¹ Jekop i stap long graun bilong papa bilong en, long graun Kenan. ² Dispela em i rekod bilong taim bikpela samting i kamap long Jekop, Josep em yangpela man olsem 17-pela yia, na na i lukautim ol sipsip na memek wantaim ol brata bilong em. Ol pikinini bilong Bilha na Zilpa, ol meri bilong papa bilong em. Josep i kisim sampela kain tok i no stret bilong ol i go long papa bilong em. ³ Nau Jekop i laikim tumas Josep moa long ol narapela brata bilong em long wanem, em i karim em long taim em i lapun. Em i wokim wanpela naispela klos bilong em. ⁴ Ol brata bilong em i lukim papa bilong ol i laikim em tumas long ol narapela ol brata. Ol i bel hat na bel nogut long em na les long toktok wantaim em. ⁵ Josep i lukim wanpela driman na em i go stori long driman bilong em long ol brata bilong em na ol i bel nogut long em moa yet. ⁶ Em i tokim ol, Plis yupela harim dispela driman bilong mi . ⁷ Lukim, long driman, yumi wok long katim het bilong wit i stap long wanpela gaden na wantu, wanpela nekpas wit bilong mi i sanap stret na ol narapela nekpas wit bilong yupela i raunim na ol i brukim skru long mi. ⁸ Brata bilong em i tokim em, "Yu ting wanpela taim bai yu bosim mipela? Yu ting bai yu stap king bilong mipela?" Ol i belhat moa taim em i autim driman bilong em na ol i les long harim tok bilong em. ⁹ Em i lukim narapela driman gen na tokim ol brata bilong em. Em i tok, "Harim bai mi tokaut long driman bilong mi. Mi lukim san, mun na 11-pela sta i brukim skru long mi." ¹⁰ Em stori long papa bilong em wankain long ol brata bilong em tu, na papa i askim em. "Wanem as tingting bilong dispela driman? Yu ting mama bilong yu na mi na ol brata bilong yu bai brukim skru long lek bilong yu?" ¹¹ Ol brata bilong em i bel nogut long em,tasol papa bilong em i putim dispela tok long tingting bilong em. ¹² Ol brata bilong em i go was long sipsip bilong papa bilong ol i stap long Sekem. ¹³ Israel i tokim Josep, "Yu save olsem ol brata bilong yu i was long ol sipsip na meme i stap long Sekem? Jekop i tokim em kam na bai mi salim yu i go long ol,'' Josep i tok,"Mi redi long go". ¹⁴ Em i tokim Josep, "Go na lukim sapos ol i stap gut na ol sipsip na meme i stap gut na bihain yu kam bek na tokim mi.'' Na Jekop i salim em i go hap long ples daun bilong Hebron na Josep i go long Sekem. ¹⁵ Wanpela man i painim Josep, Josep i raun nambaut long dispela hap na dispela man i askim em, "Yu painim wanem?" ¹⁶ Josep i tok, "Mi painim ol brata bilong mi.Tokim mi, wanem ples ol i stap lukautim ol sipsip na meme.'' ¹⁷ Dispela man i tok, "Ol i lusim dispela ples pinis na mi harim ol i tok; 'Yumi go long Detan."' Josep i go bihain long ol brata bilong em na painim ol long Detan. ¹⁸ Taim ol i lukim em longwe tru na bihain long em i kamap klostu, ol i pasim tok long kilim em. ¹⁹ Ol brata bilong em i toktok namel long ol yet, "Lukim dispela man bilong driman i kam. ²⁰ Kam yumi kilim em na tromoi em insait long wanpela hul. Bai yumi tok, Wanpela wel abus i kaikai em. Na bai yumi lukim wanem samting bai kamap long ol driman bilong em.'' ²¹ Ruben i harim dispela na em i rausim em long han bilong ol, em i tok, "yumi noken kilim em i dai,'' ²² Ruben i tokim ol, "Blut i no gen kapsait.Tromoi em long dispela hul long ples ol man i no stap, tasol noken putim han long bagarapim em.'' Em mekim dispela tok bai em rausim Josep long han bilong ol na salim em i go bek gen long papa bilong em. ²³ Josep i kamap long hap ol brata bilong em i stap, na ol i holim pas em na rausim naispela klos bilong em. ²⁴ Ol i holim pasim em na tromoi em i go insait long wanpela hul nogat wara. ²⁵ Ol i sindaun na kaikai bret. Ol lukluk i go antap na lukim lain bilong Ismael i wokabaut i kam long Giled, wantaim kamel i karim paura samting na balm na wel. Ol i wokabaut na karim ol dispela samting i go long Isip. ²⁶ Juda i tokim ol brata bilong em, "Wanem gutpela samting bai yumi kisim sapos yumi kilim brata bilong yumi na karamapim blut bilong em? ²⁷ Kam, yumi salim em long ol lain Ismael na yumi noken bagarapim em long han bilong yumi. Long wanem em i brata bilong yumi na em i skin bilong yumi,'' Ol brata bilong em i harim tok bilong em. ²⁸ Ol lain Midia i kam abrusim ol. Ol brata bilong Josep i kisim em na putim em kam ausait long hul. Ol i salim Josep long ol Ismael long 20 silva moni. Ol Ismael i kisim Josep i go long Isip. ²⁹ Ruben i wokabaut i go bek long hul, na i lukim Josep i no stap long dispela hul. Em i brukim klos bilong em. ³⁰ Em i go long brata bilong em na tok, "Dispela pikinini i no stap long hap na bai mi mekim wanem?" ³¹ Ol i kilim wanpela meme na kisim klos bilong Josep na putim insait long blut bilong meme. ³² Bihain ol i kisim i go long papa bilong ol na tok, "Mipela i painim dispela, Inap yu lukim em i olsem klos bilong pikinini bilong yu.'' ³³ Jekop i luksave pinis na i tok, "Dispela em i klos bilong pikinini bilong mi. Wanpela wel abus i kilim em na i brukim em i go liklik,liklik.'' ³⁴ Jekop i brukim klos bilong em na putim blekpela klos long bel bilong em. Em i wari tru long pikinini bilong em long planti de. ³⁵ Olgeta pikinini man na pikinini meri i traim long mekim papa bilong ol i amamas, tasol em i no laik long amamas. Em i tok, "Bai mi go daun long Sio na krai long pikinini bilong mi." Papa bilong Josep i krai long em. ³⁶ Ol Midia i salim em long Isip long Potifa em ofisa bilong king Fero. Kepten bilong lukautim ol bikman.