¹ Dispela em tok bilong God Yawe i kam long Maika man bilong biktaun Moras long taim bilong Jotam, Ahas na Hesekia, ol i stap king bilong Juda, em i bin lukim wanem samting bai kamap long Samaria na Jerusalem. ² Harim gut, yupela ol manmeri bilong olgeta hap graun. Harim gut, olgeta samting i stap insait long en. Bikpela God Yawe i stap long haus holi bilong em long heven bai i kotim yupela. ³ Harim, God Yawe i kamaut long ples holi bilong em na bai i kam daun na bagarapim ol ples i stap antap we yupela i save lotuim giaman God. ⁴ Ol maunten bai kamap wara nating taim em i wokabaut antap long en, ol ples daun bai bruk nabaut olsem paia i kukim na olsem wara i kapsait na ron i go daun na drai. ⁵ As bilong ol dispela samting i kamap em long ol sin bilong pikinini lain bilongJekop na bilong ol manmeri Israel. Wanem sin bilong ol pikinini lain bilong Jekop? Ating em i no ol Samaria, a? Long wanem hap bilong ol Juda em ples i antap bilong mekim giaman lotu? Ating em i no Jerusalem, a? ⁶ "Bai mi mekim Samaria i kamap olsem graun i pulap long pipia na em bai i olsem wanpela ples bilong planim ol gaden wain na bai mi brukim daun ol ston bilong em i go long ples daun na bai mi rausim olgeta samting i save strongim em. ⁷ Olgeta giaman piksa em i mekim long diwai, em bai i bruk i go liklik na olgeta gutpela presen em i kisim bai paia i kukim na bai mi bagarapim ol giaman god bilong em. Long taim em i stat long kisim ol dispela presen bilong em, em kisim ol dispela samting long rot bilong mekim pasin pamuk, ol bai kamap olsem pei bilong mekim pasin pamuk gen." ⁸ Long dispela as tasol bai mi singaut na krai na bai mi go lek na skin nating. Bai mi krai olsem ol wel dok na pisin bilong nait. ⁹ Sua bilong em bai i no inap pinis, long wanem em i bin kam long Juda. Long wanem em i bin kamap long dua bilong ol manmeri bilong mi long Jerusalem. ¹⁰ Noken stori long dispela samting long Gat, noken krai tu. Long Bet Leafra mi tanim tanim mi yet long das. ¹¹ Abrusim em na i go, ol lain bilong Saphi, ol i as nating na sem wantaim. Ol lain bilong Sanan noken kamaut. Bet Esel i krai na sori, long wanem ol i rausim olgeta banis bilong ol na karim i go. ¹² Ol lain manmeri bilong Marot i les long weit longpela taim long harim gutnius, long wanem bikpela bagarap bai i kam long God Yawe na i go long olgeta dua bilong Jerusalem. ¹³ Ol lain bilong Lakis yupela pasim ol rop long karis bilong ol hos. Yupela lain manmeri bilong Lakis, long wanem sin i bin stat long yu pikinini meri bilong Saion, long wanem ol i panim sin bilong Israel long yu. ¹⁴ Olsem na bai yupela i givim presen bilong lusim Moreset Gat, em taun bilong Aksib bai givim hevi long ol king bilong ol Israel. ¹⁵ Yupela ol manmeri bilong Maresa, mi bai kisim gen wanpela man bilong pait na winim yupela na ol gutpela samting bilong Israel bai kam long Adulam. ¹⁶ Yupela rausim hetgras bilong yupela na sori long ol pikinini yupela i save laikim em. Na katim hetgras bilong yupela na mekim yupela kamap olsem tarangau, long wanem ol pikinini bai lusim yupela na i go stap olsem ol kabusman long narapela ples.