¹ Bihain long dispela, Devit i pait na winim ol Filistia na Devit i kisim Metek Amma long han bilong ol Filistia. ² Na bihain em i winim ol Moap, em i putim ol long lain na mekim ol i brukim skru long graun, Em i makim tupeia lain long putim ol long dai na wanpela longpela lain em i larim ol i stap laip. olsem na ol Moap lain i kamap wokboi bilong Devit na givim gutpela tok i go long em. ³ Devit i winim Hadadesa pikinini bilong Reop em i king bilong Soba, taim Hadadesa i wokabaut raun na karamapim wara Ufritis. ⁴ Devit i kisim long em 1,700 karis na 20,000 ami bilong graun. Devit i rausim ol hos na karis bilong ol, tasol em i lusim sampela inap long 100 pela karis tasol. ⁵ Taim ol Aramin bilong Damaskas i kam long helpim Hadadesa king bilong Soba, Devit i kilim 22,000 man bilong ol Aramin. ⁶ Na Devit i putim ol soldia bilong em long olgeta hap long Aram bilong Damaskas na ol Aramin i stap aninit long em na givim takis i go long em. Wanem hap Devit i go, God Yawe i save helpim em. ⁷ Devit i kisim ol hap plang ol i wokim long gol long ol wokman bilong Hadadesa na kisim i go long Jerusalem. ⁸ Long Tebah na Berotai em ol biktaun bilong Hadadisa. King Devit i kisim planti brons moa ⁹ Taim Tou king bilong Hamat i harim olsem Devit i winim ol ami bilong Hadadesa, ¹⁰ Tou i salim Hadoram, em pikinini man bilong em, i go long King Devit long givim tok amamas na blessim em long wanem, Devit i pait wantaim Hadadesa na i winim em, long wanem Hadadesa i hat long pait wantaim Tou. Hadoram i kisim em yet wantaim ol samting olsem silva, gol na brons long em. ¹¹ King Devit i makim ol dispela samting bilong God Yawe wantaim ol silva na gol bilong ol narapela kantri em i bin pait wantaim ol na winim ol, ¹² bilong Aram, Moap na ol lain bilong Amon na ol Filistia na Amelek wantaim olgeta samting bilong Hadadesa pikinini man bilong Reop na king bilong Zoba. ¹³ Nem bilong Devit i kamap bikpela taim em i go pait na kilim 18,000 man na i winim ol Aram long Ples Daun i gat Sol. ¹⁴ Em i putim ol soldia long olgeta hap bilong Idom na ol Idom i stap aninit long em. Long wanem hap Devit i go pait God Yawe i save helpim em. ¹⁵ Devit i stap king na i bosim olgeta Israel na em i mekim stretpela kot na stretpela pasin long olgeta dispela manmeri. ¹⁶ Joap pikinini man bilong Seruai i stap nambawan kepten bilong ami na Jeosafat pikinini man bilong Ailud i stap olsem man bilong kisim ripot. ¹⁷ Sadok pikinini bilong Aitub na Aimelek pikinini bilong Abiata ol i stap pris na Seraia i stap saveman bilong lo. ¹⁸ Benaia pikinini bilong Jeoaiada i lukautim ol Keretait na ol Peletait na ol pikinini bilong Devit i stap ol namba wan ofisa bilong king.