¹ God Yawe i toktok long Moses na tok, ² "Dispela em bai i kamap lo bilong man i kamap orait taim em i gat sik long skin bilong em. Em i mas kam long Pris. "Dispela bai i kamap lo bilong man igat sik long dei bilong sik bilong em i pinis. ³ Pris bai i go aut long kemp long sekim na lukim sapos skin sua bilong man i pinis. ⁴ Orait Pris bai tokim man i kamap klin na kisim tupela pisin i gat laip, wantaim sida diwai, rop igat retpela kala, na isop diwai. ⁵ Pris bai tokim em long kilim wanpela bilong ol dispela pisin antap long klinpela wara i stap pinis insait long sospen graun. ⁶ Orait Pris bai i kisim pisin i stap laip wantaim sida diwai na rop i gat retpela kala na isop diwai na em bai putim tupela pisin i gat laip i go insait long blut bilong pisin ol i bin kilim antap long klin pela wara. ⁷ Orait na Pris bai tromoi dispela wara 7-pela taim antap long dispela man bai kamap orait, nau Pris bai tokaut long em i kamap klin. Na Pris bai lusim dispela pisin i gat laip i flai i go. ⁸ Dispela man husait i bin kamap klin em bai wasim ol kolos bilong em na katim olgeta gras bilong em na wasim em yet long wara, orait na em bai i kamap klin. Bihain long dispela em mas kam long kemp, tasol em bai stap autsait long haus sel bilong em 7-pela dei. ⁹ Long namba 7-dei em i mas katim olgeta gras long het bilong em na tu em i mas katim olgeta maus gras na ol ai gras bilong em. Em i mas katim olgeta gras bilong em, na em i mas wasim ol kolos bilong em na waswas long wara, na em bai kamap klin. ¹⁰ Long namba 8-dei em i mas kisim tupela man sipsip i nogat mak long skin bilong ol wantaim wanpela meri sipsip i gat wanpela krimas bilong en na i nogat mak long skin bilong em na tripela 10-efa wantaim gutpela plawa ol i tanim wantaim wel i olsem ofa kaikai na wanpela diwai wel. ¹¹ Pris husait i bin mekim em i kamap klin, em bai sanapim dispela man husait i kamap klin, wantaim ol dispela samting, long pes bilong God Yawe long rot i go insait long haus sel bilong bung. ¹² Pris bai kisim wanpela man sipsip na mekim ofa olsem ofa bilong man i asua pinis, wantaim dis wel, em bai mekim ofa i go long God Yawe. ¹³ Em i mas kilim man sipsip long ples wei ol i save kilim ol sin ofa na ol ofa bilong kukim long paia, insait long haus sel, ol abus bilong sin ofa em bilong ol Pris, wantaim ol ofa bilong man i mekim nogut, long wanem em i holi olgeta. ¹⁴ Pris bai kisim sampela blut bilong mekim ofa long man i gat asua na putim antap long han sut yau bilong man husait bai i kamap klin. Na tu em bai i putim antap long namba wan pinga bilong han sut bilong em na long namba wan pinga long leg sut bilong em. ¹⁵ Orait Pris bai kisim wel long diwai dis na kapsaitim long han kais bilong em, ¹⁶ na putim pinga bilong em i stap long han sut bilong em igo insait long wel wei i stap long han kais bilong em na tromoi i go long pes bilong God Yawe 7-pela taim. ¹⁷ Pris bai i putim ol hap wel long han bilong em antap long yau i stap long han sut bilong man husait em bai kamap klin na antap long namba wan pinga i stap long lek sut na antap long bikpela pinga i stap long han sut. Em i mas putim dispela wel antap long blut bilong mekim ofa bilong man i gat asua. ¹⁸ Taim sampela wel i stap yet long han bilong Pris, em bai putim antap long het bilong man husait bai kamap klin, na Pris bai mekim wok bilong rausim sin bilong em long kamap klin pastaim long God Yawe. ¹⁹ Orait na Pris bai mekim ofa bilong sin na mekim wok bilong rausim sin bilong man husait bai kamap klin, bilong wanem long pasin nogut bilong em na bihian em bai kilim abus bilong kukim olgeta long paia. ²⁰ Nau Pris bai mekim ofa bilong kukim olgeta na ol pikinini kaikai bilong wit antap long alta. Prist bai mekim wok bilong rausim sin bilong em, na em bai i kamap klin. ²¹ Olsem tasol, sapos man em i nogat ol dispela samting long kisim i kam long dispela ofa, em i mas kisim wanpela man sipsip olsem ofa bilong man i mekim asua pinis, long mekim klin long em yet, na wan 10-pela efa na gutpela plawa ol i tanim gut wantaim wel na pikinini diwai bilong mekim ofa na dis wel wantaim. ²² wantaim tupela balus pisin o narapela tupela pisin wankain olsem, inap long em bai kisim; wanpela bai i mekim sin ofa na narapela bai i mekim ofa bilong kukim long paia. ²³ Long namba 8-dei em i mas kisim i kam long Pris long klinim em yet, long dua bilong haus sel ol i save bung long en long ai bilong God Yawe. ²⁴ Pris bai kisim sipsip bilong mekim ofa na em bai kisim oliv wel wantaim na em bai apim igo antap olsem em i givim i go long God Yawe. ²⁵ Em bai kilim sipsip bilong mekim ofa bilong man i mekim asua pinis, na em bai kisim sampela blut na putim antap long yau i stap long han sut bilong man husait bai i kamap klin na antap long namba wan