¹ Jesus lalu bejaku enggau sida murid Iya, “Siku orang kaya bisi siku pemesai ke ngemataka reta iya. Orang bisi bejaku madahka pemesai nya masau duit tuan iya. ² Orang kaya nya lalu ngangauka pemesai nya, lalu bejaku ngagai iya, ‘Nama utai tu ka didinga aku pasal nuan? Padahka ngagai aku jalai nuan udah ngemataka reta tengkira aku, laban nuan enda tau agi ngemataka reta tengkira aku.’ ³ Pemesai nya lalu bejaku dalam ati diri, ‘Tuan aku deka muai aku ari pengawa. Nama utai ka patut dikereja aku? Aku enda kering nyangkul, lalu aku malu minta sedekah. ⁴ Tu utai ka deka dikereja aku, ngambika lebuh aku dibuai ari pengawa, orang deka ngelaluka aku ngagai rumah sida.’ ⁵ Nya alai iya ngangauka siku-siku orang ke berutang ba tuan iya. Iya lalu bejaku enggau orang ke terubah datai, ‘Berapa utang nuan ba tuan aku?’ ⁶ Orang nya lalu nyaut, ‘Seratus tung minyak kana.’ Lalu ku pemesai nya bejaku ngagai iya, ‘Ambi surat utang nuan tu, duduk, lalu tuliska lima puluh.’ ⁷ Udah nya pemesai nya nanya siku ti bukai, ‘Berapa pemayuh utang nuan?’ Orang nya lalu nyaut, ‘Seribu pikul gandum.’ Pemesai nya lalu bejaku, ‘Ambi surat utang nuan tu, lalu tuliska lapan ratus.’ ⁸ Tuan iya lalu muji pemesai ke enda betul ati nya ketegal pemintar iya ngereja utai, laban orang dunya tu pintar agi ngatur utai ka mai penguntung ngagai sida empu ari nembiak penampak. ⁹ Lalu Aku madah ngagai kita, gaga orang nyadika pangan kita ngena pengaya dunya, ngambika lebuh utai nya udah abis, kita deka diterima ke dalam rumah ka meruan belama iya. ¹⁰ Barang sapa tau dikarapka ngemataka utai ka mimit, tau mega dikarapka ngemataka mayuh utai, lalu orang ke enda tau dikarapka ngemataka pekara ka mit, enda mega tau dikarapka ngemataka pekara ka besai. ¹¹ Nya alai, enti kita enda tau dikarapka ngemataka pengaya dunya, sapa deka ngarapka kita ngemataka pengaya ka bendar? ¹² Lalu enti kita enda tau dikarapka ngemataka utai orang bukai, sapa deka meri kita utai ka endang enggi kita? ¹³ Nadai orang ulih betuaika dua iku tuan, laban iya deka begedika siku lalu rinduka siku, tauka angkunka siku, lalu mecat siku. Kita enda ulih betuaika Allah Taala enggau duit.” ¹⁴ Lebuh orang Parisi, ke angkunka duit, ninga semua utai nya, sida lalu ngeleseka Jesus. ¹⁵ Nya alai Iya lalu bejaku ngagai sida, “Kita tu orang ke belurus diri empu di mua orang mayuh, tang Allah Taala nemu ati kita; laban utai ka dikangkunka mensia, nya utai ka dipegedika Allah Taala. ¹⁶ Adat enggau jaku ti ditulis sida nabi mengkang dikena nyentuk ngagai maya Johanes. Tang berengkah ari maya Johanes, Berita Manah pasal Perintah Allah Taala dipadahka ngagai orang mayuh, lalu semua orang bela majakka diri tama ngagai Perintah nya. ¹⁷ Tang mudah agi serega enggau dunya lesap, ari siti titik dalam Adat tu lenyau. ¹⁸ Barang sapa muai bini, lalu jadi enggau indu bukai, butang. Lalu lelaki ke jadi enggau indu ke udah dibuai laki, butang. ¹⁹ Nyadi dia bisi siku orang kaya. Iya bekenaka pekayan ka berega, lalu diau makai nyamai tiap hari. ²⁰ Lalu ba mua pintu orang nya bisi siku orang ke seranta, ke abis dibalut rumbak. Nama iya Lasarus. ²¹ Lasarus bisi amat ati deka makai pemakai ka labuh ari mija orang kaya nya. Indah ukui deh datai lalu nilat rumbak iya. ²² Orang ke seranta nya mati, lalu dibai bala melikat ngambika iya diau enggau Abraham. Orang kaya nya mega mati, lalu dikuburka. ²³ Di dunya pemati, alai iya ke balat kena perinsa, iya engkadah lalu tepedaka ari jauh Abraham duduk ngimbai Lasarus. ²⁴ Orang kaya nya lalu ngangau, ‘Apai Abraham! Kasihka aku, lalu asuh Lasarus datai kitu ngambika iya nyepuhka ujung tunjuk iya ngagai ai, lalu ngenyelapka dilah aku, laban aku pedis amat merinsa dalam api tu!’ ²⁵ Tang ku Abraham bejaku, ‘Ingat, anak, lebuh nuan agi idup, nuan diberi semua utai ka manah, tang Lasarus diberi semua utai ka jai. Tang diatu iya lantang diau ditu, tang nuan pedis merinsa. ²⁶ Nambahka nya, ba entara kitai bisi siti darung ka dalam, ngambika orang ke deka meraka ari tu ngagai kita, enda ulih, lalu orang ke deka meraka ari endur kita ngagai kami, pen enda mega ulih.’ ²⁷ Ku orang kaya nya bejaku, ‘Enti pia, apai, aku minta nuan ngirumka Lasarus ngagai rumah apai aku, ²⁸ laban aku bisi lima iku menyadi lelaki, ngambika iya meri jaku tangkan ngagai sida, enggai ke sida datai ba endur pemerinsa tu.’ ²⁹ Abraham lalu nyaut, ‘Sida bisi Musa enggau sida nabi. Awakka bala menyadi nuan patut mendingka sida.’ ³⁰ Ku orang kaya nya bejaku, ‘Ukai baka nya, apai Abraham! Enti siku orang ke angkat ari mati mansang ngagai sida, nya baru sida deka nesal ati ke dosa sida.’ ³¹ Tang ku Abraham, ‘Enti sida enggai mendingka Musa enggau sida nabi, sida pen enggai mega arap enti orang siku angkat ari mati.’ ”