¹ ताहा उजाडो वेयो ताहा आखा मोडा याजक लोग आण डाया हा ईयाय यीशूल केहकी मारुला ईया विचार केयो. ² तीयाय यीशुल हाकली की बादीन ली जाईने रोमी सैनीकाहा अधिकारी पिलाता आथुम होपी देदो. ³ ताहा तीयाय यीशुल गुन्हेगार ठरवी देदो ई विने तीया शत्रु आथुम यीशुल होपी देणारे यहुदा पासतायो तीयाल तीयाय चांदी तीस नाणे लिन मोडा याजक लोक आणे डाया पासे आलो. ⁴ तीयाय आख्यो मायु जीया काय चुक नाहा काय तीयाय माई टाका वाटो दिन पाप केयो. यहुदी लोकाय आख्यो ईयाम कामा काय केनी तो तुल माहिती आथेा. ⁵ ताहा यहुदाये ती चांदी नाणे परमेश्वरा मंदीराम फेकी देदा आणे तो नीगी गीयो पासे बारे जाईने सोताल फासी लागवी लेदो ⁶ मुखयाजक चांदी ते तीस नाणे लेदया आणे आरबा लाग्यो ऐ पोईया परमेश्वरा मंदीराम खजानाम ठोवता कावे नाय ई कामा नियमा विरूध्द हाय काहाका ऐ पौईसा केडाल तेबी माई टाकावा खातुर देदला आथा. ⁷ ताहा तीया विचार कीने तीया पौईसा कुंभारा खेत वेचतो लेदो आण तीयागाम माहान बोनावा जागो लेदो. ⁸ तीया खातोर आज बी तीया जागाले रोक्ता खेत एहकी आखता हे. ⁹ ताहा यिर्मया संदेष्टया हा जो आखलो तो पुरो वेयो तीयाय आख्यो का इस्त्राएलस यहुदी लोकाय जे चांदी तीस रूपया माहाल माय टाका खातेार ठोरवी देदला ते ली लेदा. ¹⁰ माल प्रभु परमेश्वराय आज्ञा देदी तेहकिी चांदी त्या तीस पोईसा की तीया ते कुभांर खेत वाठो देदो. ¹¹ ताहा यीशु राज्यपाल पिलाता हुबुर उबो रीयो ताहा पिलाताये तियाल फच्यो तु यहुदी लोकाहा राजो हाय का… यीशुय आख्यो हा माय हाय जेहकी तुमा आखी रीया हा. ¹² पेन ताहा मोडा याजकाय आन डायाय तीयापे चुक्या काडा लागया तो तो काईज नाय काय गोग्यो. ¹³ तीयाय पिलाताय यीशुल आख्यो ऐ लोक तोपे चुक्या काडी रीया तो चुक्या देखावी रीया तो तु उनाय रीयो ने तातु का हाय आरबी नाहा रीयो. ¹⁴ पेन यीशुय पिलाता ले कावीज नाय काय गोग्यो आणे पिलाताल नोवाय लाग्यो. ¹⁵ वल्हांडण सना वेल दरी वोरी लोक खातोर राज्यपाल ये तीया निवडीकी जेलुमेने केडालबी एकाल सोडी देवना रीत आथी. ¹⁶ ता तीही एक बरब्बा नावु खुप मोडो बांड आथो ¹⁷ तीयाल जाहा लोक टोलवाया ताहा पिलाताये तीयान फुच्यो तुमा काय मोरजी हाय तुमा बाटो माय केडाल सोडु बरब्बा ल का जीयाल ख्रिस्त आखतेहे तीया यीशूले. ¹⁸ काहा का ताहा होमजी गेहलो तीयाय तीयाल ठोगीन ती देदलो हाय. ¹⁹ तो न्याय केरूला जागावे बोठलो आथो ताहा तीया थेईये तील एक गोठ आखी मोकली ईया माहावेल होमजीले आणे हारकी वीचार के काहाका तीया काय चुक्या नाहा तीयाकेता होवनाम मान आज दिही पोय खुप दु:ख वेयो हो ²⁰ पेन पिलाताये बरब्बाल सोडी दिवुला आण यीशुल माय टाकुला का नाहा ऐहकी लोकाय विचार आवा जोजे तीयाय मोंडा याजकाय आण डायाय ईयाय आखालोकाहा मोने वोलवे. ²¹ राज्यापाल ये लोकान फुच्यो "माय ईया बेन्यामने तुमा वाटो केडाल सोडी दिव ऐहकी तुमा ईछा हाय?” लोकाय आख्यो "बरब्बाले." ²² पिलाताय फुच्या "आने जीयाल