¹ Na taim Sanbalat i harim tok olsem mipela i wokim banis, paia i kirap insait long em, na em i belhat tru na mekim nogut long ol Juda. ² Long ai bilong ol brata bilong em na ol ami bilong Sameria, em i tok, ''Ol dispela Juda i nogat strong ol i mekim wanem? Ol i ting ol yet inap wokim dispela taun a? Bai ol i mekim ofa a? Ol i ting ol inap pinisim wok long wanpela dei a? Ol i ting ol inap givim laip long ol ston na ol hip bilong rabis paia i kukim pinis a? ³ Tobia na ol lain Amon ol i stap wantaim em na em i tok, ''Sapos wanpela weldok i kalap antap long banis ol i wokim, em bai brukim daun dispela stongpela banis!'' ⁴ God bilong mipela yu harim ol i rabisim mipela. Tanim dispela bagarap i go bek long het bilong ol yet na givim ol dispela rabis long graun we ol i ken stap kalabus. ⁵ Yu no ken karamapim pasin nogut bilong ol na yu no ken rausim sin bilong ol, ol i tok bilas na belhat long ol man i wokim banis. ⁶ Orait mipela i wokim banis na olgeta banis i pas wantaim i go long namel bilong en na olgeta manmeri i laikim tumas long wok. ⁷ Tasol taim ol Sanbalat, Tobia, ol Arabia, ol Amon na ol Ashdod ol i harim olsem wok bilong sanapim banis long Jerusalem i go moa yet na dispela ples banis i bruk long en ol i pasim, bikpela belhat olsem paia i kamap insait long ol. ⁸ Na olgeta lain i pasim tok wantaim na ol i kam pait long Jerusalem bilong mekim ol i paul insait. ⁹ Tasol mipela i prea long God bilong mipela na mipela i putim ol man i ken was long ol birua long dei na long nait long wanem ol i laik long kam pait. ¹⁰ Na ol manmeri bilong Juda i tok, ''Strong bilong ol lain i karim ol hevi em i slek tru. Em planti ol samting i stap yet, na mipela i no inap wokim gen banis.'' ¹¹ Ol birua bilong mipela i tok, ''Ol i no inap save o lukim yumi inap mipela i kamap namel long ol na kilim ol na stopim ol wok.'' ¹² Long dispela taim ol Juda i stap klostu long ol, i kam long olgeta hap na toksave long mipela 10-pela taim, tok lukaut long ol i mekim long bagarapim mipela. ¹³ Orait mi putim ol manmeri long ples daun bilong banis long ples klia. Mi putim wanwan femili wantaim bainat, spia, na bunara bilong ol. ¹⁴ Orait mi lukim na mi kirap na mi tokim ol hetman na ol ofisa na olgeta manmeri, ''Yupela i no ken pret long ol. Long tingting tasol yupela singaut long Bikpela, husait em i strongpela na gutpela. Em bai i pait long femili bilong yupela, long ol pikinini man na ol pikinini meri, long ol meri bilong yupela na ples bilong yupela. ¹⁵ Em i kam olsem taim ol birua bilong yumi harim dispela tingting bilong ol, orait ol i save God bai bagarapim tingting bilong ol, mipela olgeta i go bek long banis, wanwan man i go bek long wok ol i mekim. ¹⁶ Orait long dispela taim hap bilong ol wokman i wok tasol long wokim ol banis, na hap bilong ol i holim spia, hap plang, bunara na siot kapa taim ol lida i sanap beksait long ol manmeri bilong Juda. ¹⁷ Na dispela ol wokman bilong wokim banis na karim ol samting, ol i wok yet na tu ol i was long hap bilong ol. Olgeta wanwan ol i wok long wanpela han na narapela han ol i holim samting bilong pait. ¹⁸ Olgeta wokman ol i putim bainat long sait bilong ol na ol i mekim wok. Orait man bilong winim bingel i sanap klostu long mi. ¹⁹ Mi tokim ol wokman bilong king na ol ofisa na olgeta manmeri. ''Orait dispela wok em bikpela tru na mipela i stap wanwan antap long banis, longwe long narapela. ²⁰ Yupela i mas ran hariap i go na sanap long ples yu harim bingel i singaut long en. God bilong mipela bai i pait long mipela. ²¹ Orait mipela i mekim wok. Hap bilong ol i holim spia long moning i go apinun inap lait bilong sta long nait i kam. ²² Mi tokim ol manmeri long dispela taim, ''Larim olgeta man na ol wokman bilong ol i ken stap long nait insait namel long Jerusalem, orait ol i ken was long yumi long nait na insait long dei yumi wok.'' ²³ Olsem na mi, ol brata bilong mi, ol wokman bilong mi na ol wasman husait i save bihainim mi, i nogat wanpela i senisim ol klos na mipela olgeta i karim samting bilong pait, long taim em i go long kisim wara tu.