¹ Devit i bungim gen 30,000-man bilong Israel i save long pait. ² Devit i kisim ol i go wantaim em long Bala bilong Juda bilong kisim bokis kontrak bilong God. Dispela bokis kontrak ol i save kolim God Yawe i gat olgeta strong. Bokis igat piksa bilong tupela ensel antap long en i olsem sia king bilong Bikpela. ³ Ol i go long haus bilong Abinadab i stap antap long liklik maunten na kisim bokis kontrak bilong God na putim antap long wanpela nupela karis. Usa na Ahio tupela pikinini man bilong Abinadab i wok long bihainim na was long dispela nupela karis igo. ⁴ Ol i kisim karis i karim bokis kontrak bilong God long haus bilong Abinadab i stap antap long liklik maunten. Ahio i wokabaut igo pas long bokis kontrak. ⁵ Na Devit wantaim olgeta Israel i singsing na mekim musik wantaim tambarin, na narapela ol samting bilong mekim musik na litimapim nem bilong God Yawe. ⁶ Taim ol i kamap long wanpela hap ples bilong rausim skin bilong wit long graun bilong wanpela man nem bilong em Nakon. Long dispela hap, bulmakau klostu i laik pundaun na i mekim bokis kontrak klostu i laik pundaun tu na Usa i putim han bilong em na i holim bokis kontrak bilong God. ⁷ Na God Yawe i belhat long Usa na kilim em long sin bilong em na Usa i dai klostu long bokis kontrak bilong God. ⁸ God Yawe i kilim Usa olsem na Devit i kros na em i kolim nem bilong dispela ples Peres Usa. Nau tu ol i kolim Peres Usa yet. ⁹ Long dispela dei Devit i pret long God Yawe na em i tok, ''Olsem wanem bai kontrak bokis bilong God Yawe i kam long mi?'' ¹⁰ Olsem na Devit i no laik kisim bokis kontrak bilong God Yawe igo wantaim insait long taun bilong Devit. Em i lusim i stap long haus bilong Obet Idom bilong Gitait. ¹¹ Bokis kontrak bilong God Yawe i stap long haus bilong Obet Idom bilong Gitait inap tripela mun. Olsem na God Yawe i blessim em wantaim olgeta lain bilong em. ¹² King Devit i harim olsem, ''God Yawe i blessim lain bilong Obed Idom na olgeta samting bilong em, Long wanem bokis kontrak bilong God i stap wantaim em.'' Olsem na Devit i go na kisim bokis kontrak bilong God long haus bilong Obed Idom i go long taun bilong Devit wantaim amamas. ¹³ Ol man i karim bokis kontrak bilong God Yawe na taim ol i stat long wokabaut na tromoi lek 6-pela taim, em i wokim ofa bilong wanpela bulmakau man na yangpela patpela bulmakau. ¹⁴ Devit i pasim wanpela waitpela laplap bilong pris na i danis wantaim olgeta strong bilong em na litimapim God Yawe. ¹⁵ Devit wantaim olgeta Israel i kisim bokis kontrrak bilong God Yawe wantaim singaut bikmaus na nois bilong ol trampet. ¹⁶ Taim bokis kontrak bilong God Yawe i kam insait long taun bilong Devit, Mikal pikinini meri bilong Sol i sanap long windua na i lukim ol. Em i lukim King Devit i kalap na danis long God Yawe na em i no amamas na em i bel nogut long em. ¹⁷ Ol i kisim bokis kontrak bilong God Yawe i go insait na putim long ples bilong en, namel long haus sel Devit i bin sanapim long en, na Devit i wokim ofa bilong paia i kukim olgeta na ofa bilong kamap wanbel i go long God Yawe. ¹⁸ Taim Devit i wokim ofa bilong paia i kukim olgeta na ofa bilong kamapim wanbel pasin na em i givim blessin long ol manmeri long nem bilong God Yawe igat Olgeta Strong. ¹⁹ Devit i tilim kaikai long olgeta manmeri bilong Israel. Long ol man na ol meri, em i givim wanpela bret na hap mit na sampela pikinini wain ol i draim pinis. Orait olgeta manmeri i go bek long ples bilong ol. ²⁰ Devit i go bek long haus long mekim gut long femili bilong em. Mikal, pikinini meri bilong Sol i kam autsait long haus long bungim Devit na i tok olsem, '' Nau, King bilong Israel i kisim biknem na i rausim klos na soim em yet long ai bilong ol wokmeri nating namel long ol ofisa bilong em yet, olsem wanpela man i nogat gutpela tingting na i nogat sem long rausim klos bilong em yet.'' ²¹ Devit i bekim tok bilong Mikal olsem, ''Mi mekim dispela long litimapim God Yawe, em i bin makim mi bilong senisim papa bilong yu na ol femili bilong em. Em i makim mi long kamap hetman bilong ol Israel em ol manmeri bilong God Yawe. Bai mi amamas na litimapim nem bilong God Yawe. ²² Bai mi daunim nem bilong mi moa yet na kamap samting nating long ai bilong mi yet. Tasol ol dispela wokmeri nating yu toktok long ol, bai ol i givim biknem long mi.'' ²³ Olsem na Mikal pikinini meri bilong Sol i no karim pikinini i go inap em idai.