¹ 1Lalu ku Iya bejaku ngagai sida murid Iya, “Utai ka ngasuh orang bedosa endang deka datai, tang tulah orang ke ngasuh dosa nya datai! ² Manah agi enti batu kisar ditancangka ba rekung iya, lalu iya dibuai ngagai tasik, ari ke nejuka iya ngasuh siku ari orang ke pemadu mit tu bedosa. ³ Bejaga kita! “Enti menyadi nuan bedosa, rara iya, lalu enti iya nesal ati, ampun iya. ⁴ Lalu enti iya bedosa ngelaban nuan tujuh kali dalam sehari, lalu datai ngagai nuan tujuh kali, lalu iya nyebut, ‘Aku nesal ati ke penyalah aku,’ nuan enda tau enda ngampun iya.” ⁵ Ku bala rasul bejaku ngagai Tuhan, “Tambahka pengarap kami.” ⁶ Tuhan lalu nyaut, “Enti kita bisi pengarap ngemesai igi ensabi, kita ulih bejaku ngagai kayu tu, ‘Awakka nuan dicabut, lalu ditanam ba tasik!’ iya deka ngasika kita. ⁷ Sapa ari bala kita deka bejaku ngagai ulun iya ke baru pulai ngeradu tanah tauka ngibun bedus, ‘Datai kitu enggau jampat lalu duduk makai’? ⁸ Enda ka kita deka bejaku ngagai ulun iya, ‘Sediaka pemakai ke aku. Rasukka pekayan nuan, lalu intu aku lebuh aku makai ngirup. Udah nya baru nuan tau makai’? ⁹ Kati nuan meri terima kasih ngagai ulun nya ketegal iya udah ngereja pengawa iya? ¹⁰ Kita pen baka nya mega. Lebuh kita udah ngereja semua utai ka diasuh kereja kita, sebut, ‘Kami tu ulun ke nadai guna. Kami semina udah ngereja pengawa ka patut dikereja kami.’ ” ¹¹ Lebuh Jesus benung majakka pejalai Iya ngagai Jerusalem, Iya bejalai nengah menua entara menua Samaria enggau menua Galili. ¹² 1Lebuh Iya tama ngagai sebuah genturung pendiau, sepuluh iku orang ke sakit lan mansang ngagai Iya. Sida bediri ari jauh ¹³ lalu ngangau enggau nyawa ka inggar. Ku sida, “Jesus! Pengajar! Kasihka kami!” ¹⁴ Lebuh Iya tepedaka sida, Iya lalu bejaku ngagai sida, “Mupuk kita, lalu asuh sida imam meresa kita.” Lebuh sida benung di rantau jalai, sida lalu nyadi tuci. ¹⁵ Lebuh siku ari bala sida meda diri udah gerai, iya nikal, lalu muji Allah Taala enggau nyawa ka inggar. ¹⁶ Iya nyungkurka diri di kaki Jesus, lalu meri terima kasih ngagai Iya. Lelaki nya orang Samaria. ¹⁷ Jesus lalu nanya, “Ukai enda sepuluh iku digeraika? Kini ke tunga sida ke semilan iku? ¹⁸ Kati sida nadai nikal kitu lalu muji Allah Taala, kelimpah ari orang kampar tu?” ¹⁹ Iya lalu bejaku ngagai orang Samaria nya, “Angkat nuan, lalu mupuk. Pengarap nuan udah ngeraika nuan.” ²⁰ Nyadi sekali orang Parisi nanyaka kemaya Perintah Allah Taala deka datai. Iya lalu nyaut sida, “Perintah Allah Taala ukai datai ngena tanda ka ulih dipeda. ²¹ Lalu nadai mega orang nyebut, ‘Peda kita! Tu iya ditu!’ tauka, ‘Nyin iya!’, laban iya ka bendar Perintah Allah Taala bisi ba tengah-tengah kita.” ²² Iya lalu bejaku ngagai sida murid, “Maya deka datai alai kita keran deka meda siti ari hari Anak Mensia, tang kita enda ulih meda hari nya. ²³ Orang deka nyebut ngagai kita, ‘Peda kita! Nyin iya!’ tauka, ‘Tu iya!’ Anang kita kia lalu anang nitihka sida. ²⁴ Laban baka kilat ti nyelar, lalu langit terang ari tisi siti ngagai tisi siti, baka nya meh gaya Anak Mensia lebuh hari Iya ila. ²⁵ Tang Iya enda tau enda dulu natka mayuh macam pemerinsa, lalu ditulak orang ke rebak diatu. ²⁶ Baka lebuh maya Noh menya, baka nya mega utai deka nyadi lebuh hari Anak Mensia ila. ²⁷ Semua orang majak makai ngirup, jadi melaki-bini, nikah, nyentuk ngagai hari Noah tama ke dalam bandung, lalu ai bah datai lalu ngerusak semua sida. ²⁸ Baka lebuh maya Lot menya. Semua orang majak makai ngirup, bebeli bejual, betanam sereta begagaka utai, ²⁹ tang lebuh Lot ninggalka nengeri Sodom, api enggau merirang lalu labuh ari langit lalu ngerusak semua sida. ³⁰ Nya meh gaya utai ka deka nyadi ba hari Anak Mensia dipandangka. ³¹ Ba hari nya ila, orang ke ba atas perabung enda tau nurun lalu ngambi utai diri. Baka nya mega orang ke di umai: sida enda tau pulai ke rumah. ³² Kingatka bini Lot! ³³ Barang sapa deka ngidupka nyawa diri, deka ngelenyauka iya, tang barang sapa ngelenyauka nyawa diri, deka ngidupka iya. ³⁴ Aku madah ngagai kita, lebuh malam nya, dua iku orang deka begulai tinduk. Siku deka ditabanka, lalu siku ditinggalka. ³⁵ Dua iku indu deka begulai ngisar. Siku deka ditabanka, lalu siku deka ditinggalka.” ³⁶ Dua iku orang gawa di umai. Siku deka ditabanka, lalu siku deka ditinggalka. ³⁷ Sida murid Iya lalu nanya Iya, “Dini, Tuhan?” Disaut Jesus, “Dia alai bangkai, dia meh endur alai burung ka bepakaika bangkai deka begempuru.”