¹ 1Tabi Teopilus: Laban mayuh orang udah nguji ngena jalai ka betusun nuliska cerita pasal utai ka udah nyadi ba bala kami, ² nitihka cerita ka udah ditusui ngagai kami ulih orang ke meda utai nya nyadi kenyau ari pun, lalu udah nusui pesan nya, ³ nya alai, lebuh aku udah enggau bejimat mansik semua utai nya kenyau ari pun, aku mega berunding deka nuliska utai nya ngena cara ka betusun, ke nuan, Tuan ka dipebasaka, ⁴ ngambika nuan nemu utai ka bendar pasal semua utai ka udah diajar ngagai nuan. ⁵ Lebuh Herodes nyadi raja di menua Judea, bisi siku imam benama Sekariah. Iya peturun Imam Abijah. Bini iya peturun Aron, lalu nama iya Elisabet. ⁶ Seduai iya sama lurus di mua Allah Taala, ngasika semua pesan enggau adat Tuhan. ⁷ Tang seduai iya nadai anak, laban Elisabet mandul, lalu seduai iya pen nyau tuai amat umur. ⁸ Nyadi sekali, lebuh Sekariah benung bekereja nyadi imam di mua Allah Taala, lebuh raban iya bekereja dalam Rumah Sembiang sehari nya, ⁹ iya kena pilih ngena cara becabut undi, nitihka adat asal sida imam, lalu iya tama ngagai Rumah Sembiang Tuhan lalu nunu menyan. ¹⁰ Lebuh maya menyan benung ditunu, semua orang mayuh besampi di luar. ¹¹ Siku melikat Tuhan lalu ngayan ka diri di mua Sekariah, bediri muak ari kanan alta ka alai nunu menyan. ¹² Lebuh Sekariah meda melikat nya, iya tekenyit sereta balat amat takut. ¹³ Tang ku melikat nya bejaku ngagai iya, “Anang takut, Sekariah, laban sampi nuan udah didinga Allah Taala, lalu bini nuan Elisabet deka ngadaka anak lelaki siku, lalu nuan deka meri iya nama John. ¹⁴ Nuan deka gaga sereta lantang ati, lalu mayuh orang deka rami gaga ati lebuh iya ada, ¹⁵ laban iya deka nyadi orang ke besai di mua Tuhan. Iya enda tau ngirup anggur tauka ai ka bisa. Indah sebedau iya ada deh Iya deka dipenuhka enggau Roh Kudus. ¹⁶ Iya deka nguingka mayuh orang Israel ngagai Tuhan Allah Taala sida. ¹⁷ Ngena roh enggau kuasa Elijah iya deka bejalai dulu ari Tuhan, nguingka ati apai indai ngagai anak sida, enggau nguingka orang ke enda ngasi ngagai penemu-dalam orang ke lurus, nyendiaka bala nembiak Tuhan, ke udah disedia ke Tuhan.” ¹⁸ Sekariah lalu bejaku ngagai melikat nya, “Baka ni ku aku nemu utai tu deka nyadi? Laban aku nyau tuai, lalu bini aku mega nyau tuai.” ¹⁹ Melikat nya lalu nyaut, “Aku tu Gabriel, ke bediri di mua Allah Taala, lalu aku udah diasuh bejaku ngagai nuan, lalu mai Berita Manah tu ngagai nuan. ²⁰ Tang diatu laban nuan enda arapka jaku aku, ka deka dikamatka ba maya ka patut, nuan deka bisu, enda ulih bejaku nyentuk ngagai hari semua utai nya nyadi.” ²¹ Lebuh utai nya benung nyadi, orang ke di luar nganti Sekariah, lalu sida iranka kebuah iya lama amat dalam Rumah Sembiang. ²² Lebuh iya pansut, iya enda ulih bejaku ngagai sida. Nya baru sida nemu iya bisi udah meda genera dalam Rumah Sembiang. Iya majak ngaga tanda ngena jari iya, lalu mengkang enda ulih bejaku. ²³ Lebuh iya udah nembuka pengawa iya dalam Rumah Sembiang, iya