¹ Orait Aron na Miriam tupela i no wanbel long Moses na krosim em, long wanem em i maritim narapela meri Kusait. ² Ol i tok, ''God Yawe i save toktok wantaim Moses tasol, a? Em no save toktok wantaim mipela tu?'' God Yawe i harim ol toktok ol i mekim. ³ Nau dispela man Moses i gat daun pasin, dispela daun pasin bilong em i winim tru ol daun pasin bilong ol narapela manmeri bilong dispela graun. ⁴ Hariap tasol God Yawe i toktok long Moses, Aron, na Miriam. Yupela tripela kam autsait long dua bilong haus sel bilong miting" na ol tripela i kam autsait. ⁵ Na God Yawe i kam daun insait long bikpela klaut. Em i kam sanap long dua bilong haus sel na i singautim Aron na Miriam na tupela i wokabaut i kam long em. ⁶ God Yawe i tok,''Yutupela harim tok bilong mi.Taim profet bilong mi stap wantaim yupela, mi save soim mi yet long em na toktok long em long ol driman. ⁷ Wok man bilong mi Moses em i no dispela kain man. Em i gutpela wokman tru, em i no save les long wok oltaim long haus bilong mi. ⁸ Mi save go stret long Moses na toktok wantaim em, i no long driman o tok piksa. Em i save lukim pes bilong mi. Bilong wanem na yutupela i no pret long toktok long wokman bilong mi Moses.'' ⁹ Bel hat bilong God Yawe i bikpela tru na em i lusim tupela na i go. ¹⁰ Klaut i kirap antap long haus sel na i go, wantu tasol Miriam i kisim sik lepa na skin bilong em i kamap wait olsem sno. Taim Aron i tanim pes na lukluk i go long Miriam, em i lukim olsem sik lepa i karamapim bodi bilong em. ¹¹ Aron tokim Moses,"O, bikpela bilong mi, plis yu noken holim ol sin bilong mitupela. Mitupela i asua na mekim ol kranki tok na mekim sin pinis. ¹² Plis yu noken larim em stap olsem nupela pikinini i dai pinis long bel bilong mama na skin bilong em i bagarap taim mama i karim em. ¹³ Olsem na Moses i singaut long God Yawe, "Plis oraitim em, Bikpela, God Yawe plis.'' ¹⁴ God Yawe i tokim Moses, "Sapos papa bilong em i spet long pes bilong em, em bai sem na stap long 7-pela dei. Salim em go stap autsait long kem 7-pela dei pastaim. Bihain kisim em i kam bek long kem." ¹⁵ Olsem na ol i kisim Miriam i go stap autsait long kem inap long 7-pela dei. Ol manmeri i no lusim kem na i go, ol i wetim Miriam long kam bek long kem pastaim. ¹⁶ Taim Miriam kam bek long kem bihain long 7-pela dei, ol manmeri lusim ples Haserot na wokabaut i go na kem long ples Paran we nogat man stap long en.