¹ Larim mi singsing long dispela mi laikim em, mi laikim em tumas na mi singim song long wain gaden bilong em. Mi laikim em long wanem em i gat gaden wain long graun i gat gris long liklik ples maunten. ² Em i digim graun long spet na rausim ol ston i go na planim gutpela diwai wain. Em i wokim taua namel long en na tu em i wokim haus bilong memeim wain. Em i weitim wain long karim prut, tasol nogat em i karim ol wel prut wain. ³ Olsem na nau, ol lain bilong Jerusalem na ol man bilong Juda, ol i skelim wok namel long mi na gaden wain bilong mi. ⁴ Wanem moa bai i kamap long gaden wain bilong mi, wanem mi no bin mekim long em? Taim mi putim ai long em i ken karim prut, bilong wanem na em i karim ol wel prut? ⁵ Nau bai mi tokim yu long wanem samting mi laik mekim long gaden wain bilong mi. Bai mi rausim ol liklik diwai i banisim, bai mi tanim em i kamap ples bilong ol sipsip na bulmakau i kaikai long en, bai mi brukim daun na krungutim antap long en. ⁶ Bai mi larim em i stap nating na ol i no inap klinim na mekim wok gen, gras nogut na rop i gat nil bai i kamap. Na tu bai mi tokim ol klaut na ol i no inap salim ren long em. ⁷ Bilong wanem gaden wain bilong God Yawe i gat olgeta strong em haus bilong Israel na man Juda i kamap olsem gaden em i laikim tumas, em i weitm gutpela taim, tasol nogat, ol i kilim ol yet nating long stretpela pasin, tasol, inap long mekim stretpela pasin ol i singaut bilong helpim ol tasol. ⁸ Turangu long ol lain i save raun raun long olgeta haus, husait i save raun raun long ol hap graun, inap ol i no painim wanpela hap i stap na yu wanpela tasol i stap yet long graun! ⁹ God Yawe i gat olgeta strong i tokim mi, planti ol haus bai i stap nating, ol bikpela na strongpela haus tu, nogat wanpela man bai i stap. ¹⁰ Long mak bilong 10-pela bulmakau i brukim graun bilong gaden wain inap givim olsem 22-lita wain na wanpela sid ol i planim bai ol i kisim olsem 220-lita wain tasol. ¹¹ Turangu long ol lain i kirap long moning taim na i kisim strongpela dring, long ol lain husait i save raun long nait i go inap taim wain i pulap tru ol. ¹² Ol i mekim pati na pilai ol kainkain musik wantaim gita, tambarin, mambu na dring wain, tasol ol i no luksave long wok bilong God Yawe o lukluk gut long samting han bilong em i kamapim. ¹³ Long dispela as na ol manmeri bilong mi ol i sot long gutpela tingting na i stap kalabus, ol hetman bilong ol tu i stap hangre na ol manmeri i gat nem i no gat wara bilong dring. ¹⁴ Olsem tasol na hangre bilong ples bilong dai i bikpela moa na opim maus bilong em i go bikpela, ol lain i save long bikpela wok na ol manmeri na ol lida bilong ol na ol man bilong singaut nating i amamas wantaim ol, bai i go daun long ples bilong dai man. ¹⁵ Hevi man i karim i brukim beksait bilong man i go daun, inap ol manmeri i daunim ol yet, ai bilong man i save lukim em yet i antap tru bai i go daun tru. ¹⁶ God Yawe husait i go pas bai i kisim biknem long stretpela pasin bilong em, God Yawe Holi tru bai i soim em yet Holi tru wantaim gutpela na stretpela pasin bilong em. ¹⁷ Orait sipsip bai i kisim kaikai long hap olsem bilong ol yet, na long hap ples i bagarap, ol yangpela sipsip bai i kaikai olsem ol i bilong narapela lain. ¹⁸ Turangu long ol lain husait i pulim ol yet long mekim pasin nogut i olsem ol i pulim rop i no gat wok bilong em ol i pulim sin i go olsem rop bilong karis. ¹⁹ Turangu long ol lain husait i tok, ''Larim God Yawe i hariap, larim em i mekim kwik, inap mipela i ken lukim han bilong em na larim tingting hait bilong God Yawe ,Holi God bilong Israel i kam, inap mipela i ken save long ol.'' ²⁰ Turangu long ol lain i tok pasin nogut i gutpela, gutpela pasin i nogut, husait i makim tudak olsem lait na lait olsem tudak; husait i makim pait samting olsem switpela samting na switpela samting olsem pait samting! ²¹ Turangu long ol lain i tok ol i gat save long lukluk bilong ol yet na i save isi na bihainim gutpela tingting bilong ol! ²² Turangu long ol lain husait i save tok mipela i lain bilong dring moa wain na save moa long tanim ol strongpela dring, ²³ husait i no kotim man long pasin nogut bilong em na i laik kisim samting tasol long em, em i kisim ol samting bilong em tasol na larim em i go olsem man i no bin mekim rong. ²⁴ Olsem tasol tang bilong paia i save kukim olgeta samting na bagarapim olsem paia i kukim kunai i drai pinis, tasol rop bilong as bilong em bai i sting na plaua bilong em bai i go pinis olsem das. Dispela bai i kamap long wanem ol i bin lusim lo bilong God Yawe i gat olgeta strong, long wanem ol i no laikim tok bilong God Yawe, Holi God bilong Israel. ²⁵ Olsem tasol belhat bilong God Yawe i lait olsem paia namel long ol manmeri. Em i rausim han na i birua long ol na i kalabusim ol. Ol maunten i guria olsem na bodi bilong ol man i slip nambaut olsem pipia long ol rot bilong taun. Insait long ol dispela samting, kros na belhat bilong em i no go daun, nogat, han bilong em i stap olsem yet. ²⁶ Em bai i apim flek olsem mak bilong soim ol kantri i stap longwe na em bai winim wisel i go long ol lain i stap arere long dispela graun. Lukim, ol bai kam kwik na hariap tru. ²⁷ Nogat wanpela bai i bun slek na i pundaun namel long ol, nogat wanpela bai tok mi les na i slip. Nogat let bilong ol bai i lus o ol sendel bilong ol bai i bruk. ²⁸ Spia bilong ol i sap tru na ol banara bilong ol i redi, lek bilong ol hos bilong ol i olsem ston na wil bilong karis bilong ol i olsem strongpela ren na win. ²⁹ Singaut bilong ol bai i olsem laion, ol bai singaut olsem ol yangpela laion. Ol bai i krai bikmaus tru na holimpas birua na pulim em i go, bai nogat man long helpim ol. ³⁰ Long dispela dei ol bai krai singaut long birua olsem pairap bilong solwara i bruk. Sapos wanpela i lukluk i go olsem long graun, em bai lukim tasol tudak na ol i pilim pen, maski lait i stap klaut bai i karamapim olgeta.