pulai ke rumah. ²⁴ Udah bekau nya, bini iya Elisabet lalu betubuh-bisi, lalu iya enda pansut ari rumah lima bulan. Ku Elisabet bejaku, ²⁵ “Tu meh utai ka udah dikereja Tuhan ke aku, lebuh Iya kasihka aku, lalu muai pemalu ka udah ditatka aku di mua orang mayuh!” ²⁶ Dalam bulan ti keenam Elisabet betubuh-bisi, Allah Taala ngasuh melikat Gabriel datai ngagai sebuah nengeri ka dikumbai Nasaret di menua Galili, ²⁷ ngagai siku dara bungas ke betunang enggau lelaki siku ke benama Jusup ke ari peturun Daud. Nama dara bungas nya Maria. ²⁸ Melikat nya datai ngagai iya, lalu bejaku, “Tabi ke nuan, ke dikerinduka Allah Taala! Tuhan bisi enggau nuan!” ²⁹ Tang Maria beba runding ninga jaku melikat nya, lalu belematika reti jaku tabi nya. ³⁰ Lalu ku melikat nya bejaku ngagai iya, “Anang takut, Maria, laban nuan dikerinduka Allah Taala. ³¹ Lalu diatu nuan deka betubuh-bisi, lalu ngadaka anak lelaki siku, lalu nuan deka meri iya nama Jesus. ³² Iya deka nyadi orang ke tinggi pangkat, lalu Iya deka dikumbai Anak Allah Taala ka Pemadu Tinggi, lalu Tuhan Allah Taala deka meri Iya kerusi diraja aki Iya Daud. ³³ Iya deka merintah peturun Jakop belama iya, lalu Perintah Iya enda nemu abis!” ³⁴ Maria lalu bejaku ngagai melikat nya, “Baka ni ku utai tu tau nyadi, laban aku dara bungas?” ³⁵ Ku melikat nya bejaku enggau iya, “Roh Kudus deka datai atas nuan, lalu kuasa Allah Taala ka Pemadu Tinggi deka ngayung nuan. Nya alai anak mit ka deka diadaka nya kudus. Iya deka dikumbai Anak Allah Taala. ³⁶ Lalu diatu petunggal nuan Elisabet benung betubuh-bisi taja pen iya nyau tuai. Tu keenam bulan iya betubuh-bisi, taja pen iya dikumbai mandul. ³⁷ Laban nadai utai enda ulih dikereja Allah Taala.” ³⁸ Maria lalu bejaku, “Aku tu nembiak Tuhan. Awakka utai nya nyadi ba aku nitihka jaku nuan.” Melikat nya lalu ninggalka iya. ³⁹ Maria angkat lalu beguai-guai mupuk ngagai sebuah nengeri di menua Judah ka bebukit, ⁴⁰ tama ngagai rumah Sekariah, lalu meri tabi basa ngagai Elisabet. ⁴¹ Lebuh Elisabet ninga jaku tabi Maria, anak mit ka dalam kandung Elisabet lalu engkebut. Penuh laban Roh Kudus, Elisabet ⁴² lalu bejaku enggau nyawa ka inggar, “Beberekat meh nuan ari semua indu bukai, lalu beberekat meh anak ke dikandungka nuan! ⁴³ Lalu nama kebuah utai tu nyadi ba aku, datai ke indai Tuhan aku nyau nemuai ngagai aku? ⁴⁴ Laban lebuh aku ninga jaku tabi nuan tadi, anak mit ke dalam kandung aku engkebut gaga ati. ⁴⁵ Beberekat meh iya ke arapka jaku Tuhan deka dikamatka!” ⁴⁶ Maria lalu bejaku, “Semengat aku ngemesaika Tuhan, ⁴⁷ lalu ati aku gaga ke Allah Taala ka Juruselamat aku, ⁴⁸ laban Iya udah kasihka nembiak Iya ke baruh ati. Belabuh ari diatu semua serak deka ngumbai aku beberekat ⁴⁹ laban Allah Taala ka bekuasa udah ngereja utai ka besai ke aku. Kudus meh nama Iya. ⁵⁰ Iya mandangka pengasih Iya ngagai orang ke nangika Iya, ari serak siti ngagai serak siti. ⁵¹ Iya udah mandangka pengering Iya ngena lengan Iya lalu udah