¹ Melkisedek nya raja menua Salem, lalu iya mega nyadi imam Allah Taala ti Pemadu Tinggi. Iya betemu enggau Abraham ke baru pulai beperang bebunuhka bala raja, lalu iya merekatka Abraham. ² Lalu Abraham meri Melkisedek sepuluh peratus ari semua perapasan ti ulih iya. (Reti ti keterubah ke nama Melkisedek nya “Raja Pengelurus”, lalu iya mega raja Salem, reti nya, “Raja Pemaik.”) ³ Nadai orang nemu sapa apai indai iya, sapa aki ini iya. Lalu nadai mega orang nemu kemaya iya ada tauka kemaya iya mati, tang iya baka Anak Allah Taala ke nyadi imam belama iya. ⁴ Peda pemesai iya! Indah aki kitai Abraham deh meri ngagai iya sepuluh peratus ari semua perapasan ti ulih iya beperang. ⁵ Lalu bala peturun Lewi ke diletak nyadi imam, diberi pesan dalam Adat ngasuh sida ngumpul pemeri sepuluh peratus ari orang Israel, reti nya, ari bansa sida empu, taja pen sida nya mega peturun Abraham. ⁶ Tang Melkisedek tu, ke ukai ari peturun Lewi, nerima pemeri sepuluh peratus ari Abraham, lalu iya merekatka Abraham ke udah nerima semaya Allah Taala. ⁷ Semua kitai ulih besetujuka tu: orang ke baruh pangkat sigi diberekatka ulih orang ke tinggi agi pangkat. ⁸ Ba pekara tu, pemeri sepuluh peratus nya diterima mensia ke tau mati, tang ba pekara Melkisedek, pemeri sepuluh peratus nya diterima orang ke idup. ⁹ Kitai tau ngumbai Lewi, ke nerima pemeri sepuluh peratus, mayar pemeri sepuluh peratus nengah Abraham, ¹⁰ laban Lewi agi dalam tubuh aki iya Abraham lebuh Melkisedek betemu enggau Abraham. ¹¹ Enti pemadas ti pemadu menyana nya ulih diterima orang Israel nengah bala imam Lewi (laban orang Israel nerima Adat nengah sida imam Lewi), nama kebuah kitai agi begunaka siku agi imam ke murihka Melkisedek, tang enda begunaka imam ke murihka Harun? ¹² Laban lebuh atur kena milih imam diubah, Adat mega enda tau enda diubah. ¹³ Laban orang ke dikenang dalam pekara tu datai ari raban bansa bukai, lalu nadai orang ari raban bansa nya udah kala bekereja ba alta. ¹⁴ Laban Tuhan kitai endang terang datai ari peturun Yehuda, lalu Musa nadai kala nyebut pasal imam lebuh iya bejakuka pasal raban bansa tu. ¹⁵ Pekara tu tau nyadi terang agi lebuh siku agi imam pegari, ke baka Melkisedek, ¹⁶ ke nyadi imam, ukai nitihka atur mensia, tang ulih kuasa pengidup ti enda nemu abis. ¹⁷ Laban Bup Kudus nyebut munyi tu pasal Iya, “Nuan deka nyadi imam belama iya murihka Melkisedek.” ¹⁸ Nya alai Adat ti lama, nadai agi dikena laban iya lemi sereta nadai guna, ¹⁹ laban Adat enda ulih ngaga utai nyadi pemadu badas. Lalu diatu, pengadang ti badas agi udah disediaka, ti dikena kitai mansang semak ngagai Allah Taala. ²⁰ Utai tu ditetapka ngena jaku sumpah. Orang bukai nyadi imam ukai ulih jaku sumpah, ²¹ tang Yesus nyadi imam ulih jaku sumpah, laban Allah Taala nyebut ngagai Iya, “Tuhan udah besumpah lalu Iya enda ngubah runding Diri: ‘Nuan deka nyadi imam belama iya.’ ” ²² Jaku tu ngeletak Yesus nyadi jamin ke sempekat ti badas agi. ²³ Nambahka nya, sida imam menya endang mayuh, laban sida mati, lalu enda ulih majakka pengawa diri ke nyadi imam. ²⁴ Tang Yesus nyadi Imam belama iya, laban Iya idup belama iya. ²⁵ Nya alai Iya ulih, ke diatu enggau ke belama-lama iya, nyelamatka orang ke datai ngagai Allah Taala, ulih Iya, laban Iya idup belama iya lalu bejaku ngarika sida ngagai Allah Taala. ²⁶ Laban kitai endang patut bisi imam besai ti baka nya, ke kudus, nadai bepenyalah, nadai penimpang, diseraraka ari orang ke bedosa, ditinggika ari atas langit. ²⁷ Iya enda baka imam besai ti bukai. Iya enda ibuh ngenjuk piring tiap hari, terubah ke dosa iya empu, lalu udah nya ke dosa orang mayuh. Tang Iya ngenjuk piring sekali aja ke belama-lama iya, lebuh Iya nyerahka Diri Empu. ²⁸ Adat ngeletak orang ke lemi nyadi imam besai. Tang jaku sumpah, ti datai dudi agi ari Adat, ngeletak Anak, ke udah digaga nyadi pemadu badas belama-lama iya, nyadi Imam Besai.