¹ Nau tok bilong God Yawe i kam long Jona pikinini man bilong Amitai na i tok, ² "Kirap na go long Ninive, dispela bikpela taun na tokaut strong long ol olsem, long wanem ol i mekim pasin nogut i kamap bikpela tru long ai bilong mi," ³ Tasol Jona i kirap na i laik ranawe long ai bilong God Yawe na igo long Tarsis. Em igo daun long Jopa na painim sip long go long Tarsis. Olsem na em i baim mani na kalap long sip long go long Tarsis, long ranawe long ai bilong God Yawe. ⁴ Tasol God Yawe i salim bikpela win antap long solwara na bikpela win i kamap strong moa antap long solwara. I no longpela taim na sip i laik bruk. ⁵ Orait, ol wokman bilong sip i kirap na pret nogut tru na wanwan i singaut long god bilong ol yet, ol i tromoi olgeta kago long sip igo daun long solwara long mekim sip ino hevi moa. Tasol Jona igo daun insait tru long sip na em i slip indai tru. ⁶ Orait nau kepten i kam long em na i tokim em, " Yu mekim wanem na slip? kirap! Singaut long god bilong yu! Ating god bilong yu bai tingim mipela na mipela ino inap i go lus olgeta. ⁷ Olgeta i tok long wanpela na arapela, "kam, Yumi i mas rausim olgeta kas, olsem na yumi inap save husait i mekim pasin nogut tru i kamap long mipela." ol i tromoi kas na olgeta kas i pundaun long Jona. ⁸ Nau ol i tokim Jona, "Plis tokim mipela husait i mekim ol dispela pasin nogut i kamap long mipela. Wanem em i wok bilong yu na yu kam long wanem hap? Yu bilong wanem kantri na bilong wanem lain manmeri?" ⁹ Jona i tokim ol, "Mi man bilong Hibru na mi gat pret bilong God Yawe, God bilong heven husait i bin mekim solwara na drai graun." ¹⁰ Orait ol man i pret moa yet na i tokim Jona, " Dispela em wanem samting yu bin mekim?" Dispela ol man i save olsem em i bin ranawe long ai bilong God Yawe, bilong wanem em i bin tokim ol. ¹¹ Na ol i tokim Jona," Mipela bai mekim wanem long yu bai solwara i slip isi long mipela?" Na solwara igo bikpela moa na i hevi tru. ¹² Jona i tokim ol, "Kisim mi na tromoi mi igo daun long solwara. Na solwara bai slip igo daun, mi save long wanem long mi tasol na solwara i kirap olsem long yupela." ¹³ Em orait tasol, ol man i hat long go bek long graun nating, tasol ol ino inap long mekim olsem bilong wanem solwara i kirap igo bikpela moa long ol. ¹⁴ Olsem na ol i krai bikmaus igo long God Yawe na i tok, "Mipela askim yu, God Yawe,mipela askim yu, yu no ken bagarapim mipela taim mipela tromoi dispela man long solwara, noken putim hevi bilong dai bilong em long mipela, bilong wanem God Yawe yu mekim olsem wanem yu laik mekim. ¹⁵ Nau ol i kisim Jona na tromoi em igo long solwara na solwara i slip igo daun. ¹⁶ Orait ol man i pret nogut tru long God Yawe. Ol i mekim ofa igo long God Yawe na mekim promis long em. ¹⁷ Na nau God Yawe i redim bikpela pis long daunim Jona na Jona istap long bel bilong pis inap tripela dei na tripela nait.