¹ Pikinini i gat gutpela tingting i save harim tok bilong papa bilong em. Tasol man i save tok bilas long gutpela tingting i no inap harim ol gutpela tok bilong stretim em. ² Ol gutpela toktok i kamap long maus bilong wanpela man bai mekim em i amamas, tasol bel na tingting bilong man nogut em i bilong kamapim hevi. ³ Husat man i was gut long maus bilong em, bai em i lukautim gut laip bilong em yet. Tasol man i save toktok nabaut bai bagarapim em yet. ⁴ Ol les man i save laik tru long kisim ol samting tasol ol i no save kisim wanpela samting, tasol ol man i save stap gut na mekim wok bai ol i gat planti samting long inapim laik bilong ol. ⁵ Stretpela man i no laikim pasin bilong giaman, tasol ol man nogut i save mekim ol pasin bilong sem. ⁶ Stretpela pasin i save banisim ol man i nogat asua. Tasol pasin nogut i save rausim ol man i mekim sin. ⁷ I gat man i save lukautim em yet gut tru, tasol em yet i no gat wanpela samting na i gat man i save givim olgeta samting bilong en i go long ol narapela man, tasol em yet i gat olgeta samting. ⁸ Sapos ol man nogut i tok long bagarapim moni man, em inap baim ol long moni bilong em yet, tasol rabis man i no save harim dispela kain tok. ⁹ Lait bilong ol stretpela manmeri i save givim ol amamas, tasol lam bilong ol manmeri nogut bai i dai na i no lait moa. ¹⁰ Pasin bilong kisim biknem i save kamapim kros namel long ol man, tasol ol man i save putim yau long gutpela skul tok bai ol i kisim gutpela tingting. ¹¹ Moni na kago i save pinis sapos pasin bilong kisim biknem i kamap bikpela long laip bilong man, tasol man i wok bisnis long han bilong em yet bai moni bilong em i kamap bikpela. ¹² Taim wanpela man i laik mekim wanpela samting na i wet longpela taim, bel bilong em i no save amamas na sapos man i kisim dispela samting em bai amamas tru. ¹³ Man i save sakim tok bai em i kisim bagarap i kam antap long em yet, tasol man i save aninit long lo bilong God dispela man bai i stap gut. ¹⁴ Skul toktok bilong man i gat gutpela tingting i olsem wara bilong givim laip na bai yu abrusim umben bilong dai. ¹⁵ Ol man i save amamas long gutpela save na tingting, tasol pasin nogut i no gat arere bilong em. ¹⁶ Ol man i gat gutpela tingting i save tingim gut na mekim ol samting, tasol man i no gat gutpela tingting i save soim ol pasin nogut bilong em yet. ¹⁷ Wokman nogut bilong kisim ol toksave kam bai painim hevi, tasol gutpela wokman bai kamapim pasin bilong stap wantaim. ¹⁸ Man i sakim tok bai stap rabis na i sem, tasol man i kisim save long ol skul tok bai i stap gut. ¹⁹ Man i laikim tru wanpela samting long bel bilong em, em i ken amamas, bai em i kisim, tasol ol man i no gat gutpela tingting i no laik givim baksait long ol pasin nogut. ²⁰ Wokabaut wantaim ol man i gat gutpela tingting na bai yu kamap wankain olsem ol. Tasol taim yu pass wantaim ol man i no gat gutpela tingting bai yu painim bagarap. ²¹ Bikpela bagarap i save bihainim ol sin man, tasol ol stretpela man i save stap gut. ²² Gutpela man i save lusim graun na ol samting bilong em i stap bai ol tumbuna bilong em i kisim bihain, tasol sin man i bungim ol moni na kago bai ol stretpela man i kisim bihain. ²³ Hap graun bilong rabisman ol i no bin planim yet em inap long kamapim planti gutpela kaikai, tasol ol man i giaman na kisim dispela graun. ²⁴ Man i no save stretim pikinini bilong em, i olsem em i no laikim em, tasol man i laikim pikinini bai em i skulim em gut. ²⁵ Stretpela man i save kaikai inap em i pulap, tasol bel bilong man nogut i save hangre oltaim.