¹ Nau long 24-dei bilong dispela mun yet ol manmeri bilong Israel i kam bung na ol i tambu long kaikai na olgeta ol i pasim klos bilong sori na olgeta i putim das long het bilong ol. ² Ol lain bilong Israel i no save stap wantaim ol narapela lain. Ol i sanap na autim olgeta sin bilong ol na ol pasin nogut bilong ol tumbuna bilong ol. ³ Olgeta i sanap long 4-pela aua na ol i ritim buk bilong lo bilong God Yawe, God bilong ol. Long narapela 4-pela dei ol i autim sin bilong ol na brukim skru na i go klostu long God Yawe, God bilong ol. ⁴ Ol Livai, Jesua, Bani, Katniel, Sebania, Bebia, Buni na Serebia, Bani na Kenani i sanap long ples bilong autim tok na i singaut bikpela tru i go long God Yawe, God bilong ol. ⁵ Orait bihain ol Livai, Jesua, Katmiel, Bani, Hasabnia Serebia, Hodia, Sebania na Petahia i tok, " Sanap na litimapim nem bilong God Yawe, God bilong yupela oltaim oltaim. " "Ol i ken litimapim biknem bilong yu i go antap long olgeta samting. ⁶ Yu wanpela tasol yu God Yawe. Yu bin wokim heven, na heven i stap antap tru wantaim olgeta samting bilong en na graun wantaim olgeta samting i stap antap long en na solwara na olgeta samting i stap insait long en. Na yu yet i givim laip long ol na olgeta ensel long heven i save brukim skru na lotu long yu. ⁷ Yu God Yawe, God husait i bin makim Abram na kisim em i kam autsait long taun Ur long Kaldis na yu senisim nem bilong em na kolim em Abraham. ⁸ Yu lukim bel bilong em i stap stret long ai bilong yu. Na yu wokim kontrak long givim ol tumbuna bilong em ol graun bilong lain Kenan, Hit, Amon, Filistia, Jebus na ol Kigas. Yu tingim promis bilong yu long wanem yu stretpela olgeta. ⁹ Yu lukim ol hevi bilong ol tumbuna bilong mipela long Isip na yu harim krai bilong ol taim ol i stap long ol gras i olsem solwara. ¹⁰ Yu mekim ol mak na mirakol long Fero na ol wokman bilong em na olgeta manmeri long graun bilong em. Long wanem, yu save olsem ol lain Isip i mekim nogut long ol manmeri bilong yu.Tasol yu kamapim biknem bilong yu yet i stap i kam inap long nau. ¹¹ Orait yu skelim solwara i go tupela hap na ol i go namel long ples i drai . Na yu tromoi ol lain birua i go insait long solwara olsem ston ol i tromoi insait long wara. ¹² Yu go pas long ol olsem bikpela klaut long san na olsem bikpela paia long nait long soim ol long rot. ¹³ Yu kam daun long maunten Sainai na toktok wantaim ol na yu givim ol stretpela, trupela na gutpela lo long ol. ¹⁴ Yu makim dei Sabat em i dei holi bilong yu na yu givim ol lo bilong yu long Moses wokman bilong yu. ¹⁵ Yu givim ol bret bilong heven taim ol i hangre na wara long ston taim ol i hangre long wara na yu tokim ol long i go insait na kisim graun yu bin tok promis long givim ol. ¹⁶ Tasol ol wantaim ol tumbuna bilong mipela i no harim tok, bel bilong ol i strong na i no bihainim ol lo bilong yu. ¹⁷ Ol i no laik harim tok na ol i no tingim ol gutpela samting yu bin mekim long ol, tasol bel bilong ol i strong na ol i makim lida bilong ol yet bilong bringim ol i go bek long kalabus. Tasol yu God i pulap long pasin bilong lusim sin na mekim gutpela pasin na pasin bilong sori. Yu no save belhat kwik na yu pulap long laikim olsem na yu no save lusim ol. ¹⁸ Maski taim ol i wokim piksa bilong bulmakau long ain na ol i tok, ''Dispela em God bilong yupela i kisim yupela i kam long Isip na long dispela pasin ol i mekim bikpela tok bilas, ¹⁹ tasol yu marimari long ol na yu i no lusim ol long ples drai, nogat, long san bikpela klaut i no save lusim ol na long nait bikpela paia i no save lusim ol bilong soim rot long ol i go. ²⁰ Gutpela spirit bilong yu, yu givim long stiaim ol na mana yu givim ol long kaikai, wara yu givim ol taim nek bilong ol i drai. ²¹ Long 40-yia yu lukautim