laban sida udah diangkatka ari mati. ³⁷ Nyadi pasal pengangkat orang ari mati, indah Musa deh bisi nunjukka dalam cerita pasal babas ka laban api, ngumbai Tuhan nya Allah Taala Abraham, Isak, enggau Jakop. ³⁸ Allah Taala ukai Allah Taala ke orang ke mati, tang ke orang ke idup, laban ba Allah Taala semua orang idup magang.” ³⁹ Sekeda sida pengajar Adat lalu nyaut, “Manah saut Nuan, Pengajar!” ⁴⁰ Laban sida nadai berani nanya iya agi. ⁴¹ lalu bejaku ngagai sida, “Baka ni ku orang ngumbai Kristus peturun Daud? ⁴² Laban Daud empu nyebut dalam bup Masmur, ‘Ku Tuhan bejaku enggau Tuhan aku: Duduk Nuan muak ari kanan Aku, ⁴³ datai ke Aku udah ngaga munsuh Nuan nyadika pelasar kaki Nuan.’ ⁴⁴ Daud ngumbai Iya Tuhan; nya alai baka ni ku Kristus tau nyadi peturun iya?” ⁴⁵ Iya lalu bejaku ngagai sida murid Iya di mua orang mayuh, ⁴⁶ “Bejaga ari sida pengajar Adat, ke rindu bejalai ngena baju ti panjai, lalu rindu ditabi orang ba sebelah pasar lalu milih penuduk ka pemadu manah dalam balai gempuru enggau ba pengerami makai besai. ⁴⁷ Sida ngambi ulih ba indu ke balu lalu ngerampas rumah sida, lalu pura-pura lama besampi! Sida deka nerima ukum ka besai agi!”