¹ Long namba 12 yia bilong Ahas king bilong Juda, Hosea pikinini man bilong Ela i kamap king bilong ol Israil na i lukautim Sameria inap 9-pela yia. ² Em i mekim pasin nogut long ai bilong God Yawe, tasol em i no mekim planti pasin nogut olsem ol arapela king bilong Israil i mekim pastaim long em. ³ Salmenesa king bilong Asiria i kam pait long em na i daunim em olsem na Hosea i kamap wokman bilong em na i bringim takis i kam long em. ⁴ Tasol bihain king bilong Asiria i luksave olsem Hosea i pasim tok long mekim birua long em, long wanem Hosea i salim ol man long askim So king bilong ol Isip long helpim em. Na olsem tu em i no moa bringim takis i go long king bilong Asiria, olsem em i save mekim olgeta yia. Olsem na king bilong Asiria i holim em na putim em long kalabus. ⁵ Orait King bilong Asiriai i kirapim pait long olgeta hap graun bilong Israil na em i banisim Sameria na em i pait wantaim ol inap tripela yia. ⁶ Long namba 9 yia bilong Hosea, king bilong ol Asiria i kisim Sameria na i karim ol Israil i go long Asiria. Em i putim ol long Hala long wara Habo bilong Gosan insait long biktaun bilong Medes. ⁷ Dispela hevi i kamap bilong wanem ol manmeri bilong Israil i sin long God Yawe, God bilong ol husait i bin kisim ol i kam aut long kantri Isip aninit long han bilong king Fero bilong Isip. Ol manmeri i bin lotu long ol arapela giaman god ⁸ na i wokabaut insait long ol pasin nogut bilong ol arapela lain manmeri God Yawe i bin rausim ol long ai bilong ol manmeri bilong Israil, na i bihainim ol pasin nogut ol king bilong ol Israil i bin mekim. ⁹ Ol manmeri bilong Israil i mekim ol hait pasin nogut long God Yawe God bilong ol. Ol i wokim ol ples bilong lotu insait long ol biktaun bilong ol long was tawa i go inap long ol strongpela banis. ¹⁰ Ol tu i mekim ol ston pos na ol piksa bilong Asera god giaman antap long ol maunten na aninit long olgeta diwai i sanap. ¹¹ Long ol dispela ples antap ol i kukim ol smel ofa wankain olsem ol arapela lain manmeri God Yawe i bin rausim. Ol Israil i mekim ol pasin nogut long kirapim God Yawe long belhat; ¹² ol i lotuim ol giaman God we God Yawe i bin tokim ol, "Yupela i noken mekim ol dispela samting." ¹³ Olsem God Yawe i bin toktok long ol Israil na ol Juda long ol profet na ol man i stap antap long ol na i tok, "Tanim bel na bihainim ol lo na ol toktok bilong mi na lukaut gut long bihainim ol lo mi bin tokim ol papa bilong yupela, mi bin salim long yupela ol wokman bilong mi ol profet." ¹⁴ Tasol ol i no inap harim, ol i bikhet olsem ol papa bilong ol husait i no bilipim na putim bel na tingting long God Yawe God bilong ol. ¹⁵ Ol i sakim tok bilong ol lo bilong em na kontrak em i bin mekim wantaim ol tumbuna bilong ol na ol tok promis em i bin givim ol. Ol i bihainim ol pasin nogut na ol tu i kamap samting nating. Ol i bihainim ol lain husait i no save lotuim God husait stap klostu long ol, dispela ol lain manmeri God Yawe i tok ol i noken bihainim pasin bilong ol. ¹⁶ Ol i no bihainim ol lo bilong God Yawe God bilong ol. Ol i kukim na wokim long ain na kapa piksa bilong tupela yangpela bulmakau long lotuim. Ol i mekim pos bilong Asera god giaman, ol i lotuim ol sta long skai na god bal. ¹⁷ Ol i kukim ol pikinini man na meri long paia i go long god giaman, ol kisim tingting bilong ol glasman na puripuri, ol i givim ol yet long mekim pasin nogut long ai bilong God Yawe na i kirapim em long belhat. ¹⁸ Olsem na God Yawe i belhat tru long ol Israil na i rausim ol long ai bilong em. I nogat wanpela i bin i stap, ol tumbuna lain bilong Juda tasol i bin stap. ¹⁹ Olsem tu ol Juda i no bihainim God Yawe God bilong ol na ol i bihainim ol pasin nogut ol Israil i bin mekim. ²⁰ Olsem na God Yawe i givim baksait long ol tumbuna lain bilong Israil, em i bagarapim ol na i givim ol long han bilong ol birua husait bai i kisim olgeta samting bilong ol, inap em i rausim ol long ai bilong em. ²¹ Em i brukim Israil long ol lain bilong