7 ¹ Elisa i tok, " Harim dispela tok bilong God Yawe. "Tumoro long kain taim olsem ol bai salim 3 kilogram gutpela flaua, na 6 kilogram bali flaua long wan kina long dua bilong banis bilong biktaun bilong Sameria" ² Orait dispela kepten i save stap klostu king em i tok olsem, " Lukim, maski God Yawe i ken opim windua bilong heven, inap dispela samting i kamap?'' Elisa bekim tok bilong em, " Bai yu lukim long ai bilong yu yet na dispela samting bai kamap, tasol bai yu no inap kaikai wanpela hap bilong en." ³ Nau i gat 4 pela lepra man i stap autsait long dua bilong banis bilong biktaun. Ol toktok long ol yet i go i kam, " Bilong wanem bai yumi sindaun hia na wetim dai bilong yumi? ⁴ Sapos yumi tok yumi i go insait long biktaun, orait bai nogat ol kaikai long biktaun tu na bai yumi i dai. Tasol sapos yumi sindaun yet long hia bai yumi dai tu. Orait nau, kam na yumi go long ol ami bilong Aram. Sapos ol i larim yumi i stap laip, bai yumi i stap laip, na sapos ol i kilim yumi, orait yumi bai i dai tasol." ⁵ Olsem na ol i kirap long apinun taim san i go daun pinis long go long kemp billong ol ami bilong Aram. Taim ol i kamap long arere tru bilong kemp, ol i no lukim wanpela man i stap long hap. ⁶ Long wanem Bikpela i bin mekim ol ami bilong Aram i harim ol nois bilong ol karis na ol nois bilong lek bilong ol hos i ran, ol nois bilong narapela bikpela ami, na ol toktok i go i kam long ol yet,"King bilong ol Israel i baim ol king bilong ol Hit na ol king bilong ol Isip long kam pait long yumi." ⁷ Olsem na ol soldia i kirap na ranawe long apinun yet, ol i lusim ol haus sel bilong ol, ol hos bilong ol, ol donki bilong ol na ol i lusim kemp i stap olsem na olgeta i tingim laip bilong ol na ol i ranawe. ⁸ Taim ol lepra man kam long arere tru bilong kemp, ol i go insait long wanpela haus sel na ol i kaikai na dring, na ol i kisim silva na gold na ol klos na ol i go haitim. Ol i kam bek gen na ol i go insait long narapela haus sel na kisim olgeta samting long en na karim ol i go haitim. ⁹ Na ol i toktok i go i kam long ol yet," Dispela ol samting yumi i wok long mekim em i no stret, dispela dei em i wanpela gutpela dei long tokaut long ol gutpela samting i kamap, tasol yumi i wok long pasim maus i stap. Sappos yumi weit i go moning nogut ol man i givim hevi long yumi. Olsem na yumi mas i go na tokim ol lain i stap long haus bilong king." ¹⁰ Olsem na ol i go bek na singautim ol wasman bilong dua bilong biktaun. Ol i tokim ol olsem, " Mipela bin i go long kemp bilong ol Aram tasol nogat wanpela man i stap, mipela i no harim wanpela nois bilong ol man, tasol mipela i lukim ol hos wantaim ol donki ol i pasim i stap na ol haus sel ol sanapim i stap yet olsem." ¹¹ Ol wasman bilong dua bilong banis bilong biktaun i singaut bikmaus na tokaut long ol manmeri wanem i kamap long kemp bilong ol Aram na ol i tokim ol lain i stap long haus bilong king. ¹² Orait king i kirap long nait na tokim ol wokman bilong em. " Nau bai mi tokim yupela wanem ol Aram i bin mekim long yumi. Ol i save yumi i stap hangre, olsem na ol i lusim kemp na ol i go hait autsait long fil. Ol i wok long tok olsem, " Taim ol i kamaut long biktaun, bai yumi holim pasim ol na kisim ol i go insait lo biktaun." ¹³ Wanpela wokman bilong king i bekim tok bilong king na tok, " Mi askim yu, inap yu larim sampela man i kisim ol 5 pela hos i stap yet long biktaun. Namba bilong ol i olsem ol manmeri bilong Israel ol i stap yet, klostu olgeta i dai pinis, larim yumi salim ol i go na lukim." ¹⁴ Ol i kisim 2-pela karis wantaim ol hos na king i salim ol i go bihainim ol ami bilong Aram, em i tok, " Go na lukim." ¹⁵ Ol i bihainim ol i go kamap long wara Jodan, na ol i lukim rot i pulap long ol klos na ol samting bilong pait ol Aram i tromoi nabaut long rot taim ol i hariap long lusim ples na ranawe. Na ol man i karim tok i kam bek na tokim king. ¹⁶ Ol manmeri i go aut na karim olgeta samting bilong ol Aram long kemp bilong ol. Olsem na ol i salim 3 kilogram gutpela flaua long wan kina na 6 kilogram bali flaua long wan kina, olsem tok bilong God Yawe i bin tok. ¹⁷ King i tokim dispela kepten i save stap klostu long em, long stap het wasman long dua bilong banis bilong biktaun, na ol manmeri ran antap long em na krungutim em daun insait long dua bilong banis bilong biktaun. Em i dai olsem Elisa wokman bilong God Yawe i bin tok, dispela man i bin toktok taim king i bin kam daun long em. ¹⁸ Na dispela samting i bin kamap olsem wokman bilong God i bin tokim king na em i tok olsem, "Klostu long dispela taim long dua bilong banis bilong biktaun Sameria 6 kilogram barli flaua bai stap long salim long wan kina na 3 kilogram gutpela flaua long wan kina." ¹⁹ Kapten bekim tok bilong Elisa man i stap klostu tru long God Yawe na em tok, " Yu harim, sapos God Yawe i opim ol windua bilong heven na salim ol dispela kaikai kam daun, inap dispela samting i kamap?" Elisa i bin tok, " Harim, bai yu lukim long ai bilong yu yet na ol bai kamap, tasol bai yu i no inap kaikai," ²⁰ Dispela samting i kamap tru long em. ol manmeri i ran antap long em na krungutim em i go daun insait long dua bilong banis bilong biktaun, na em i dai.