pinga i stap long han sut bilong em na bikpela pinga long leg sut bilong em. ²⁶ Orait na Pris bai kapsaitim sampela wel insait long han kais bilong em yet. ²⁷ na em bai tromoi i go i kam long han sut pinga bilong em na sampela wel i stap yet long han kais 7-pela taim long ai bilong God Yawe. ²⁸ Nau Pris bai putim sampela wel stap yet long han bilong em antap long han sut yau bilong man husait bai i kamap klin, antap long bikpela han pinga bilong han sut, na bikpela leg pinga bilong han sut leg, long wankain ples tasol wei em i bin putim blut ofa bilong man i mekim asua pinis. ²⁹ Em bai putim ol hap wel i stap long han antap long man husait bai kamap klin, long mekim pasin bilong rausim sin na kamap orait long ai bilong God Yawe. ³⁰ Em i mas mekim ofa long wanpela balus pisin o yangpela pisin, i wankain olsem man bai inap long kisim. ³¹ wanpela olsem sin ofa na wanpela bilong kukim ofa, wantaim wit ofa. Pris bai mekim wok bilong rausim sin bilong man husait bai kamap klin long ai bilong God Yawe. ³² Dispela em lo bilong man husait i gat skin sua, wei man i no gat inap samting long mekim em yet i kamap klin." ³³ God Yawe i toktok long Moses na long Aron, na i tok. ³⁴ "Taim yu kam kamap long graun Kenan wei mi bin givim yu long kamap olsem bilong yu yet, na sapos mi putim binatang bilong bagarap igo i kam long ol haus na ol graun yu bosim, ³⁵ na husait em papa bilong haus em mas kam tokim Pris. Em mas tok, mi lukim olsem binatang bilong bagarapim ol samting insait long haus bilong mi,' ³⁶ Nau Pris bai tokim ol long rausim olgeta samting long haus pastaim long em bai go insait long sekim na lukim dispela bagarap bilong binatang, em mas nogat samting long haus long luk nogut. Bihain long dispela Pris bai go insait long lukim haus. ³⁷ Em mas sekim na lukim gut dispela bagarap bilong binatang long wol bilong haus, na lukim i gat sampela grin o retpela samting i mekim igo daun arere long haus wol. ³⁸ Sapos haus i nogat bagarap bilong binatang, nau Pris bai i go aut sait na pasim dua bilong dispela haus i stap 7-pela dei. ³⁹ Nau Pris bai kam bek bihain long 7-pela dei long sekim na lukim bagarap bilong binatang i go i kam long wol bilong haus. ⁴⁰ Sapos em i stap, nau Pris bai tokim ol long rausim ol ston wei em i painim ol bagarap bilong binatang i stap na tromoi i go aut sait long ples pipia bilong biktaun. ⁴¹ Em bai tokim long sekim olgeta wol insait long haus long ol bai sikirapim , na ol i mas kisim ol samting wei bagarap i pas long en na sikirapim autsait long biktaun na tromoi long hap ol i save tromoi pipia long en. ⁴² Ol mas kisim ol narapela ston na putim long ples wei ol i rausim pinis long en, na ol i mas kisim nupela graun malomalo na pasim antap long haus. ⁴³ Sapos binatang bilong bagarap kam na mekim i go insait long haus wei ol i bin rausim ol ston i go na haus wol ol i sikirapim long en ol i mas pasim bek, ⁴⁴ nau Pris mas kam na sekim haus na lukim bagarap bilong binatang stap long haus. Sapos em i stap, orait em binatang bilong bagarapim man, na haus em i no klin. ⁴⁵ Ol i mas brukim haus i go daun. Ol ston. na diwai, na ol samting ol i pasim long haus long en ol i mas karim i go lusim long pipia ples autsait long biktaun. ⁴⁶ Antap long en, husait yupela i go insait long haus taim ol i pasim pinis long en em bai kamap doti inap apinun. ⁴⁷ Husait slip long dispela haus mas wasim kolos bilong em, na husait i kaikai long dispela haus mas wasim kolos bilong em. ⁴⁸ Sapos Pris i go insait long haus long sekim long lukim sapos bagarap bilong binatang i stap long haus pastaim ol i pasim long en na sapos binatang i go pinis, em bai tokaut olsem haus i klin. ⁴⁹ Nau Pris mas kisim tupela pisin bilong mekim haus kamap klin, na sida diwai,retpela rop, na isop diwai lip. ⁵⁰ Em bai kilim wanpela bilong ol pisin antap long graun sospen i gat klinpela wara. ⁵¹ Em bai kisim sida diwai, lip diwai isop, retpela rop, na pisin istap laip, na putim ol insait long blut bilong pisin ol i kilim, na putim i go insait long klinpela wara, na tromoi i go kam long haus 7-pela taim. ⁵² Em bai klinim haus wantaim blut bilong pisin na klinpela wara ,wantaim laip pisin, sida diwai, lip isop na retpela rop. ⁵³ Tasol em bai larim pisin i gat laip i go aut long biktaun ples i op long en. Long dispela pasin tasol em bai mekim haus i kamap klin, na haus bai kamap klin. ⁵⁴ Dispela em lo bilong ol man gat kainkain skin sua long skin, sua olsem sua bilong skin sikirap, ⁵⁵ na bilong ol binatang save bagarapim kolos na insait long haus, ⁵⁶ bilong ol buksua,na ol grile sua na bikpela ol sua, ⁵⁷ long luksave olsem dispela ol sua samting em i doti o taim em stap klin long en. Dispela em lo bilong ol man i gat pinis kainkain skin sua na binatang bilong bagarap."