Devit na ol mekim Jeroboam pikinini man bilong Nebat i kamap king. Jeroboam i kisim ol Israil i go longwei long God Yawe na i paslain long ol long mekim bikpela sin. ²² Olgeta manmeri bilong Israil i bihainim ol pasin nogut bilong Jeroboam na i no lusim ol dispela pasin nogut, ²³ olsem na God Yawe i rausim ol Israil long ai bilong em, olsem em i bin tokim ol wokman em ol profet olsem em bai i mekim. Olsem na ol Asiria i kisim ol Israil olsem kalabus i go long kantri bilong ol na em i stap olsem i kam inap long nau. ²⁴ King bilong ol Asiria i kisim ol manmeri i kam long Babilon, long Kuta long Ava, long Amat na Sefavaim na putim ol long biktaun bilong Sameria long kisim ples bilong ol manmeri bilong Israil. Ol i kisim ples Sameria na i sindaun long ol biktaun bilong en. ²⁵ Ol i no lotuim God Yawe long stat yet taim ol i kam i stap, olsem na God Yawe i salim ol laion i kam namel long ol na i kilim sampela bilong ol. ²⁶ Orait ol i tokim king bilong Asiria na tok, "Ol manmeri bilong dispela kantri yu karim i go na putim long ol biktaun bilong Sameria i no save long bihainim ol pasin bilong god bilong dispela graun. Olsem na em i salim ol laion i kam namel long ol na lukim, ol laion i wok long kilim ol manmeri bilong wanem ol i no save long ol pasin bilong god bilong dispela graun." ²⁷ Na king bilong ol Asiria i tok strong na i tok, "Kisim wanpela pris i go bek long dispela hap husait yu i bin kisim i kam aut long dispela hap, larim em i go sindaun long dispela hap na em i ken skulim ol long ol pasin bilong god bilong dispela graun." ²⁸ Olsem na wanpela bilong ol dispela pris husait ol i bin karim i go aut long Sameria i kam na i sindaun long Betel, em i skulim ol long lotuim God Yawe. ²⁹ Olgeta wanwan lain manmeri i mekim giaman god bilong ol yet na putim ol long ol ples antap we ol manmeri bilong Sameria i bin mekim - olgeta wanwan lain manmeri husait i sindaun long ol biktaun. ³⁰ Ol manmeri bilong Babilon i wokim Sukot Benot, ol manmeri bilong Kuta i wokim Negal, ol manmeri bilong Hamat i wokim Asima, ³¹ ol Avi i mekim Nibas na Tatak. Ol Sefavaim i kukim ol pikinini bilong ol long paia i go long Adramelek na Anamelek ol god giaman bilong ol Sefavaim. ³² Ol tu i lotuim God Yawe na ol i makim ol pris namel long ol yet bilong maunten ples husait i mekim ofa bilong ol insait long haus lotu long ol maunten ples. ³³ Ol i lotuim God Yawe tasol na tu ol i lotuim ol giaman god bilong ol yet, insait long tumbuna pasin bilong ol lain man meri bilong ol hap we ol i bin kam aut long en. ³⁴ I kam inap long nau ol i bihainim yet ol tumbuna pasin bilong ol. Ol i no lotuim God Yawe, na ol i no bihainim ol tok bilong em na ol lo God Yawe i bin givim long ol tumbuna bilong Jekop - husait em i kolim Israil - ³⁵ na wantaim dispela lain God Yawe i mekim kontrak na i tok strong long ol, "Yupela bai i no pret long ol arapela god, brukim skru long ol, lotuim ol na givim ofa i go long ol. ³⁶ Tasol God Yawe husait i kisim yupela i kam aut long kantri Isip wantaim bikpela strong na han i antap tru em tasol yupela i mas lotuim, long em tasol bai yupela i brukim skru na long em tasol bai yupela i givim ofa. ³⁷ Yupela i mas oltaim lukautim na bihainim ol tok na lo em i bin raitim bilong yupela, yupela bai holim i stap oltaim oltaim. Olsem yupela i noken pret long ol arapela god giaman, ³⁸ na dispela kontrak mi bin mekim wantaim yupela, yupela i noken lus tingting na noken lotuim ol arapela god giaman. ³⁹ Tasol God Yawe ,God bilong yupela em yupela i mas lotuim. Em bai i rausim yupela long ol strong bilong ol birua bilong yupela." ⁴⁰ Ol i no inap harim bilong wanem ol i mekim wankain pasin nogut ol i bin mekim bipo. ⁴¹ Olsem na ol dispela kantri i pretim tru God Yawe na tu ol i lotuim ol giaman god na ol pikinini bilong ol i mekim wankain, olsem tu ol tumbuna pikinini i mekim wankain pasin. Ol i mekim ol kain nogut pasin ol tumbuna bilong ol i bin mekim i kam inap long nau.