¹ Ari penatua, Ngagai pangan aku Gayus, ke dikerindu ka aku enggau bendar. ² Menyadi, aku besampi ngambi ka nuan mujur dalam semua utai, sereta gerai nyamai, baka nuan ke mujur dalam roh. ³ Aku balat amat gaga ati leboh sekeda menyadi datai, alu madah ka nuan meruan tetap ati ke pemendar, iya nya pasal nuan ke diau niteh ka pemendar. ⁴ Nadai utai bukai uleh ngasoh ati aku lebih age gaga ari ke ninga bala anak aku diau dalam pemendar. ⁵ Menyadi, nuan endang amat ngereja pengawa nuan enggau ati ti tetap ke bala menyadi seiman, kelebih age ke urang ke enda dikelala nuan. ⁶ Sida udah besaksi ngagai jemaat pasal pengerindu nuan. Tulung sida nyendia ka pejalai sida, laban nya ngerindu ka ati Allah Taala. ⁷ Laban sida bejalai ketegal Kristus, alu sida nadai nerima tulung ari urang ke enda arapka Allah Taala. ⁸ Nya alai, kitai patut nulung urang ke baka nya, ngambi ka kitai sama enggau sida ngereja pengawa ke pemendar. ⁹ Aku bisi udah nuleh ngagai jemaat, tang Diotrepes ke keran deka nyadi tuai, enda beduli ka kami. ¹⁰ Nya alai, enti aku datai ila, aku deka mantai ka utai ti udah dikereja iya, laban iya bejako bula pasal aku. Nyadi laban iya enda puas ati ngereja nya, iya alu enggai nerima penatai bala menyadi, sereta nagang urang ke deka nerima penatai sida, alu muai urang nya ari jemaat. ¹¹ Menyadi, anang nunda utai ti jai, tang tunda utai ti badas. Barang sapa ngereja pemadas, endang enggi Allah Taala. Barang sapa ngereja penyai, nadai kala meda Allah Taala. ¹² Semua urang bela udah besaksi muji Demetrius. Allah Taala Empu mega muji iya. Lalu aku mega besaksi ka pasal iya, alu kita nemu, utai ti disebut kami endang amat. ¹³ Aku mayoh amat utai ti deka disebut ngagai kita, tang aku enggai nulehka nya ngena pena enggau tinta. ¹⁴ Laban aku ngarapka diri betemu enggau kita enda lama da age, alu kitai bejako betunga mua enggau pangan diri. ¹⁵ Awak ka pemaik meruan enggau kita. Semua pangan nuan bela ngirum ka tabi basa ngagai nuan. Beri tabi basa mega gagai semua pangan kitai din.