¹ Adat semina ayuk utai ti badas ti deka datai, ukai utai nya empu. Nya kebuah iya, ngena piring ti dienjuk enda ngetu-ngetu tiap taun, enda ulih ngaga orang ke datai semak ngagai Allah Taala nyadi pemadu badas. ² Enti iya ulih, endaka piring nya badu agi dienjuk, laban orang ke nyembah tentu dituchi sekali aja ke belama iya, lalu nadai agi ngasaika diri agi bedosa? ³ Tang piring ti diberi nya ngasuh orang ngingatka dosa sida tiap-tiap taun. ⁴ Laban darah sapi enggau darah kambin enda ulih muai dosa. ⁵ Nya kebuah, lebuh Kristus datai ngagai dunya tu, Iya bejaku, “Nuan enda begunaka piring enggau pemeri, tang Nuan udah nyendiaka tubuh ke Aku. ⁶ Nuan enda rinduka piring tunu enggau piring pengampun dosa ⁷ Udah nya Aku bejaku, ‘Tu Aku, O Allah Taala sedia deka ngereja peneka Nuan, munyi ti udah ditulis pasal Aku dalam Bup Adat.’ ” ⁸ Lebuh Iya nyebut, “Nuan enda beguna tauka rinduka piring enggau pemeri, tauka jelu ti ditunu ba alta, enggau piring pengampun dosa,” (taja pen Adat ngasuh utai nya diberi) ⁹ Iya lalu nyebut, “Tu Aku, sedia deka ngereja peneka Nuan.” Nya alai, Allah Taala muai atur ti keterubah ngambika Iya numbuhka atur ti kedua. ¹⁰ Lalu ulih peneka Iya, kitai udah dikuduska ulih piring tubuh Yesus Kristus ti diberi sekali aja ke belama-lama iya. ¹¹ Tiap hari genap iku imam bediri ngereja pengawa diri, ngenjuk piring ti sebaka belama, ti enda ulih muai dosa. ¹² Tang lebuh Kristus udah meri sekali aja ke belama-lama iya piring pengampun dosa, Iya duduk muak ari kanan Allah Taala, ¹³ nganti bala munsuh Iya nyadika pelasar kaki Iya. ¹⁴ Laban, ngena siti aja piring, Iya udah ngaga orang ke dikuduska Iya nyadi pemadu badas. ¹⁵ Lalu Roh Kudus mega besaksika pasal nya ngagai kitai, laban lebuh Iya udah nyebut, ¹⁶ “Tu sempekat ti deka digaga Aku enggau sida udah bekau nya ila, ku Tuhan bejaku: Aku deka nyimpan Adat Aku dalam ati sida lalu nuliska Adat nya dalam runding sida.” ¹⁷ Udah nya Iya mega nyebut, “Aku enda agi ngingatka dosa enggau penyalah sida.” ¹⁸ Lebuh semua dosa enggau penyalah udah diampun, piring pengampun dosa enda agi diguna. ¹⁹ Nya alai, menyadi, laban kitai kempang ati tama ngagai Endur ti Pemadu Kudus ngena darah Jesus, ²⁰ ngena jalai ti baru sereta idup tu, ti udah dibuka Iya ke kitai nengah kain tirai nya, iya nya, nengah tubuh Iya Empu, ²¹ lalu laban kitai bisi siku Imam ti besai, ke ngemataka rumah Allah Taala, ²² aram kitai datai semak ngagai Allah Taala, mai ati ti tuchi, enggau pengarap ti bendar, laban ati kitai udah dipechik lalu dituchi ari penyalah, lalu tubuh kitai udah dibasu ngena ai ti tuchi. ²³ Aram kitai bepegai teguh ba pengadang ti diaku kitai, enda beguyat, laban Iya ke ngaga semaya nya endang tau dikarapka. ²⁴ Lalu aram kitai berundingka chara kitai tau nyungkak pangan diri ngayanka pengerindu lalu ngereja pengawa ti badas, ²⁵ enda ngelengkaka pengawa begempuru, baka sekeda orang, tang meransang pangan diri, lalu bebendar agi ngereja nya laban kita meda Hari Tuhan nyau semak. ²⁶ Laban enti kitai sengaja majak bedosa lebuh kitai udah nerima penemu pasal pemendar, kitai nadai agi piring pengampun dosa, ²⁷ tang semina ati ti takut nganti diri diakim, enggau nganti api ti mau ti deka nunu semua munsuh Allah Taala. ²⁸ Orang ke udah ngelanggar Adat Moses deka diukum bunuh enggau nadai pengasih, beduduk ba saksi dua tauka tiga iku orang. ²⁹ Dalam runding kita, baka ni ku pemalat ukum ti patut ditatka orang ke udah ngelunjak Anak Allah Taala, ke udah busung ngelaban darah sempekat ti udah dikena nguduska sida, lalu udah ngeleseka Roh Kudus ti meri pengasih? ³⁰ Laban kitai nemu sapa ke nyebut, “Aku deka malas. Aku deka mayar.” Kitai mega nemu sapa ke nyebut, “Tuhan deka ngakim bala nembiak Iya.” ³¹ Naka meh pemalat kitai takut enti kitai labuh ngagai jari Allah Taala ti idup. ³² Tang kingatka gaya kita menya, lebuh kita baru udah nemu penampak. Kita natka diri balat diperinsa, ³³ kadang-kadang dipechat sereta dikeduan di mua orang mayuh, lalu kadang-kadang kita diperinsaka sama enggau orang ke kena perinsa. ³⁴ Kita kasihka orang ke ditutup dalam rumah jil, lalu kita gaga ati nejuka orang ngerampas utai kita, laban kita nemu diri bisi pesaka ti manah sereta tan agi. ³⁵ Nya alai, anang ngelengkaka ati kita ti kempang, laban iya deka bulih upah ti besai. ³⁶ Kita begunaka ati ti tan, ngambika lebuh kita udah ngereja peneka Allah Taala, kita nerima utai ti udah disemaya. ³⁷ “Laban enda lama da agi, Iya ke deka datai, tetap datai, lalu enda betangguh; ³⁸ Tang nembiak Aku ke lurus deka idup ngena pengarap. Aku enda rinduka orang ke mungkir.” ³⁹ Tang kitai tu ukai orang ke mungkir lalu dirusak, tang orang ke arap, lalu diselamatka.