¹ Orait, olgeta lain Israel i kam lukim Devit long Hebron na ol i tok, "Lukim mipela i wanblut bilong yu stret. ² Long sampela taim i go pinis, taim Sol i stap King bilong mipela, em yu tasol i go pas na kisim ol soldia bilong Israel i go long pait. God Yawe i tokim yu, 'Yu bai kamap wasman bilong ol manmeri bilong mi Israel na yu bai kamap bikman bilong ol na lukautim ol Israel." ³ Olsem na olgeta bikman bilong Israel i bin kam lukim king long Hebron na King Devit i mekim kontrak wantaim ol long ai bilong God Yawe. Na ol i kapsaitim wel antap long het bilong Devit long makim em i kamap king bilong Israel. ⁴ Devit i gat 30-pela krismas taim em i kamap king na i stap king bilong Israel inap 40-pela krismas olgeta. ⁵ Long Hebron em i bin i stap king bilong Juda inap 7-pela yia na 6-pela mun olgeta na long Jerusalem em i stap king inap 33-pela yia na em i bosim olgeta lain Israel na Juda wantaim. ⁶ Wanpela taim King wantaim ol soldia bilong em i go long Jerusalem bilong pait wantaim ol lain Jebu, ol asples bilong graun i stap long Jerusalem. Ol i tokim King Devit, "Yu bai i no inap kam long hia, maski ol ai pas na lek nogut inap long pasim rot bilong yu. Ol i mekim olsem bilong Devit i no ken kam insait long taun bilong ol." ⁷ Tasol tok bilong ol i giaman, Devit i pait strong na winim dispela taun i gat strongpela banis. Em dispela taun Saion. Na bihain ol manmeri i kolim olsem taun bilong Devit. ⁸ Long dispela taim Devit i tok, "Sapos mipela i laik i go pait long ol Jebu, orait, mipela i mas go olsem long hul ol Jebu i save i go i kam bilong kisim wara bilong kamap long ples ol lek nogut na ai pas i stap, husat em birua bilong Devit." Long wanem ol i tingim yet dispela tok, "Ol lain ai pas na lek nogut i no ken i go insait long haus bilong king." ⁹ Olsem na Devit i stap insait long strongpela banis ol i kolim olsem, taun bilong Devit. Em i was strong long hap inap long autsait na i go insait. ¹⁰ Devit i kamap strongpela king long wanem God Yawe, i gat olgeta strong i stap wantaim em. ¹¹ Na bihain Hiram King bilong Tair i salim ol ofisa bilong kisim tok i go long Devit, wantaim ol gutpela diwai sida, ol kapenta bilong wokim haus na ol saveman bilong katim ston ol i ken wokim haus bilong King Devit. ¹² Devit i luksave olsem God Yawe i makim em i kamap king bilong ol Israel na em i hapim kingdom bilong em long makim ol manmeri bilong en, ol Israel. ¹³ Bihain long taim Devit i lusim Hebron na i go kamap long Jerusalem, em i maritim planti ol meri na ol namba tu lain meri bilong em long Jerusalem. Na i karim planti moa pikinini man na meri. ¹⁴ Ol nem bilong pikinini Devit i karim long Jerusalem i olsem; Samua, Sobab, Natan, Solomon, ¹⁵ Ifaba, Elisua, Nefek, Jafia, ¹⁶ Elisama, Eliada na Elifelet. ¹⁷ Nau taim ol Filistia i harim olsem ol Israel i makim Devit olsem king bilong ol, olgeta i go long pait wantaim em. Tasol Devit i harim tok olsem ol manmeri i kam long pait wantaim em olsem na em i lusim na i go long taun i gat strongpela banis. ¹⁸ Nau ol Filistia i kam kamap na inapim olgeta hap bilong ples daun Refaim. ¹⁹ Bihain Devit i askim God Yawe long helpim em. Em i tok olsem, "Inap mi go pait wantaim ol Filistia? Bai yu mekim mi i winim pait wantaim ol o nogat?" God Yawe i tokim Devit, "Yu ken i go pait na bagarapim ol long wanem mi bai putim ol Filistia i kam long han bilong yu na bai yu winim ol tru." ²⁰ Olsem na Devit i go pait wantaim ol long ples Bal Perasim na long dispela ples em i winim ol long pait. Em i tok, "God Yawe i brukim namel long ol birua bilong mi olsem bikpela tait wara." Olsem na ol i kolim nem bilong dispela ples olsem Bal Perasim. ²¹ Ol Filistia i lusim ol god giaman bilong ol long dispela ples na Devit wantaim ol soldia bilong em i kisim ol dispela samting na karim i go. ²² Orait ol Filistia i kam bek gen na kwiktaim inapim olgeta hap ples daun bilong Refaim. ²³ Olsem na Devit i askim God Yawe long helpim em gen na God Yawe i tokim em olsem, "Yupela mas i go pait long ol, tasol yupela i no ken i go stret long ol. Yupela i mas go raunim long baksait bilong ol na kam olsem namel long ol diwai balsam i sanap long en. ²⁴ Taim yupela i harim olsem nois bilong ol man i wokabaut antap long het bilong ol diwai balsam, orait yupela i mas i go pait strong. Yupela i mas mekim olsem long wanem God Yawe bai i go paslain long yupela long pait wantaim ol ami bilong Filistia." ²⁵ Olsem na Devit i mekim olsem God Yawe i tokim em long mekim. Em i kilim olgeta Filistia long taun Geba i go olgeta long taun Geser.