¹ God Yawe i toktok long Moses, na tok olsem, ² "Tokim ol lain manmeri bilong Israel olsem, yupela i mas stap holi, olsem mi God Yawe bilong yupela i holi. ³ Olgeta lain i mas aninit long mama na papa, na lukautim Sabat bilong mi. Mi God Yawe bilong yupela. ⁴ Noken bihainim god giaman, o noken mekim god giaman long ol ain. Mi God Yawe bilong yupela. ⁵ Taim yu givim ofa bilong yu long lotuim God Yawe, yu mas givim i go na em bai wanbel wantaim yu. ⁶ Yu mas kaikai long dispela dei yu givim ofa , o long narapela dei. Sapos sampela i stap i go long namba tri dei, yu mas kukim long paia. ⁷ Sapos dispela i stap igo inap long namba tri dei na yu kaikai,em ino gutpela abus,yu noken kaikai. ⁸ Na olgeta lain i kaikai dispela ol i mas karim hevi bilong ol yet bilong wanem ol i bagarapim samting i holi long God Yawe, olsem na ol i mas rausim dispela man i go longwe long ol lain man meri bilong em. ⁹ Sapos yu kisim kaikai long gaden bilong yu, yu mas larim liklik istap long arere bilong gaden. Yu ino ken kisim olgeta kaikai. ¹⁰ Yu noken kisim olgeta kaikai bilong wain long gaden, na yu noken kisim ol dispela kaikai wain i pundaun long gaden bilong yu. Dispela em i bilong ol tarangu lain na ol arapela lain manmeri. Mi God Yawe bilong yupela. ¹¹ Noken stil. Noken giaman. Noken paulim ol manmeri long tok ino gat kaikai bilong en. ¹² Noken mekim giaman promis long nem bilong Mi na bagarapim Nem bilong God Yawe bilong yu. Mi yet mi God Yawe. ¹³ Noken daunim wantok bilong yu na stil long em. Na noken holim pei bilong ol wokman istap i go painim nait na igo long narapela moning. ¹⁴ Noken tok nogut long ol iau pas na noken putim hevi long ol ai pas. Tasol, yu mas pret long God bilong yu. Mi yet mi God Yawe. ¹⁵ Yu noken mekim giaman kot. Yu noken wansait long ol tarangu man, na yu noken wansait long ol man igat namba . Tasol, mekim stretpela kot long ol lain istap klostu long yu. ¹⁶ Yu noken wokabaut i go i kam na tok baksait namel long ol manmeri. Tasol, yu mas wok hat long helpim ol lain istap lostu long yu. Mi God Yawe. ¹⁷ Yu noken holim rong bilong brata bilong yu long bel bilong yu. Yu mas tok strong long helpim man istap klostu long yu long ol pasin nogut bilong em olsem sin bilong em i no inap pas long yu. ¹⁸ Yu noken bekim bek, o yu noken holim rong bilong ol wan lain bilong yu, tasol yu mas laikim ol olsem yu laikim yu yet. Mi yet mi God Yawe. ¹⁹ Yu mas lukautim lo bilong mi. Yu noken lukautim wanpela animol wantaim arapela kain animol. Noken bungim tupela arapela sit wantaim taim yu planim ol long gaden. Noken werim klos ol i mekim long tupela arapela kain laplap. ²⁰ Husait i slip wantaim yangpela wok meri ol i makim pinis long maritim man, tasol ol ino baim em yet o mekim em fri, ol i mas mekim save long tupela. Noken kilim ol i dai bilong wanem yangpela meri ino stap fri. ²¹ Man i mas kisim ofa bilong asua bilong em igo long God Yawe long dua bilong haus sel bilong bung. Kisim wanpela man meme bilong ofa bilong ausa. ²² Bihain bai Pris i mekim ofa bilong baim bek man wantaim man meme olsem ofa igo long God Yawe, bilong sin em i mekim pinis. Bai dispela sin em i mekim i ken pinis. ²³ Taim yu kam insait long dispela graun na planim pinis ol diwai i save karim kaikai, nau yu mas tambuim ol pikinini kaikai.Yu mas tambu i stap inap 3-pela yia. Noken kaikai ol dispela pikinini kaikai. ²⁴ Tasol long namba 4- yia olgeta pikinini kaikai mas holi, olsem ofa bilong litimapim nem blong God Yawe. ²⁵ Long namba 5- yia yu ken kaikai pikinini kaikai, olsem yu bin wet na ol diwai i karim planti moa pikinini kaikai. Mi God Yawe bilong yu. ²⁶ Noken kaikai ol kain mit i gat blut istap yet long en. Noken askim ol tevel long save long tumoro, na noken painim ol kain pawa long bosim ol arapela. ²⁷ Yu bai i no inap katim ol gras i raunim ol sait bilong het bilong yu o katim sot ol lonpela bilong maus gras bilong yu. ²⁸ Yu noken katim bodi bilong yu long makim dai o putim tatu mak long bodi bilong yu. Mi yet mi God Yawe. ²⁹ Noken bagarapim pikinini meri bilong yu na mekim em i kamap olsem pamuk meri, o olgeta lain manmeri bai i pundaun long pasin pamuk na ples bai pulap long ol pasin nogut. ³⁰ Yu mas lukautim dei Sabat bilong mi na daunim yu yet long ples tambu bilong lotu long haus sel bilong mi. Mi yet, mi God Yawe. ³¹ Noken bihainim ol man i save toktok wantaim ol dai man na wantaim ol tevel. Noken painim helpim long ol, o ol bai mekim yu doti. Mi God Yawe bilong yu. ³² Yu mas stap aninit long ol lapun man i gat wait gras na aninit long ol lapun man istap wantaim yumi. Yu mas poret long God bilong yu. Mi God Yawe. ³³ Sapos man bilong narapela hap i stap long graun bilong yu, yu noken mekim nogut long em. ³⁴ Man bilong narapela hap istap wantaim yu em i wankain olsem as ples pikinini Israel na yu mas laikim em olsem yu laikim yu yet, bilong wanem yu bin stap olsem narapela lain long ples Isip. Mi God Yawe, God bilong yu. ³⁵ Noken yusim giaman mak bilong makim long sekim longpela, hevi o namba bilong ol samting. ³⁶ Yu mas makim stret, skelim stret, kauntim stret. Mi God Yawe, God bilong yu, husait i kisim yu i kam aut long Isip. ³⁷ Yu mas bihainim olgeta toktok na lo bilong mi na mekim olsem. Mi yet mi God Yawe."