¹ Na mi tanim na apim het bilong mi na mi lukim 4-pela karis i kam aut namel long tupela maunten na dispela tupela maunten em ol i bin wokim long bras. ² Namba wan karis i gat ol retpela hos, namba tu karis i bin gat ol blekpela hos, ³ namba tri karis i bin gat ol waitpela hos na namba 4 -karis i bin gat ol hos i gat grei kala na makmak long skin bilong ol. ⁴ Olsem na mi bin askim ensel husat i toktok wantaim mi, ''Masta bilong mi, dispela em ol wanem samting?'' ⁵ Na ensel i bekim tok long mi olsem, "Dispela em ol 4-pela win bilong heven na ol i go aut long ples ol i save sanap long pes bilong Bikpela long olgeta hap bilong graun. ⁶ Dispela win wantaim ol blekpela hos i go long ol kauntri long hap not na ol waitpela hos i go long ol kauntri long hap san i go daun na dispela hos i gat grei kala na makmak i go long ol kauntri long hap saut.'' ⁷ Dispela ol strongpela hos i kam aut na lukluk i go raun long olgeta hap long graun, olsem na ensel i tok, "Go na raun long olgeta hap long graun!" olsem na ol i go long olgeta hap long graun. ⁸ Na em i bin singautim mi na i tok, ''Lukim ol dispela lain i go long hap not kantri; ol bai i mekim gut long spirit bilong mi long ol lain i stap long hap not.'' ⁹ Olsem na tok bilong God Yawe i kam long mi na i tok, ¹⁰ "Kisim ol ofa long ol lain i kalabus long Heldai, Tobisa na Jedaia na nau yet yu kisim i go long haus bilong Josaia pikinini man bilong Sepanaia, husat i bin kam long Babilon. ¹¹ Na yu kisim ol silva na gol na wokim hat bilong king na putim long het bilong Josua pikinini man bilong het pris Jehosadek. ¹² Tokim em olsem, 'God Yawe bilong olgeta lain i tok olsem: Dispela man, nem bilong en, em Han bilong diwai! Em bai kamap long hap em i stap long en na em bai wokim tempol bilong God Yawe! ¹³ Na em tasol i save wokim tempol bilong God Yawe na ol bai bilasim em wantaim bilas bilong king na em bai sindaun long sia king na bosim ol. Em bai kamap pris long sia king bilong em na em bai kamapim bel isi namel long tupela. ¹⁴ Na putim dispela hat bilong king i go long tempol bilong God Yawe, long ol manmeri i ken tingim Heldai, Tobisa, Jedaia na Hen pikinini man bilong Sefenaia. ¹⁵ Na ol lain husat i stap longwe bai i kam na wokim tempol bilong God Yawe na yu bai save olsem God Yawe bilong olgeta lain i salim mi i kam long yu na dispela bai kamap, taim yu harim gut tok bilong God Yawe, God bilong yu!''