¹ Nyadi sekali Jesus besampi ba endur siti. Lebuh Iya udah badu besampi, siku ari sida murid Iya lalu bejaku ngagai Iya, “Tuhan, ajar kami besampi, baka Johanes ke ngajar bala murid iya.” ² Jesus lalu bejaku ngagai sida, “Lebuh kita besampi, sebut: ‘Apai: Kudus meh nama Nuan; Datai meh Perintah Nuan. ³ Beri ngagai kami sehari tu pemakai umbas dipakai kami. ⁴ Ampun kami dosa kami, laban kami ke ngampun orang ke salah ngelaban kami. Lalu anang mai kami ngagai penguji.’ ” ⁵ Lalu ku Iya bejaku ngagai sida, “Enti sema siku ari kita bisi siku pangan, lalu iya mansang ngagai pangan iya nya ba urung tengah malam lalu bejaku ngagai iya, ‘O wai, jali aku tiga iti tuku roti, ⁶ laban pangan aku ke pegi udah datai lalu aku nadai utai kena aku meri iya makai!’ ⁷ Lalu pangan iya nya deka nyaut ari dalam, ‘Anang ngiruh aku! Pintu udah dikunci, lalu kami menyanak udah beterenah tinduk. Aku enda ulih angkat meri nuan utai.’ ⁸ Aku madah ngagai kita, taja pen iya enggai angkat lalu meri pangan iya utai, tang laban iya endang pangan iya, lalu laban pangan iya ituk minta, iya deka angkat lalu meri pangan iya utai ti dipeguna iya. ⁹ Nya alai Aku madah ngagai kita: Pinta, lalu kita deka nerima; giga, lalu kita deka nemu; tekung, lalu pintu deka dibuka ke kita. ¹⁰ Laban genap iku orang ke minta, deka nerima, lalu orang ke ngiga deka tetemu, lalu ke orang ke nekung, pintu nya deka dibuka ke sida ¹¹ Kati kita ke apai, meri anak kita batu, enti iya minta roti? Tauka meri iya ular, enti iya minta ikan? ¹² Tauka, meri iya kala, enti iya minta telu? ¹³ Enti kita ke jai, nemu meri utai ka manah ngagai anak kita, Apai kita ka di serega tentu lebih agi nemu meri Roh Kudus ngagai orang ke minta ari Iya!” ¹⁴ Nyadi sekali Jesus muru antu bisu. Lebuh antu nya udah pansut, orang ke bisu nya lalu belabuh bejaku. Orang mayuh lalu balat alit ati. ¹⁵ Tang ku sekeda sida bejaku, “Iya muru antu ngena kuasa Belsebup, ka raja antu.” ¹⁶ Sida ka bukai majak minta Iya ngayanka tanda ari serega, kena sida nguji Iya. ¹⁷ Tang Jesus nemu peragam ati sida, lalu ku Iya bejaku ngagai sida, “Semua perintah ti bepechah-belah lalu beripih ngelaban diri empu, deka rusak, lalu ruang bilik ti bepecah-belah, deka alah. ¹⁸ Enti Sitan bepecah-belah lalu ngelaban diri empu, baka ni ku perintah nya ulih tan? Laban kita ngumbai Aku muru antu ngena kuasa Belsebup. ¹⁹ Enti Aku muru antu ngena kuasa Belsebup, ngena kuasa sapa murid kita muru antu? Nya alai sida empu deka nyadi hakim kita. ²⁰ Tang enti Aku muru antu ngena kuasa Allah Taala, nya nunjukka Perintah Allah Taala udah datai ba kita. ²¹ Lebuh orang ke kering, ke cukup disikap enggau senyata, nyaga rumah iya, semua reta tengkira iya likun magang. ²² Tang lebuh orang ke kering agi ari iya, nyerang lalu ngalahka iya, orang nya deka ngerampas senyata ti dikarapka iya, lalu magi perapasan iya. ²³ Barang sapa enda setanah enggau Aku, ngelaban Aku, lalu barang sapa enda enggau Aku ngempuru, mambar. ²⁴ Lebuh roh ka jai udah pansut ari orang, iya bejalai segau-segau nengah menua ka rangkai, ngiga endur alai belelak. Lebuh iya nadai tetemuka endur nya, iya lalu bejaku, ‘Aku deka pulai baru ngagai rumah aku ka udah ditinggalka aku.’ ²⁵ Lebuh iya datai, iya nemu rumah nya udah disapu sereta dikemas. ²⁶ Iya lalu pansut, lalu mai tujuh iku roh ka bukai ka lebih jai agi ari iya empu. Sida tama lalu diau dia, lalu ke pengujung iya, pendiau orang nya jai agi ari ka dulu.” ²⁷ Lebuh Jesus benung nyebut nya, siku indu lalu bejaku enggau nyawa ti inggar ngagai Jesus ari tekang bala mayuh, “Beberekat meh indu ke udah ngandungka Nuan, enggau tusu ti udah nusuka Nuan!” ²⁸ Tang ku Jesus nyaut, “Beberekat agi orang ke ninga lalu ngasika jaku Allah Taala!” Tanda Jonah ²⁹ Lebuh orang nyau majak mayuh-semayuh, Jesus lalu belabuh bejaku, “Orang ke rebak