mambarka orang ke sumbung enggau semua pelan sida. ⁵² ngeninggika orang ke baruh ati. Iya udah ngenyangka ⁵³ orang ke lapar enggau utai ka manah, lalu muru sida ke kaya pulai puang. ⁵⁴ Iya udah nulung nembiak Iya Israel, kena Iya ngingatka pengasih Iya, ⁵⁵ nitihka semaya ka digaga Iya enggau aki ini kitai, ngagai Abraham enggau ngagai peturun iya belama iya.” ⁵⁶ Maria lalu diau enggau Elisabet kira tiga bulan. Udah nya iya pulai ngagai rumah iya empu. Pengada Johanes Pemaptis Maya pen datai alai ⁵⁷ Elisabet deka beranak. Iya lalu ngadaka anak lelaki siku. ⁵⁸ Orang ke berimbai pendiau enggau iya, enggau kaban belayan iya ninga Tuhan udah ngayanka pengasih ka besai ngagai iya, lalu sida sama rami gaga ati enggau iya. ⁵⁹ Ba hari ka kelapan sida lalu datai deka nutus anak mit nya, lalu sida deka meri iya nama Sekariah, ngangkatka nama apai iya. ⁶⁰ Tang ku indai iya bejaku, “Ukai nya! Nama iya Johanes.” ⁶¹ Sida lalu bejaku ngagai iya, “Nadai kaban belayan nuan bisi nama nya!” ⁶² Sida lalu bejaku ngena jari enggau apai iya, nanyaka nama kabdeka diberi iya ngagai nembiak nya. ⁶³ Sekariah lalu minta papan tulis, lalu nulis, “Nama iya Johanes.” Semua sida lalu balat alit ati. ⁶⁴ Tekala nya mulut Sekariah tebuka, dilah iya ulih engkebut, lalu iya belabuh bejaku muji Allah Taala. ⁶⁵ Semua orang ke berimbai pendiau enggau sida bela takut magang. Lalu semua utai nya dikenang orang magang di serata menua ka bebukit di menua Judea. ⁶⁶ Semua orang ninga nya lalu belematika utai nya. Ku sida, “Namaka penyadi nembiak tu ila?” Laban kuasa Tuhan amat bisi enggau iya. ⁶⁷ Apai iya Sekariah, ke penuh laban Roh Kudus, lalu benabi. ⁶⁸ “Pujika Tuhan Allah Taala ke disembah orang Israel, laban Iya udah kasihka nembiak Iya lalu nebus sida. ⁶⁹ Iya udah nyendiaka siku Juruselamat ti bekuasa ke kitai, ari peturun nembiak Iya Daud, ⁷⁰ munyi ka disebut Iya dulu kelia ngena sida nabi Iya ka kudus ⁷¹ madahka kitai deka diselamatka ari munsuh kitai, enggau ari jari semua orang ke begedika kitai. ⁷² Nya meh jalai Iya udah ngayanka pengasih kaudah disemaya Iya ngagai aki ini kitai lalu udah ngingatka sempekat Iya ka kudus, ⁷³ semaya ka digaga Iya ngena sumpah enggau aki kitai Abraham ngambika ⁷⁴ ngelepaska kitai ari jari munsuh kitai, ngambika kitai betuaika Iya enggau nadai penakut, ⁷⁵ dalam pengudus enggau pengelurus di mua Iya sepemanjai umur kitai. ⁷⁶ Lalu nuan, anak, deka dikumbai nabi Allah Taala ti Pemadu Tinggi, laban nuan deka bejalai dulu ari Tuhan nyendiaka jalai ke Iya, ⁷⁷ meri penemu pasal pengelepas ngagai nembiak Iya lebuh dosa sida diampun. ⁷⁸ Ulih pengasih Allah Taala kitai, penampak ari serega deka mancar ngagai kitai, ⁷⁹ ngambika meri penampak ngagai orang ke diau dalam pemetang enggau dalam kelemayang pemati, lalu ngiring kaki kitai ngagai jalai pemaik.” ⁸⁰ Anak mit nya mansang besai, kering dalam tubuh enggau roh, lalu iya diau di menua puang nyentuk ngagai maya iya ngayanka diri ngagai orang Israel.