¹ Yupela ol manmeri bilong Israel, harim gut tok bilong God Yawe. God Yawe i gat kot wantaim ol asples manmeri bilong dispela graun long wanem, ol i nogat stretpela pasin olsem gutpela tingting long tok tru na bihainim kontrak ol i bin mekim wantaim God long dispela graun. ² Planti pasin nogut olsem tok nogut, giaman, kilim man i dai na pasin pamuk i stap long dispela hap. Ol manmeri i bin brukim pinis ol mak ol bai go long en, olsem na ol man i dai klostu klostu. ³ Graun i go drai na olgeta samting i stap long dispela hap i pinis olgeta. Ol animol i stap long bikpela hap graun na ol pisin i stap antap long skai na tu ol fish long solwara i pinis olgeta. ⁴ Tasol noken larim wanpela kisim yu i go long kot na sutim tok long ol narapela nating. Long wanem, yupela ol pris i mas stap long kot long pasin na toktok yupela i bin mekim. ⁵ Yupela ol pris bai pundaun long dei taim na ol profet tu bai pundaun wantaim yupela long nait taim na bai mi bagarapim mama bilong yupela. ⁶ Ol manmeri bilong mi i bin bagarap, long wanem ol i nogat gutpela tingting. Maski yupela i stap olsem pris bilong mi, bai mi les na rausim yupela taim yupela i laik kam long mi, long wanem yupela ol pris i bin les long kisim gutpela tingting bilong mi. Maski mi stap olsem God bilong yupela, yupela i lus tingting long lo bilong mi, olsem na bai mi lus tingting tu long ol pikinini bilong yupela. ⁷ Taim ol pris i kamap planti, ol i mekim planti moa sin long mi. Ol i senisim gutpela nem bilong ol wantaim sem. ⁸ Ol kaikai long ol sin bilong ol manmeri bilong mi, olsem na ol i hangre moa long mekim pasin nogut. ⁹ Wankain pasin tasol mi bai mekim long ol manmeri na ol pris tu. Bai mi mekim save long ol long pasin nogut bilong ol na givim pei long ol wanem pasin ol i bin mekim. ¹⁰ Ol bai i kaikai tasol ol bai hangre moa yet, ol bai mekim pasin pamuk tasol ol bai i no inap painim amamas na gutpela sindaun, long wanem ol i bin go longwe tru long God Yawe. ¹¹ Ol i laikim tumas pasin pamuk na dring planti moa wain long wanem ol dispela pasin i rausim ol gutpela tingting bilong ol pinis. ¹² Ol manmeri bilong mi i askim ol god giaman ol bin wokim long diwai na ol stik bilong wokabaut i givim ol toktok bai i kamap bihain taim. Olsem na tingting bilong pasin pamuk i bin stiaim ol i go long rot nogut na ol i kamap olsem ol meri bilong mekim pasin pamuk na ol i no stap stret long ai bilong God. ¹³ Ol i kukim ol ofa na mekim gutpela smel antap long maunten na aninit long ol diwai ok, diwai pola na diwai pain long wanem ples i kol na gutpela tru. Olsem na ol pikinini meri bilong yu na ol meri bilong ol pikinini man bilong yu i mekim pasin pamuk moa yet. ¹⁴ Bai mi i no inap mekim save long ol pikinini meri bilong yu na long ol meri bilong pikinini man bilong yu taim ol i makim rot long mekim pasin pamuk. Long wanem, ol man tu i makim rot pinis long mekim pasin pamuk wantaim ol dispela pamuk meri, olsem na ol i kukim ofa inap bai ol i mekim ol pasin i no stret wantaim ol dispela pamuk meri. Orait ol dispela manmeri husat i no luksave na bihainim, ol bai i tromoi ol i go daun long bagarap. ¹⁵ Maski yupela ol Israel i mekim pasin pamuk, ol lain Juda mas noken kisim hevi nating. Yupela i noken go long Gilgal na noken go long Betel na tok nating olsem, "God Yawe i stap laip oltaim." ¹⁶ Israel i bin mekim ol pasin wantaim strongpela bel, wankain olsem bikhet bulmakau. Olsem wanem bai God Yawe inap kisim ol i go long ples i gat gutpela gras olsem ol sipsip i stap long gutpela gras? ¹⁷ Ifraim i putim em yet wantaim ol god giaman, olsem na larim em i stap em yet. ¹⁸ Maski ol strongpela wain bilong ol i pinis, ol i mekim pasin pamuk yet olsem dispela meri i bosim na laikim tru sem bilong ol. ¹⁹ Ol win bai karamapim dispela meri long han bilong em na ol bai i sem long ol ofa ol i bin mekim.