¹ Bihain long Abimelek, Tola pikinini man bilong Pua em pikinini man bilong Dodo, man bilong Isaka husait i save stap long Sami, insait long ol liklik maunten ples bilong Efraim i kirap long helpim ol Israel. ² Em i bin lukautim ol Israel long 23- pela krismas. Em i dai na ol i planim em long Sami. ³ Jai bilong Gilet i kam bihain long em. Em i lukautim ol Israel long 22- pela krismas. ⁴ Em i gat 30- pela pikinini man husait ol i save kalap antap long 30- pela donki na ol i gat 30- pela biktaun, ol i kolim Hawot Jai i kam inap long nau, em ol stap long graun bilong Gilet. ⁵ Jai i dai na ol i planim em long Kamon. ⁶ Ol manmeri bilong Israel i go yet long mekim pasin i no stret long ai bilong God Yawe na lotuim ol giaman god Bal, Astoret, ol god bilong Aram, god bilong Sidon, god bilong Moap, god bilong ol manmeri bilong Amon na ol god bilong ol Filistai. Ol i bin lusim God Yawe na i no moa lotu long em. ⁷ God Yawe i belhat long Israel olsem na em i salim ol long han bilong ol Filistai na han bilong ol Amon. ⁸ Ol i bung na bagarapim ol manmeri bilong Israel long dispela yia na ol i mekim inap long 18- pela yia olgeta long ol lain Israel husait i stap hapsait long Joden insait long graun bilong Amon, em long Gilet. ⁹ Ol Amon i go hapsait long Joden long pait wantaim ol Juda wantaim ol Bensamin na wantaim ol lain Efraim, olsem na ol Israel i kisim bikpela wari tru. ¹⁰ Olsem na ol manmeri bilong Israel i singaut long God Yawe olsem, "Mipela i mekim sin pinis long yu, mipela i lusim God Yawe na lotuim ol giaman god Bal." ¹¹ God Yawe i tokim ol manmeri bilong Israel olsem, "Ating mi no bin kisim yupela i kam aut long han bilong ol Isip, ol Amon, ol Pilistia, ¹² na tu long ol Sidon? Ol Amalek na ol Maon i daunim yupela na yupela i bin singaut strong long mi na mi bin kisim yupela kam aut long strong bilong ol. ¹³ Na yupela i lusim mi gen na lotuim ol arapela giaman god. Olsem na mi noken mekim yet ol gutpela pasin long kisim bek yupela. ¹⁴ Yupela i go na singaut strong long ol dispela giaman god yupela i save lotuim. Larim ol i helpim yupela taim yupela i stap long hevi." ¹⁵ Na ol manmeri bilong Israel i tok olsem long God Yawe, "Mipela i mekim sin pinis. Mekim long mipela wanem yu ting em i gutpela long yu..Tasol plis, kisim bek mipela long dispela dei. ¹⁶ Ol i rausim ol arapela giaman god i stap wantaim ol na ol i lotuim God Yawe. Olsem na God Yawe i karim pen bilong ol Israel na i no moa holim rong bilong ol. ¹⁷ Na ol Amon i bung wantaim na wokim kem bilong ol long Gilet. Na ol Israel i kam bung wantaim na wokim kem bilong ol long Mispa. ¹⁸ Ol lida na manmeri bilong Gilet i toktok long wanpela narapela olsem. "Husait man bai statim pait wantaim ol Amon? Em bai kamap lida bilong olgeta manmeri i stap long Gilet."