¹ Ketíbaq-awaayuwe, ketaai maakáqó yimaa itéq-aoneq uraae. ² Keráwáqá itaama tagaraae, Pírípai marukaqo ummamô mayéta, tigaaemo mataunnatama. Mirauraimma Îtogo-kaq itouma min-úmmábi aqkoqnáá-umá maéta Îtogo-ní ámáán-aimma timáyímíkaunataae. ³ Abo ketáí tíyáápimma taí-aaimma, aweqké-áímmá, kaarí-áímmá íma ketaabi maiye. ⁴ Min-áítábá Îtogo keqtááyábá kanaaráré titaata, ámáán-aimma kétunnataae. Ketáámô tunnama, Îtogomma amuqá maraakaiye. Îtogo wenaamá tuyaana-nobaraa tirunnóbáqá káonaitaae. ⁵ Ketí mi-tataaqa kaaqari-ainnabo túgau-aqma íma mayáánúnataae. Keráwáqá itááma tágaraae, Îtogo ketaai turunáá túyánámmá aónaaraiye. ⁶ Wayúkabakena keqtópaqke íma ketaa anó tiwiqa mayáánúnataae. Ketáá Îtogo-ni mayai wayuka-bowata, yaimma yaqtaaqa, paá keráwátóqpake mayáánúnataae. ⁷ Yinówaama wení iyaapo-rawaqo yaabíyíniq-umá keráwákáq kumma kéyaabiyunataae. ⁸ Mamiran-apake keráwáqtábá kétikaitataa Îtogo-ní ámáán-aimma kétimatimeta, abo ketaai tai-áaimma timá-yimenunataae. Keqtááráqá anó tataaqa maae. ⁹ Tíbaaq-awaao, ketaai aqkonááraq mayaimo mataunnatama, taákaq maraaro. Keráwáqá yimíyábááe-téta, wagaa-garaq nokaa-karaq umá mayaima kémayaunnataae. Îtogo-ní ámáán-aimma mi-kánááráq timayikaunnataae. ¹⁰ Keráwáqá aóné-iteq-owana, Îtogo aóne-ite-uraiye. Abo aqbu-áaikaraq, kateqko áaikaraq, yoqkeke-umá main-aikaraq, ááraine-ti aaikaraq yiráátiraunnataae. ¹¹ Yibowáámá wení iyáápó-annama, mayaima-umaa yítaainiq-umá keráwákáráq mayai mayaaro. ¹² Ketaama keráwáqá kékén-aimma timá aqkonná-uma timátíkáraunnataae. Îtogomma aqkainna aaikaraq ámáán-aimma waréraq, Îtogomo yááyai tagaama marupaq utínówe. ¹³ Min-ááítábá, Îtogoma máqte-taoqa timuqá maraakánátaae. Abo Îtogo-ni watáama timáyimunataama ítaama maayeq, áraine, ímna maa-marabi naaqkoní aae téraq tirupike tero. Mamin-áímmá árai-nuramma Îtogo-ní ámáán-aine téraq máyááro. Mamin-áímmá máyaanana tirunóbáq uyéna, tirummo waerainna yuma áráine tinowe. ¹⁴ Ketíbaq-awaayuwe, Yútíyaaqo Îtogoni monoq naammo mai-monoq naaqkoní áaimma, Îtukaq yagaarotareq, waarai-wayuka maero. Yiuq wayukamo, yeqtí wayukamo ummamo yimiq-kaniq-uma, keqtí wayukama ummamá yimínówe. ¹⁵ Yíu-wayukama Îtu-karaq wení tisápóro-anna wayuka yíqkakaane. Abo Yíu-wayukam keqtáámá waqmá óqpaq yukááne. Îtogomma yeráwáqá íma amuqá maraqkéta, Yawe Îtogomma íma wayúkama ite-aone igaae yuyaanamma itaraae. ¹⁶ Ketáámá káqo-yumo aaman-aikaraq íráqóniq-umá main-aaitaba-garaq í-yíkaraiye. Min-áitábá yeqtí tai-aaimma aporokáq páqimma mama yaawaq-uma yukaae. Îtogoni áyáámma i-yaqtaagoma anaaékaq yeráwákáq yíníye. ¹⁷ Tíbaq-awaa-utaae, keráwátéta nékaq-nekaq umá paaqa kanaaraq manunataae. Túyáápímmá paa-yagaarotama mánunataae. ¹⁸ Ketaa keráwáqtópaq yi-tuyáánamma kéitaunnataae. Kemá Póroma yauwéqma keráwáqtópaq yí-túyáánámma kéitaunna-manibo, Tátáánima keqtáámá yáqtokaiye. ¹⁹ Ketaai anókoma, Îtuma kumíní kanaaraqa, ketaai kaamuqá, timuqá abo aumo mame-uyi kaamoqa nóinnabiyo. ²⁰ Keráwáqá ketaai tágaama-garaq ketaai timuráámure.