¹ Majak rinduka diri menyadi dalam Kristus. ² Anang enda ngelaluka temuai ngagai rumah kita, laban sekeda orang ke ngereja nya enda nemu diri udah ngelaluka melikat. ³ Kingatka orang ke dalam jil, baka ke ngasaika kita empu kena jil sama enggau sida. Kingatka orang ke kena perinsa, baka ke ngasaika kita empu kena perinsa. ⁴ Awakka adat melaki-bini dibasa semua orang, lalu awakka laki enggau bini meruan tetap ati ngagai pangan diri, laban Allah Taala deka ngakim orang ke ngereja ulah ti kamah, enggau orang ke butang. ⁵ Anang angkunka duit. Kita patut nemu puas ati ke utai ti dikemisi kita, laban Allah Taala udah nyebut, “Aku enggai sekali-kali ninggalka kita, tauka ngelengkaka kita.” ⁶ Nya alai, kitai kempang ati nyebut, “Tuhan endang penyaup aku, nya alai aku enda takut. Nama utai ulih dikereja orang ngagai aku?” ⁷ Kingatka bala tuai kita, ke nusui pesan Allah Taala ngagai kita. Peratika pengidup sida, lalu tunda pengarap sida. ⁸ Yesus Kristus enda berubah kemari, sehari tu enggau ke belama iya. ⁹ Anang nejuka diri tesat dibai semua macham jaku ajar ti nyelai. Manah agi enti ati kitai dikeringka ulih pengasih Allah Taala, ukai dikeringka ulih adat pasal pemakai, ti nadai mai penguntung ngagai orang ke nitihka adat nya. ¹⁰ Kitai bisi alta, lalu orang ke bekereja dalam langkau sembiang enda tau makai utai ari alta nya. ¹¹ Laban jelu ti bempu darah ti dibai imam besai ngagai Endur ti Kudus nyadika piring kena muai dosa, ditunu di luar kem. ¹² Nya alai Yesus mega mati di luar nengeri, ngambika darah Iya nuchi orang mayuh. ¹³ Nya alai, aram kitai mupuk ngagai Iya di luar kem, ngambika kitai dikeleseka sama enggau Iya. ¹⁴ Laban di dunya tu kitai nadai nengeri ti tan belama iya. Kitai ngiga nengeri ti deka datai. ¹⁵ Nya alai, ulih Iya, aram kitai seruran meri puji ngagai Allah Taala, nyadika piring kitai, iya nya piring ti diberi kitai ngena mulut ti ngaku Iya Tuhan. ¹⁶ Anang enda ngereja utai ti badas lalu bekunsika utai ti dikemisi kita, laban nya piring ti dikerinduka Allah Taala. ¹⁷ Ngasika tuai kita, lalu nunduk ngagai sida, laban sida ngemataka semengat kita, lalu sida enda tau enda madah ngagai Allah Taala pasal semua pengawa ti udah dikereja sida. Awakka sida ngereja pengawa nya enggau ati ti gaga, ukai enggau ati ti tusah laban nya nadai pulai ke penguntung kita. ¹⁸ Besampi ke kami, laban kami nemu ati diri beresi, ingin deka ngereja utai ti badas berari. ¹⁹ Aku ngasuh kita bebendar agi besampi, ngambika aku jampat agi pulai baru ngagai kita. ²⁰ Awakka Allah Taala ti pun pemaik, ke udah ngangkatka Yesus Kristus Tuhan kitai ari mati, ke nyadi Pengibun ti Besai, ulih darah sempekat ti meruan belama iya, ²¹ nyikap kita enggau semua utai ti badas, ngambika kita ulih ngereja peneka Iya, ngereja dalam kami utai ti ngerinduka ati Iya, ulih Yesus Kristus, ke dipuji belama-lama iya. Amin. ²² Menyadi, aku minta kita sabar mendingka jaku peransang aku tu, laban surat aku tu pandak. ²³ Aku dekaka kita nemu, menyadi kitai Timotius udah dilepaska ari rumah jil. Enti iya lengkas datai kitu, aku deka enggau iya nemuai ngagai kita. ²⁴ Beri tabi basa ari kami ngagai semua tuai, enggau ngagai semua nembiak Tuhan. Sida ke datai ari Itali mega ngirumka tabi basa ngagai kita. ²⁵ Awakka berekat Allah Taala meruan enggau kita semua.