¹ Long dispela dei Debora na Barak pikinini man bilong Abinoam i singim dispela song: ² "Taim ol lida bilong Israel i go pas long ol Israel na taim ol manmeri i amamas tru long pait nating- yumi litimapim nem bilong God Yawe! ³ Yupela ol king harim, yupela ol lida putim ia gut na harim, bai mi singim song long God Yawe na bai mi singim song bilong litimapim nem bilong God Yawe, God bilong ol Israel. ⁴ God Yawe, taim yu go autsait long Seir, taim yu wokabaut long Idom, graun i guria, skai tu i guria na klaut tu i kapsaitim wara i kam daun. ⁵ Ol maunten i guria taim God Yawe i wokabaut i kam, maunten Sinai tu i guria long pes bilong God Yawe, God bilong ol Israel. ⁶ Long taim bilong Samga pikinini man bilong Anat, long taim bilong Jael, ol manmeri i no moa wokabaut long ol bikpela rot na husait ol i wokabaut ol i yusim ol liklik rot tasol. ⁷ I gat ol liklik lain ples manmeri i stap insait long Israel, inap mi Debora i kirap, kirap olsem mama insait long Israel. ⁸ Taim ol i stat long bihainim ol nupela god, i bin i gat pait long ol rot i go insait long dua bilong biktaun na tu ol i no bin lukim hap plang o spia insait long 40 tausen soldia bilong Israel. ⁹ Bel bilong mi i stap wantaim ol man i go pas long pait long Israel wantaim ol man husait i amamas tru long pait, yumi givim biknem long God Yawe long ol. ¹⁰ Tingim dispela, yupela husait i sindaun antap long waitpela donki i gat gutpela mat bilong sindaun na yupela husait i save wokabaut long rot. ¹¹ Harim nek bilong ol lain husait i singsing arere long hul wara. Ol i tokaut gen long stretpela pasin bilong God Yawe i mekim na stretpela pasin bilong ol man bilong pait long Israel. Orait ol manmeri bilong God Yawe i go daun long dua bilong ol biktaun. ¹² Kirap, kirap Debora! Kirap, kirap na singim song. Kirap Barak, yu pikinini man bilong Abinoam, kirap na holim pasim ol kalabus man bilong yu. ¹³ Ol man i stap laip yet, ol i kam daun long ol hetman. Ol man bilong pait wantaim ol manmeri bilong God Yawe i kam daun long mi. ¹⁴ Ol i kam long Efraim, we asples bilong ol i stap long Amelek, ol manmeri bilong Benjamin i bihainim yu. Long Makir ol opisa bilong ami i kam daun na long Sebulun ol lain husait ol i kisim opisa bilong ami i go. ¹⁵ Ol het man bilong lain tumbuna bilong Isaka ol i kam bung wantaim Barak na mi. Ol i hariap na bihainim em i go long wanpela ples daun. Namel long ol lain bilong Ruben, ol i no save bai ol i mekim wanem samting. ¹⁶ Bilong wanem yupela sindaun namel long ol paia ples, harim ol wasman bilong sipsip i pilai musik long ol sipsip bilong ol. Ol lain bilong Ruben ol i no save bai ol i mekim wanem samting. ¹⁷ Giliat i stap narapela sait bilong Jodan na Dan, bilong wanem na em i raun nating antap long ol sip i stap? Asa i stap long nambis na i stap klostu long ol ples we sip i save sua long en. ¹⁸ Long ples bilong pait, ol lain Jebulun i save lusim laip bilong ol na strong long pait na ol lain bilong Naptali tu i save stap redi long pait. ¹⁹ Olgeta king i kam na pait, ol king bilong Kenan i kam pait long Tanak klostu long ol wara bilong Megido. Tasol ol i no kisim silva samting namel long pait na i go. ²⁰ Ol sta i kisim ples bilong mipeIa na pait long heven long rot bilong ol long skai na i pait wantaim ol Sisera. ²¹ Wara Kison i karim ol i go pinis, dispela olpela wara em wara Kison, Mi tokim mi yet long sanap strong na wokabaut. ²² Ol hos i kam wantaim nois bilong lek na ol i kalap wantaim strong bilong ol. ²³ Ensel bilong God Yawe i mekim strongpela tok bilong bagarapim ples Meros, em i mekim tok bilong bagarapim ol manmeri i stap long dispela ples, bilong wanem ol i no kam long helpim God Yawe. Ol i no kam long helpim God Yawe long pait wantaim ol strongpela man bilong pait. ²⁴ Namel long olgeta meri, God i mekim gut long Jael. Jael em i meri bilong Heba man long Kenai. Namel long olgeta meri i save stap long haus sel, God i mekim gut moa yet long Jael. ²⁵ Na dispela man i askim long wara na em i givim milk long em na em i putim bata long dis wankain olsem pikinini meri bilong king i save kaikai na kam givim long em. ²⁶ Em i putim han bilong en long pek bilong haus sel na hansut bilong en,em i holim hama bilong wokman, wantaim dispela hama em i paitim na brukim het bilong sisera. Em i paitim Sisera wantaim hama na brukim het bilong em. Em i brukim het bun bilong Sisera i go liklik liklik taim em i sutim em long het i go kamap long narapela sait. ²⁷ Em i pundaun namel long lek bilong em, em i pundaun na silip i go daun long hap. Namel long lek bilong em, em i pilim na kalapkalap. Long dispela ples em i pundaun long en ol i bin kilim em. ²⁸ Long windo bilong en em i lukluk i go autsait. Mama bilong Sisera i lukluk long liklik hul long haus na i singaut wantaim wari, 'Bilong wanem em i kisim karis bilong em i go longwe hap na i no kam? Bilong wanem na lek bilong hos i save pulim karis bilong en i stap longpela taim? ²⁹ Na meri i gat gutpela tingting i bekim na em yet i givim wankain ensa. ³⁰ Ating yupela i no painim na skelim ol stil samting? Wanpela meri o tupela meri long olgeta man, olsem gutpela kala laplap ol i winim long pait na karim bilong Sisera i kam, ol i mekim gutpela laplap ol i wokim long han na putim long nek bilong ol meri, a?' ³¹ Olsem na olgeta birua bilong yu bai i bagarap, God Yawe! Tasol ol pren bilong yu ol i olsem san taim em i kam antap wantaim strong bilong en." Orait na dispela ples i gat gutpela sindaun na bel isi long 40 yia olgeta.