¹ Long nambawan yia bilong Sairus, king bilong Pesia, God Yawe inapim tok bilong em i bin mekim long maus bilong Jeremaia na dispela em i kirapim tru spirit bilong Sairus. Toktok bilong Sairus i go long olgeta hap long kingdom bilong em. Dispela tok em i bin raitim i tok olsem, ² Sairus, king bilong Pesia i tok olsem, God Yawe, God bilong Heven, i givim mi pinis olgeta kingdom bilong graun na em i makim mi long wokim wanpela haus bilong em long Jerusalem long Judia. ³ Husait tru i bilong lain manmeri bilong em (God bilong em bai i stap wantaim em) i ken i go antap long Jerusalem na wokim haus bilong God Yawe, em God bilong Israel, em God i stap insait long Jerusalem. ⁴ Ol manmeri bilong wanem hap long kingdom i stap laip yet long dispela ples, ol i ken givim ol gol na silva, ol gutpela samting na ol animel, ofa bilong givim wantaim bel i kam long haus bilong God long Jerusalem. ⁵ Nau ol hetman bilong tumbuna lain bilong Juda na Benjamin, ol pris na ol Livai na olgeta husait God i bin kirapim spirit bilong ol i go na wokim haus bilong em i kamap. ⁶ Ol lain husait i stap klostu, ol tu i bin helpim ol wantaim silva na gol samting, kago bilong ol, animel bilong ol na ol samting i dia tumas na ol ofa ol i givim wantaim bel bilong ol. ⁷ Sairus king bilong Pesia tu i bin salim ol samting bilong haus bilong God Yawe i kam, em ol samting Nebukadnesa i bin rausim long Jerusalem na putim long haus bilong ol god giaman. ⁸ Sairus i putim ol dispela samting long han bilong Mitretdat man bilong lukautim moni, husait i kaunim na stretim bilong Sesbasa, lida man bilong Juda. ⁹ Dispela i soim namba bilong ol, 30-pela gol dis, 1,000-pela dis silva na 29-pela ol arapela dis, ¹⁰ 30pela dis gol , 410-pela ol liklik dis silva na 1,000-pela moa bilong ol arapela samting. ¹¹ Bungim olgeta wantaim em i olsem 5,400-pela gol na silva samting. Sesabasa i bin kisim olgeta samting taim ol kalabus lain bilong Babilon i go long Jerusalem.