¹ Harim gut, Bikpela God Yawe bilong olgeta manmeri i redi long rausim olgeta samting ol i save kisim strong long en wantaim olgeta kaikai na wara long Jerusalem na long Juda. ² Em bai i rausim tu ol strongpela man, ol man bilong pait, ol lida man bilong harim kot na ol profet, ol man i save kamap olsem God long mekim miracle long tokaut long wanem samting bai kam wantaim ol hetman, ³ kapten bilong ol 50 pela ami, ol as ples man i gat biknem, ol man bilong givim tingting, ol save man bilong mekim ol samting i kamap wantaim ol man i save mekim miracle. ⁴ "Mi bai makim ol yangpela boi olsem lida bilong ol na ol liklik pikinini bai i lukautim ol. ⁵ Ol manmeri bai i tingting nogut long ol wanpela narapela na long wantok bilong ol. Pikinini bai i mekim tok long daunim tingting bilong ol bikman na ol man i nogat nem bai i daunim ol man i gat biknem. ⁶ Long dispela taim, wanpela man bai i holim narapela man insait long ol lain bilong papa bilong em na bai i tok long em olsem, 'Yu gat saket, yu bai i lukautim mipela na bai yu bosim dispela ples i bagarap pinis.' ⁷ Long dispela dei, em bai i singaut na tok olsem, 'Mi bai i no inap kamap olsem man bilong helpim, long wanem mi no gat kaikai na klos olsem na yu bai i no inap long makim mi long lukautim ol manmeri.'" ⁸ Long wanem ol manmeri bilong Jerusalem i sakim tok na ol lain Juda i pundaun pinis long sin, bilong wanem toktok bilong ol wantaim pasin bilong ol i daunim God Yawe, em i no stret long ai bilong God Yawe i gat Biknem. ⁹ Pes bilong ol i tokaut olsem ol i mekim sin long ai bilong God Yawe pinis na kamap wankain olsem ol manmeri bilong Sodom na ol i no haitim sin bilong ol. Sori tru long ol dispela manmeri! Long wanem bikpela hevi i bin kam long ol. ¹⁰ Tokim stretpela man olsem God bai i mekim yu i stap gut, long wanem gutpela pasin bilong yu bai i kamapim gutpela kaikai. ¹¹ Sori tru long man husait i mekim pasin nogut long ai bilong God! Em bai i kisim bikpela hevi long mak bilong pasin nogut em i bin mekim. ¹² Ol yangpela boi bai i kamap olsem lida bilong ol manmeri bilong mi na bai ol i daunim tingting bilong ol bikman na ol meri bai i bosim ol. Ol manmeri bilong mi, ol dispela lida i paulim yupela long mekim pasin nogut na pulim yupela i go long rot nogut. ¹³ God Yawe i sanap insait long kot rum bilong em long kotim olgeta manmeri. ¹⁴ God Yawe bai i kam wantaim ol hevi long givim i go long ol bikman na ol lida bilong em na bai i tokaut olsem, "Yupela i bin bagarapim ol manmeri bilong mi olsem banis bilong ol diwai wain gaden na brukim haus na kisim ol samting bilong ol tarangu man. ¹⁵ Bilong wanem na yupela i wok long kapsaitim ol manmeri bilong mi na bagarapim pes bilong ol dispela tarangu man?" Dispela em i tok bilong mi Bikpela, God Yawe. ¹⁶ God Yawe i tok long ol man bilong Jerusalem olsem ol i kamap yangpela pikinini meri bilong Saion na putim ol yet i go antap tumas. Ol i save wokabaut long soim hamamas bilong bilas bilong ol na ai bilong ol i save pulim ol man. Ol i wokabaut isi tru long mekim ol bilas ring long lek bilong ol i ken mekim nois. ¹⁷ Long dispela as, Bikpela bai i kamapim sua mak long het bilong ol dispela yangpela pikinini meri bilong Saion, God Yawe bai i mekim het bilong ol bai kamap kela. ¹⁸ Na tu long dispela dei, Bikpela bai i rausim ol bilas ring long lek bilong ol, ol bilas samting long hetgras, ol gutpela bilas samting bilong putim long nek, ¹⁹ na rausim ol yiau rin, han rin wantaim laplap i pasim pes bilong ol, ²⁰ na laplap bilong pasin het gras bilong ol, ring bilong leg bilong ol, laplap bilong raunim long hip bilong ol na liklik bokis bilong smel pauda bilong skin hangamap long nek bilong ol wantaim ol samting bilong mekim kainkain marila. ²¹ Em bai rausim ol ring na ol nus ring i dia tumas, ²² wantaim ol gutpela bilas klos long taim bilong hamamas, ol klos i gat namba long en, ol laplap bilong haitim pes wantaim het na ol liklik bilum, ²³ liklik glas bilong lukim pes wantaim ol gutpela klos bilong ol moni man i save werim, laplap bilong karamapim het na longpela laplap bilong karamapim bodi i go daun long lek. ²⁴ Em bai i olsem tasol, kisim ples bilong pauda i save givim gutpela smel bai i kamapim smel nogut, laplap bilong raunim hip bilong ol bai kamap olsem rop nating, gutpela hetgras wantaim bilas bai i kamap kela na gutpela klos i dia tumas bai i kamap olsem klos ol i save werim long taim bilong wari na sori, gutpela bodi bilong yu bai i go nogut olgeta. ²⁵ Ol man bilong yupela bai i dai antap long bainat bilong ol birua na ol ami bilong yupela bai i dai long pait. ²⁶ Ol manmeri bilong Jerusalem bai i sindaun long bikpela dua bilong biktaun bilong ol. Ol bai i krai na sori olsem meri em i sindaun long graun em yet.