diatu endang amat jai. Sida minta tanda, tang nadai tanda deka diberi ngagai sida, kelimpah ari tanda Jonah. ³⁰ Laban baka Jonah ke nyadika tanda ke orang Nineweh, baka nya meh Anak Mensia deka nyadika tanda ke orang ke rebak diatu. ³¹ Lebuh Hari Pecara ila, kuin ari menua ka di Selatan deka bediri sama enggau orang ke rebak diatu, lalu besalah sida, laban iya udah datai ari tisi dunya deka mendingka penemu-dalam Solomon. Tang peda, utai ka besai agi ari Solomon bisi ditu diatu. ³² Lebuh Hari Pecara ila orang Nineweh deka bediri sama enggau rebak ka diatu, lalu besalah sida, laban orang Nineweh empu udah nesal ati ke dosa sida, lebuh sida mendingka jaku ka dipadahka Junus. Tang peda, utai ka besai agi ari Junus bisi ditu diatu! ³³ Nadai orang nungkun lampu, lalu ngerungkup iya ngena bisin; tang ngengkahka lampu nya ba penuduk lampu, ngambika orang ke tama ulih meda penampak nya. ³⁴ Mata kita nyadika lampu tubuh kita. Enti mata kita menyana, semua tubuh kita penuh laban penampak. Tang enti mata kita enda menyana, tubuh kita penuh laban pemetang. ³⁵ Nya alai, kita enda tau enda nentuka penampak ka dalam kita nya ukai pemetang. ³⁶ Enti semua tubuh kita penuh laban penampak, lalu nadai siti perengka dibalut pemetang, tubuh nya deka tampak semua, baka lebuh lampu ka mancar ngagai kita lalu meri kita penampak.” ³⁷ Lebuh Jesus udah tembu bejaku, siku orang Parisi lalu mai Iya makai. Nya alai Jesus tama lalu duduk ngimbai mija makai. ³⁸ Orang Parisi nya balat alit ati meda Jesus enda masu jari dulu sebedau Iya makai. ³⁹ Tuhan lalu bejaku ngagai iya, “Kita orang Parisi nuci mangkuk enggau capak kita ari luar aja, tang dalam nyin kita penuh laban pengamu enggau penyai. ⁴⁰ Kita tu beli! Kati Allah Taala ka ngaga utai ti di luar, enda mega ngaga utai ka di dalam? ⁴¹ Nya alai beri utai ka dalam mangkuk kita nyadika sedekah ngagai orang ke seranta, nya baru semua utai deka nyadi tuci ke kita. ⁴² Tang tulah meh kita orang Parisi! Kita meri sepuluh peratus ari rempah kita, baka telasih, daun rempah, enggau semua macam rempah ka bukai, tang kita enggai ngereja pengelurus, enggau pengerindu Allah Taala. Nya utai ka patut dikereja kita, tang anang nejuka utai bukai nya enda dikereja. ⁴³ Tulah meh kita orang Parisi! Laban kita rindu duduk ba penuduk ka pemadu manah dalam balai gempuru, lalu rindu ditabi orang ba sebelah pasar. ⁴⁴ Tulah meh kita! Laban kita tu baka kubur ka enda dikelai, lalu kena lunjak orang, lalu sida enda nemu diri udah ngelunjak nya.” ⁴⁵ Siku pengajar adat lalu nyaut Iya, “Pengajar, lebuh Nuan nyebut nya, Nuan mega ngeleseka kami!” ⁴⁶ Lalu ku Jesus bejaku, “Tulah meh kita pengajar Adat! Laban kita ngengkahka ma ka mar dibai ba orang, tang kita empu enggai encukirka tunjuk nulung sida mai ma nya. ⁴⁷ Tulah meh kita! Kita ngaga kubur ke sida nabi ke udah dibunuh aki ini kita. ⁴⁸ Nya alai kita empu besaksi sereta besetujuka utai ka udah dikereja aki ini kita. Laban aki ini kita udah munuh sida nabi, lalu kita empu ngaga kubur ke sida. ⁴⁹ Nya alai Penemu-dalam Allah Taala mega nyebut, ‘Aku deka ngirumka bala nabi enggau rasul ngagai sida. Sekeda deka diperinsaka sida lalu dibunuh,” ⁵⁰ ngambika rebak ka diatu betanggungjawap ke darah semua sida nabi ke udah dibunuh kenyau ari penumbuh dunya, ⁵¹ berengkah ari darah Abel, nyentuk ngagai darah Sekariah ke dibunuh ba entara alta enggau langkau sembiang. Enggau bendar Aku madah ngagai kita, rebak ka diatu deka betanggungjawap ke semua utai nya! ⁵² Tulah meh kita pengajar adat! Laban kita udah naruh kunci penemu. Kita empu enda tama, lalu kita mempang jalai orang ke deka tama!” ⁵³ Lebuh Jesus angkat ari endur nya, sida pengajar Adat enggau orang Parisi balat amat deka ngelaban Iya lalu deka nanya Iya pasal mayuh macam utai, ⁵⁴ nganti Iya tesebutka jaku ka tau dikena besalah Iya.