ol long ples nating na ol i no sot long wanpela samting. Ol klos bilong ol i no bagarap na lek bilong ol i no solap. ²² Yu givim ol kantri na ol manmeri, na yu givim ol olgeta hap graun . Na ol i kisim graun bilong Sion king bilong Hesbon na ol graun bilong Ok king bilong Basan. ²³ Yu mekim ol pikinini bilong ol i kamap planti olsem sta long heven na yu bringim ol i go insait long graun yu i bin promis long givim ol tumbuna bilong ol. ²⁴ Olsem na ol manmeri i go insait na kisim graun na yu go pas na daunim ol Kenan. Yu putim ol manmeri wantaim ol king bilong ol long han bilong ol Israel bai ol i ken mekim wanem ol i laik mekim long ol. ²⁵ Na ol i kisim ol taun i gat strongpela banis na graun i gat planti gris na ol haus i gat planti samting i pulap long ol. Na ol i kisim ol hulwara, ol gaden wain, ol diwai oliv na planti pikinini kaikai bilong ol diwai. Ol i kaikai na i kamap bikpela tru, olsem na ol i amamas long gutpela pasin bilong yu. ²⁶ Na ol i kamap lain bilong sakim tok bilong yu. Ol i givim baksait long lo bilong yu. Ol profet bilong, yu i tokim ol long kam bek long yu tasol ol i kilim ol na mekim sin bilong tok bilas. ²⁷ Olsem na yu putim ol long han bilong ol birua na ol i mekim nogut long ol. Long taim ol i stap long hevi, ol i krai long yu na yu harim ol long heven long bikpela marimari bilong yu na yu salim ol man long helpim ol, long han bilong ol birua, long wanem yu gat bikpela sori long ol. ²⁸ Tasol bihain long ol i malolo, ol i mekim pasin nogut gen long yu na yu putim ol long han bilong ol birua, olsem na ol birua i bosim ol. Tasol taim ol i kam bek na ol i krai strong long yu, yu harim long heven na olgeta taim yu save sori long ol na helpim ol. ²⁹ Yu givim tok lukaut long ol bai ol i kam bek long yu. Tasol ol i sakim na ol i no harim tok bilong yu. Ol i mekim sin na i no bihainim lo bilong yu save givim laip long ol man i save bihainim. Ol i strongim bel bilong ol na ol i no laik bihainim lo bilong yu. ³⁰ Long planti yia yu save isi long ol na tok save long ol long spirit bilong ol profet bilong yu. Tasol ol i no save harim tok. Olsem na yu putim ol long han bilong ol narapela lain. ³¹ Tasol long bikpela marimari bilong yu, yu no save mekim nogut long ol na pinisim ol olgeta long wanem, yu God bilong sori na marimari. ³² Olsem na God bilong mipela, yu bikpela na strongpela God i save bihainim kontrak bilong yu long pasin bilong marimari, yu noken ting dispela hevi i kamap long mipela na ol king bilong mipela, ol profet bilong mipela, na ol lain bilong mipela na long ol manmeri bilong yu em i liklik samting inap long taim bilong king bilong Asiria i kam inap nau. ³³ Yu save mekim stretpela pasin long mipela na oltaim yu save mekim gutpela pasin, tasol mipela i mekim pasin nogut long yu. ³⁴ Ol king bilong mipela na ol pikinini bilong king na ol pris na ol lain bilong mipela i no bihainim lo bilong yu na aninit long tok na kontrak yu bin mekim wantaim ol. ³⁵ Ol i stap long ples bilong ol yet na ol i amamas long ol gutpela pasin bilong yu long ol. Yu givim ol bikpela graun i gat gris tasol ol i no lusim ol pasin nogut bilong ol na lotu long yu. ³⁶ Nau mipela i stap kalabus long graun yu bin givim long ol tumbuna bilong mipela long kisim kaikai long en na amamas, tasol mipela i stap kalabus yet insait long en. ³⁷ Olgeta gutpela kaikai long graun bilong mipela i go long ol king yu putim long bosim mipela long wanem mipela i mekim sin. Ol i bosim mipela na ol samting bilong mipela olsem na mipela i stap long bikpela hevi tru. ³⁸ Olsem na long olgeta pasin bilong mipela, mipela i raitim wanpela kontrak. Antap long dispela kontrak mipela i raitim na pasim insait long en ol nem bilong ol pikinini bilong king, ol Livai na pris.