¹ Olsem na king Darius i salim ol man long sekim ol buk insait long haus bilong gavaman bilong Babilon. ² Long biktaun Ekbatana bilong Media, i gat bikpela banis i raunim em, ol i painim wanpela buk i gat ol dispela tok, ³ "Long namba wan yia bilong king Sairus, em i pasim wanpela lo long wokim haus bilong God long Jerusalem, "Mekim dispela haus gen olsem ples bilong mekim ofa, putim ol ston long as bilong en, mekim longpela bilong em i go antap 26 mita na bikpela bilong em 26 mita, ⁴ wantaim tripela lain bilong ol traipela ston na wanpela lain bilong ol plang ol i mas kisim moni na baim long haus bilong king. ⁵ Nau ol i mas kisim bek ol gol na ol silva samting long haus bilong God, em ol dispela samting king Nebukadnesa i bin kisim long tempel long Babilon na salim i kam bek long tempel long Jerusalem. Yupela i mas putim ol long haus bilong God." ⁶ Orait Tatenai gavana bilong Taun Hapsait long Wara, Seta Bosenai na ol poroman husait i stap long Taun Hapsait long Wara, stap longwe! ⁷ Larim wok bilong haus bilong God Yawe i stap olsem. Gavana wantaim ol het man bilong Juda bai i mekim haus bilong God long dispela ples. ⁸ Mi tok strong long yupela long mekim ol dispela samting long ol het man bilong Juda husait i mekim haus bilong God. Moni i kam long takis bilong king ol i kisim long ol taun i stap long hapsait long Wara bai yupela i yusim long baim ol wokman olsem na ol i no inap stopim wok bilong ol. ⁹ Yupela i mas givim ol pris long wanem ol samting ol i askim long en, ol yangpela bulmakau, man sipsip o pikinini sipsip bilong mekim ofa, ol i kukim olgeta long paia i go long God bilong Heven, wit, sol, wain na oil long wanem ol pris i tokim ol long Jerusalem, yupela i mas givim ol dispela samting long ol long olgeta dei. ¹⁰ Mekim olsem na ol bai i bringim ol ofa i go long God bilong Heven na ol bai beten long helpim mi, king na ol pikinini man bilong mi. ¹¹ Mi tok strong olsem sapos wanpela i sakim tok bilong mi ol i mas pulim aut wanpela plang long haus bilong em orait ol i mas putim em antap na sutim em i dai. Ol i mas kukim haus bilong em na em bai i kamap olsem hip bilong rabis olsem pasin bilong sakim tok. ¹² Inap God husait i mekim nem bilong em i stap long dispela hap bilong daunim ol king o ol manmeri husait i apim han long senisim dispela lo long bagarapim haus bilong God long Jerusalem. Mi king Darius i mekim dispela strongpela tok na yupela i mas bihainim!" ¹³ Orait King Darius i bin mekim dispela strongpela tok olsem na Tetanai gavana bilong provins hapsait long wara, Seta Bosenai na ol poroman bilong em i mekim olgeta samting i bihainim tok bilong king Darius. ¹⁴ Na ol het man bilong Juda i mekim haus bilong God gut tru aninit long stia tok bilong profet Hagai na Sekaria pikinini man bilong Ido. Ol i bihainim lo bilong God bilong ol Israel na ol lo bilong Sairus, Darius na Artaserksis king bilong ol Persia. ¹⁵ Long namba 6-pela yia bilong king Darius na long namba tri dei bilong Ada ol i pinisim haus bilong God. ¹⁶ Ol manmeri bilong Israel wantaim ol pris, ol Livai na olgeta manmeri i kam aut long kalabus long givim dispela haus long God Yawe wantaim amamas. ¹⁷ Ol i ofarim 100-pela bulmakau, 100-pela man sipsip na 400-pela pikinini sipsip long makim haus bilong God. Ol i ofarim 12-pela man meme olsem sin ofa bilong olgeta Israel long makim ol wanwan tumbuna lain bilong Israel. ¹⁸ Ol i makim ol pris wantaim ol Livai long putim ol long grup bilong mekim wok insait long haus bilong God bilong Jerusalem, olsem ol i raitim long buk bilong Moses. ¹⁹ Olsem na husait i bin kam aut long kalabus i mas amamas na tingim dei bilong Pasova long dei namba 14 bilong namba wan mun. ²⁰ Ol pris na ol Livai i klinim ol yet na kilim sipsip bilong mekim Pasova ofa bilong olgeta manmeri husait i bin kam aut long kalabus wantaim ol yet tu. ²¹ Ol manmeri bilong Israel husait i bin kam aut long kalabus i kaikai dispela Pasova mit wantaim ol arapela manmeri husait i lusim pasin nogut na i lotu long God Yawe, God bilong ol Israel. ²² Ol i amamas tru na i mekim kaikai bilong makim Dei bilong Bret I Nogat Yis long 7-pela dei, God Yawe i mekim ol i amamas na i tanim bel bilong king bilong Asiria long bel gut na strongim han bilong ol long wokim haus bilong God bilong ol Israel.