¹ Orait Solomon i stat long wokim haus bilong God Yawe antap long Maunten Moraia long Jerusalem, ples God Yawe i bin bungim papa bilong em Devit. Em i stretim ples long graun Devit i bin tingim long mekim haus long ples bilong kisim kaikai bilong wit bilong Onan man long Jebus. ² Em i stat long wokim dispela haus long namba tu dei bilong namba tu mun long namba 4-yia bilong em long i stap king. ³ Dispela ol mak Solomon i putim long wokim haus bilong God. Longpela bilong haus i olsem 27- mita na bikpela bilong haus i olsem 9-mita. ⁴ Bikpela bilong rum i stap long pes bilong haus i mak olsem 9-mita. Dispela haus i stap 9-mita antap long graun na Solomon i bilasim insait bilong haus wantaim gol tasol. ⁵ Em i wokim het bilong haus wantaim diwai saipres na putim gol tru i go antap long en na katim diwai na wokim gutpela piksa wantaim ol pam diwai na sen. ⁶ Em i bilasim haus wantaim ol ston em i dia tumas wantaim ol gol i kam long ples Pavaim. ⁷ Em i karamapim olgeta hap bilong haus wantaim gol na katim diwai na wokim piksa bilong ol ensel long sait bilong haus. ⁸ Em i wokim rum i holi tru na longpela bilong dispela rum i mak olsem 9-mita na bikpela bilong em i 9-mita. Em i putim 4,600-kilo bilong gol i go antap long dispela rum. ⁹ Na hevi bilong ol nil i olsem 575-gram bilong gol. Em i putim gol antap long ol kona bilong haus i stap antap long en. ¹⁰ Em i mekim tupela piksa bilong ensel long putim long rum i holi tru na ol man bilong katim diwai i putim gol i go antap long en. ¹¹ Tupela win bilong dispela ensel i olsem 9-mita longpela na win bilong wanpela ensel i olsem 2-mita longpela i go long sait bilong rum na narapela win i wankain na i go bum wantaim narapela ensel. ¹² Dispela win bilong narapela ensel i 2-mita longpela i go long sait bilong rum na narapela win i 2-mita longpela i go bum wantaim win bilong ensel i stap pas. ¹³ Dispela win bilong ol ensel i 9-mita longpela na ol i sanap long lek bilong ol wantaim pes bilong ol i lukluk i go long bikpela haus. ¹⁴ Em i mekim laplap wantaim blupela, pepolpela na gutpela waitpela laplap na gras bilong sipsip i klostu wankain olsem retpela kala na pasim long ol ensel. ¹⁵ Solomon i wokim tupela longpela pos i mak olsem 15-mita i go antap long graun na long pes bilong haus long het bilong pos i mak olsem 2-mita antap. ¹⁶ Em i wokim sen na putim long ol dispela longpela pos na em i mekim 100-piksa bilong pomagranet na hangamapim antap long ol dispela sen. ¹⁷ Em i putim dispela tupela longpela pos long pes bilong tempel wantaim wanpela, long han sut na narapela i stap long han kais bilong tempel na em i kolim long han sut Jakin na han kais Boas.