¹ Long dispela taim, king Artaserksis i bosim Pesia, Esra i lusim Babilon na kam bek. Ol tumbuna bilong Esra em Seraia, Asaria, Hilkia, ² Salum, Sadok, Aitup, ³ Amaria, Asaria na Meraiot, ⁴ Seraia, Usi, Buki, ⁵ Abisua, Fineas, Eliasar, em ol pikinini man bilong het pris Aaron. ⁶ Esra i lusim Babilon na kam bek, em i gutpela saveman bilong raitim ol lo Moses i bin kisim long God Yawe, God bilong Israel. Han bilong God Yawe i stap wantaim em olsem na King i givim em ol samting em i askim long en. ⁷ Sampela bilong ol tumbuna lain bilong Israel na ol pris, ol Livai, ol lain bilong singsing insait long tempel, ol wasman bilong bikpela dua na ol lain ol i makim ol long mekim wok insait long tempel ol tu i go long Jerusalem taim king Artaserksis i stap 7-pela yia. ⁸ Em i kam long Jerusalem long namba 5-mun bilong sem yia. ⁹ Em i lusim Babilon long namba wan dei bilong namba wan mun. Em i kam long Jerusalem long namba wan dei bilong namba 5-mun taim gutpela han bilong God i stap wantaim em. ¹⁰ Esra i gat laik long kisim save long lo na igo lainim ol manmeri long lo bilong God Yawe. ¹¹ King Artaserksis i mekim lo na givim i go long Esra dispela pris na saveman bilong lo husait i save lukautim lo na ol tok promis bilong God Yawe bilong lain Israel, ¹² King bilong olgeta king em Artaserksis na long pris Esra, save man bilong lo bilong God long heven, ¹³ Mi putim tok olsem, olgeta manmeri bilong Israel i stap long kingdom bilong mi wantaim ol pris na ol Livai bilong ol husait i laik go long Jerusalem, i mas go wantaim yu. ¹⁴ Mi, dispela king wantaim ol 7-pela kaunsel bilong mi i salim yu igo long Juda na Jerusalem long painim aut ol manmeri i bihainim lo bilong God o nogat, em i stap long han bilong yu. ¹⁵ Yu mas kisim i kam ol silva na gol ol manmeri i givim olsem ofa igo long God bilong Israel, husait i save stap long Jerusalem. ¹⁶ Wantaim gutpela bel, yupela i mas givim silva na gol long ol lain bilong Babilon i bin givim wantaim ol ofa ol manmeri na pris i putim long haus bilong God insait long Jerusalem. ¹⁷ Orait baim ol bulmakau man, ol sipsip man, ol yangpela sipsip wantaim wit na wain. Mekim ofa antap long alta i stap insait long haus bilong God long Jerusalem. ¹⁸ Wantaim ol hap silva na gol,wanem em gutpela long yu na ol brata bilong yu long amamasim God. ¹⁹ Putim ol samting ol i bin givim long yu bilong mekim wok long haus bilong God bilong yu long Jerusalem. ²⁰ Sapos yu i laikim sampela ol samting moa bilong mekim wok long haus bilong God, orait yu i ken kisim kos bilong ol samting i kam long haus moni bilong mi. ²¹ Mi, King Artaserksis, i mekim lo na tok klia long olgeta man bilong lukautim moni i stap long Provins na hapsait long Wara, taim Esra i askim long sampela ol samting em i laikim, yupela i mas givim long em. ²² Inap long 3,400-kilogrem silva, 2,200-grem wit, 2,400-lita wain na 2,400-lita wel wantaim sol i no gat mak bilong en. ²³ Ol sampela tok i kam long lo bilong God long heven, bihainim na go lotu long haus bilong God. Bilong wanem bai belhat bilong God bai i kamap long kingdom bilong mi na ol pikinini man bilong mi?. ²⁴ Mipela i toksave long ol, yu bai i no inap kisim takis long ol pris, ol Livai, ol man bilong pilai musik, ol wasman bilong geit, o manmeri ol i gat wok mak long mekim insait long tempol bilong God na ol wokman long haus bilong dispela God. ²⁵ Esra, wantaim gutpela save God i givim long yu, yu mas makim ol Jas na ol man bilong harim na stretim hevi, husait i ken stretim hevi bilong ol manmeri long provins na hap sait long wara na helpim ol lain husait i save long lo bilong God bilong yu. Yu mas lainim ol manmeri ol i no save long lo. ²⁶ Mekim save long ol man husait i no save bihainim lo bilong God, o lo bilong king, kilim ol i dai, o rausim ol long ples o rausim kago bilong ol o putim ol long kalabus. ²⁷ Litimapim nem bilong God Yawe, God bilong lain tumbuna bilong yumi, em i putim gutpela samting long bel bilong king long givim glori long haus bilong God Yawe long Jerusalem, ²⁸ na husait i karim aut kontrak wantaim gutpela bilip i kam long mi long ai bilong king, ol lain bilong givim skul tok na ol strongpela ofisa bilong em. God Yawe, God i givim mi strong na mi inap long bungim ol lida man bilong Israel long go wantaim mi.