¹ Bihain long Ehut i dai, ol lain manmeri bilong Israel i givim baksait long God Yawe na mekim pasin nogut gen long ai bilong God Yawe. ² God Yawe i larim ol i go long han bilong Jabin em King bilong Kenan i save stap long taun Hasor. Nem bilong nambawan opisa bilong ami em Sisera, em i save stap long taun Haroset Hagoim. ³ Ol manmeri bilong Israel i singaut long God Yawe long helpim ol, bilong wanem Sisera i gat 900 ain karis na em i save pait na mekim nogut long lain manmeri bilong Israel long 20 yia olgeta. ⁴ Wanpela profet meri, nem bilong en Debora (em meri bilong Lapidot) i wok long givim tingting long ol hetman bilong Israel long dispela taim. ⁵ Em i save sindaun aninit long diwai pam bilong Debora namel long Rama na Betel antap long ples maunten bilong Efraim na ol manmeri bilong Israel i save kam long em long stretim toktok na hevi namel long ol yet. ⁶ Em i singaut long Barak, pikinini man bilong Abinoam bilong Kades long Naptali. Em i tokim em, "God Yawe, God bilong Israel i tok long yu olsem, 'Yu mas kisim 10,000 man bilong lain Naptali wantaim Sebulun na go long maunten Tabor. ⁷ Mi bai kisim Sisera, Ami opisa bilong Jabin i kam bungim yu long wara Kison wantaim karis na ami bilong en, tasol mi bai givim ol long han bilong yupela.'" ⁸ Barak i tokim em, "Sapos yu kam wantaim mi orait bai mi go. Tasol, sapos yu no kam wantaim mi bai mi no inap i go. ⁹ Na Debora i tok, "Em orait mi bai go wantaim yu, tasol long dispela rot nau yu go long en, yu no inap kisim biknem, long wanem, God Yawe bai givim Sisera i go long han bilong wanpela meri." Orait Debora i go wantaim Barak long Kades. ¹⁰ Orait Barak i singautim ol man bilong Sebulun na Naptali long kam bung long Kades. 10,000 man i bihainim em na Debora tu i go wantaim ol. ¹¹ Heber ( Kena) i lusim ol lain Kena na stap em yet. Ol lain Kena i lain tumbuna bilong Hobab (em tambu papa bilong Moses) na em i wokim haus sel klostu liklik long diwai ok, long ples Sananim klostu long ples Kades. ¹² Taim ol i tokim Sisera olsem, Barak pikinini man bilong Abinoam i go antap pinis long Maunten Tabor, ¹³ Sisera i singautim olgeta ami bilong em, 900 ain karis na olgeta ami husait ol i bin i stap wantaim em, long ples Haroset Hagoyim i go long wara Kison. ¹⁴ Debora i tokim Barak olsem, " go! Long wanem, dispela dei em God Yawe i putim Sisera long han bilong yu na bai yu winim em. Ating God Yawe i no go pas long yu a? Olsem na Barak i go daun long Maunten Tabor wantaim 10,000 man husait i bihainim em. ¹⁵ God Yawe i mekim Sisera na olgeta karis na olgeta ami bilong en i paul nabaut wantaim sap bainat. Sisera i kam daun long karis na i ranawe long lek nating. ¹⁶ Tasol Barak i ronim ol karis na ami i go inap long Haroset na Hagoim na kilim i dai olgeta ami bilong Sisera long sap bainat na nogat wanpela man i stap laip. ¹⁷ Tasol Sisera i ranawe i go long haus sel bilong Jael, meri bilong Hebes em man long Kena, long wanem i gat wanbel namel long Jabin em king bilong Hasor na famili bilong Heber man long Kenan. ¹⁸ Jael i kam bungim Sisera autsait na tokim em olsem. "Bikman, kam insait, kam insait long haus sel bilong mi na noken pret." Olsem na em i harim tok na i go insait long haus sel bilong Jael na em i karamapim em wantaim blanket. ¹⁹ Sisera i tokim em, "Plis inap yu givim mi liklik wara long dring, nek bilong mi i drai." Olsem na em i opim lid bilong skin meme i gat susu na i givim em long dring na em i karamapim blanket long em gen. ²⁰ Em i tokim Jael olsem, "Plis sanap long dua stap na sapos wanpela man i kam na askim yu, 'I gat sampela lain i stap long hia o nogat? orait, tokim ol olsem Nogat. ²¹ Orait bihain Jael (meri bilong Heber) i kisim pek bilong haus sel na hama long han bilong em, em i hait na i go insait, long wanem em i slip i dai na em i paitim strong pek bilong haus sel long sait long het bilong em inap em i go daun insait long graun na em i dai. ²² Barak i bihainim Sisera kam yet olsem na Jael i go autsait long bungim em na tokim em, "Kam na bai mi soim yu dispela man yu wok long painim." Taim em i go insait, em i lukim pek bilong haus sel insait long het bilong Sisera na em i dai stap. ²³ Olsem na long dispela dei, God i bin winim Jabin king bilong kantri Kenan long ai bilong ol lain Israel. ²⁴ Strong bilong ol lain Israel i kamap bikpela na bikpela moa long Jabin, king bilong ol Kenan i go inap ol i bagarapim na pinisim em tru.