ख्रिस्त आखता ईया यीशु आमी आय काय कीव?” आखा लोक बोबलीन आखा लाग्या "ईयाल वधस्तंभावे खिल्या ठोकीन माई टाका !" ²³ पिलाताय आख्यो "काहा ? ईयाय काय खोटी काम केयो ? " पेन आखा लोक बोबलीन बोबलीन आखा लाग्या "तीयाल वधस्तंभावे चोडवा." ²⁴ लोक हुबुर मा कावीज नाय चाली ई पिलाताले हाेमजावे पेन उलटा लोक जास्तीज बोबला लाग्या, तीयाय पाई लेदो आण लोका हुबुर तीयाय आथ तुव्या. आन आख्यो, "या इया नितीमान माहां बोद्दल आय निर्दाष हाय. तुमा तुमाच व्या. ²⁵ आखा लोक आखा लाग्या ईया रोक्ता दोष आमापे आण आमा पोयरापे रे. ²⁶ पासे पिलाताय बरब्बाले सोडी देदो आण यीशुल चापका फटके ठोक्या आण वधस्तंभाप खिला टोकीन मारा वाटो तीयाय तीया माहान होपी देदो. येशुल वधस्तंभाप खिलाट तेहे. ... ²⁷ फासे पिलाता शिवाय यीशुल राज्यपाला वाडीम ली आला आण तीयाय तीया वाटो आखा शिपायांहा टोलो मागाव्यो. ²⁸ तीया कपडे काडी लेदे आण तीयाल एक लाल रेंगा कपडे पाेवा देदो. ²⁹ पासे एक काटाहा मुकुट तीयार कीन तो तीया यीशु मुनकाम पोवावी देदो तेहकीज तीयाय तीया उजवा आथुल एक दा ठोक्या पासे शिपाय तीया आगला गुडगे वालीन तीया मजाक उडवा लाग्या आन आखा लाग्या, "यहुद्यांहा राजो कायम जिवतो रेय !" ³⁰ आण तीयाप शिपाय थुपा लाग्या. आण तीयाल पाये यीशु मुनकाम ठोक्यो. ³¹ यीशु निंदा पारवाया ताहा तीयाय तीयाल जे कोपडे पोवा देदले आथे ते काडी लेदे आने तीया जे कोपडे आथे ते पासे पोवी देदे पास तीयाय वधस्तंभापे चोडवा ली गिया. ³² ताहा ते बारे जातला ताहा तीयान बारे एक शिमोन कुरनेकर नावु माहु मिल्यो तीयाय तीन तीयाल वधस्तंभ वोया लागव्यो. ³³ जाहा ते गुलगुथा (कवटी नावा जागाे) आला. ³⁴ ताहा तीयाय यीशुल पिया द्राक्षारस देदो पेन तीयाय तो चाखीन पीया नाया आखी देदो. ³⁵ तीयाय तीयाल वधस्तंभापे खिल्ला ठोक्या पासे तीया यीशु कोपडे पाडीने तीया कोपडा चीठ्या टाकीन वाटी लेदया. ³⁶ शिपाय तीयी यीशु नोजोर थोवा लाग्या आने आखा लाग्या. ³⁷ आण ओ यहुदा राजो येशु हाय ऐहकी लिखलो आरोप लेखीन पाटी यीशु मुनका उजवा बाजुल लागवी देदी तीही बेन चोरान बी क्रुस खांबापे उलटी वेल क्रुस खांबापे चोडव्या ³⁸ बेनी चोरांहान एकाल हुदीवेला आने एकाल उलटीवेला ऐहेकी तिया आरी कुरुस खांबाव खिलाटा आलो. ³⁹ जे जागापे जातले ते बोंबलीन तीया निंदा केरा लाग्या आने आखा लाग्या. ⁴⁰ "ऐ परमेश्वरा मंदीर तोडीन तीन दिहाम पासे उभो केनारा सोताल वाचोव जर तदेवा पोयरो वेरी ता वधस्तंभापेने नीचे आवी जो." ⁴¹ तेहकीज मोडा याजकाआरी नियमशास्त्रा शिक्षक आने यहुदी लोक तीया चेष्टा केतलाे आने आखा लागे. ⁴² ईयाय बीहजान वाचावे पेन ओ सोताल वाचवी शकतो नाहा ओ इस्त्राएला राजो हाय ऐहकी वेरी ता तीयाय वधस्तंभापेने नीचे आव ताहा आमा तीयापे भाेरूसो ठोवुहू. ⁴³ तो देवापे भरोसो ठोवे हे देवाल तो जो तो वेरी देवाय ईयाल वाचवा जोजे काहाका तेा आखे माय देवा पोयरो हाय. ⁴⁴ तेहकीज तीयी आरी क्रुस खांबापे चोडला चोर बी तीया आरी यीशु निंदा केरा लाग्या. ⁴⁵ ताहा दुपारी बारा वाजे .ने तीन वाजे लुग आखा देशाम आंधारो पोडलो आथो. ⁴⁶ अंदाजे नवव्या तासाकी यीशु मोडा आवाजाम बोंबलीन आखा लागयो (एलोई एलोई लमा सबख्थनी) इया अर्थ मा देवा मा देवा तुयु मान काहा सोडी देदो. ⁴⁷ जे लोक तीही उबला आथा तीयाय ई उनाय आखा लागया तो एलीयाल हादी रीयो हो. ⁴⁸ तीयामेने एक माहु माहरी धेउतुतो गीयो आन तीयाय एक कापडा गोळो लेदो आन तो द्राक्षरसाम बुडवीन तो ऐका होटीप थावीन यीशुल चुहीन पीया वाटो देदो. ⁴⁹ पेन तीयामेने आरदा लोक आखा लाग्या तीयाल एखलो रा द्या एलीयो आवीन तीयाल वाचवतो का नाहा आपु तो विहु. ⁵⁰ पासे एकवारी यीशु जोरमे बोंबली उठयो आन तीयाय तीया जीव सोडी देदो. ⁵¹ ताहा परेमेश्वरा मंदीरामने पडदा उचेने नीचे लुग बेन भागुम फाटी गीया तोरती कापी उठी मोडा दोगडा फटी गीया. ⁵² कबरी उघडी गीया आने मोला आथा ते जीवी उठया. ⁵³ ते लोक कबरीमेने बारे नीग्या यीशु मोला मेने जीवी उठयो ताहा ते लोक पवित्र नगराम गीया आण खुप लोकाय तीयान वेयो. ⁵⁴ ताहा मोडा अधिकारी आने तीया आरी यीशु पे नोजोर थोवतला ते शिपाय आथा तीयाय तोरती आली उठी तो आखो जो वेयो तो वीन ते खुप बी गीया ते आखा लाग्या ओ खेरोज देवा पोयरो आथो. ⁵⁵ तीही आरदया बाया जे दुर उब्या रेहल्या ते जे यीशुसेवा केत्या ते बाया गालील प्रांतामेने यीशु फाचला फाचला आल्या आथ्या. ⁵⁶ तीयाम मगदालीया नगरी मरीया याकोब आने योसेफ ईया याहकी मरीया आने जब्दी पायरो याकोब आने योहान ईया याहकी ऐ बी तीही आथ्या. येशू उत्तरक्रिया. ... ⁵⁷ ताहा वातीवेले योसेफ नावु अरिमथाई एक मालदार माहु तीही आलो तो यीशु चेलो आथो. ⁵⁸ तो पिलाता ही गीयो आन तियाय यीशु शरीर मागयो ताहा पिलाताये तो देउुला हुकुम केयो. ⁵⁹ ताहा योसेफ ये तो शरीर लेदो आने हारा नोवा कापडाम तो गुंडाली लेदो. ⁶⁰ आने तीयाय एक खडकाम खेदीली नोवी कबरीम यीशु शरीर थोवी देदो पासे कबरी बानापे एक मोडो दोगडो बानो लागवीन कबर बोन्द कीन ताे नीगी गीयो, ⁶¹ मग्दालीया नगरी मरीया आने याकोब योसेफ तीया याहकी मरीया ते कबरी हुबुर बोही रोहल्या आथ्या. ⁶² जो शब्बात दीही आखजले ताहा बीहीजा दीही मोडा याजक आणे परूशी लोक पिलाता ही गीये. ⁶³ ते आखा लाग्या महाराज आमान ईत हाय का तो ठोग जीवतो आथो ताहा आखतोलो का माय तीन दिहाकी पासे जीवतो वी जाहे उठेहे. ⁶⁴ तीया वाटो तीन दिहालुग कबरीपे हारकी नोजोर थोवा वाटो आखा काहाका तीया चेला आवीन तीया शरीर चोई लीजा वाटो पासे तो मोलामेने फासे उठयो ऐहकी लोकान आखी ई शेवटी ठोगुला पहिला ठोगलो आथो तीया पेने जाहको ठोगी ता हारी नाय गोठ वी. ⁶⁵ पिलाताय आख्यो तुमान जेहकी वाटे तेहकी तुमा शेनीकान ली जायेन कबरी पे कडक नोजोर थोवा. ⁶⁶ ताहा ते गीया आन कबरीपे कडक नोजोर थेावा लाग्याे आने कबरी जो दोगडा बानो आथो तीयापे सरकारी शिक्को मारीन तीही नोजोर थाेवा शिपाई थोवी देदा.