¹ Joas i bin gat 7-pela yia taim em i kamap king, em i stap king long 40-pela yia long Jerusalem. Nem bilong mama bilong em i Jibia bilong Besiba. ² Joas i bin mekim ol stretpela pasin long ai bilong God Yawe long taim Jehoiada i stap pris. ³ Jehoiada i maritim tupela meri na i kamap papa bilong ol pikinini man na meri. ⁴ Bihain long dispela, Joas i tingting long stretim haus bilong God Yawe. ⁵ Em i bungim ol pris na ol lain Livai na tokim ol, " Long olgeta yia yupela i mas i go long ol biktaun bilong Juda na bungim moni bilong ol lain Israel bilong stretim haus bilong God bilong yupela. Yupela i mas hariap long mekim olsem." Tasol ol Livai i no mekim wanpela samting. ⁶ Olsem na king i singautim het pris Jehoiada na i tokim em, " Bilong wanem na ol Livai i no kisim moni long ol Juda na Jerusalem olsem Moses wokman bilong God Yawe na ol Israel i bin pasim tok long mekim ol wok bilong haus sel olsem lo i tok?" ⁷ Ol pikinini man bilong Atalia, dispela meri nogut i bin brukim haus bilong God na kisim ol samting i holi insait long haus bilong God Yawe na i givim long ol god giaman Bal. ⁸ Olsem na king i tokim ol long mekim wanpela bokis moni na putim autsait long dua bilong haus bilong God Yawe. ⁹ Bihain ol i toksave long olgeta manmeri bilong Juda na Jerusalem long kisim ol moni i kam long God Yawe olsem Moses wokman bilong God i bin kisim long ol Israel taim ol i bin stap long ples nating. ¹⁰ Olgeta lida na ol manmeri i amamas na kisim moni i kam na putim long bokis moni inap bokis moni i pulap tru. ¹¹ Na long olgeta dei taim ol Livai i lukim olsem bokis moni i pulap ol i save karim i go long ol ofisa bilong king na ol kuskus bilong king na ol wokman bilong het pris i save rausim moni na kisim bokis i go bek long ples bilong en. Ol i save mekim olsem long olgeta dei na bungim planti moni moa. ¹² King na Jehoiada i kisim dispela moni na givim long ol wokman bilong haus bilong God Yawe. Ol i baim ol man bilong katim ston na wokim haus na ol man bilong wok wantaim ain na bras long stretim haus bilong God Yawe. ¹³ Olsem na ol dispela wokman i wok strong moa long stretim haus bilong God. Ol i wokim haus bilong God i kamap strongpela na gutpela gen. ¹⁴ Taim ol i pinisim olgeta wok, ol i givim hap moni i go bek long king na Jehoaida. Ol i baim ol samting long bilasim haus bilong God Yawe na ol i baim ol gol plet, kap na spun bilong mekim ol ofa. Ol i save mekim ofa long haus bilong God Yawe olgeta taim long taim Jehoaida i stap yet. ¹⁵ Jehoaida i lapun tru na i gat 130 yia na em i dai. ¹⁶ Ol i planim em long biktaun bilong Devit wantaim ol narapela king long wanem, em i bin mekim gutpela pasin long Israel na long ai bilong God na long haus bilong God. ¹⁷ Bihain long Jehoaida i dai pinis, ol lida bilong Juda i kam na givim biknem i go long king na king i harim ol. ¹⁸ Ol i givim baksait long haus bilong God Yawe, God bilong ol tumbuna bilong ol na ol i lotu long giaman god Asera na ol arapela giaman god olsem na belhat bilong God i kam antap long ol Juda na Jerusalem long pasin nogut bilong ol. ¹⁹ Em i salim ol profet i go long kisim ol dispela manmeri i kam bek long em, God Yawe na ol profet i tokim ol manmeri tasol ol i no laik harim tok bilong ol. ²⁰ Spirit bilong God i kam antap long Sekeraia pikinini man bilong pris, Sekeraia i sanap antap na i tokim ol manmeri olsem, God i tok olsem, "Bilong wanem na yupela i sakim tok bilong God Yawe? Yupela i lusim God Yawe olsem na em tu i lusim yupela na bai yupela i no inap i stap gut." ²¹ Tasol ol i pasim tok na king i tokim ol na ol i tromoi ston long em na kilim em i dai insait long bikpela ples bung long haus bilong God Yawe. ²² King Joas i no bin tingim ol gutpela pasin bilong Jehoaida, papa bilong Sekeraia i bin wokim long en na em i kilim Sekeraia. Taim Sekeraia i laik dai, em i tok, "God Yawe i ken lukim dispela pasin yu mekim na bekim pei long yu." ²³ Long pinis bilong yia, ol ami bilong Aram i kam na pait wantaim Joas. Ol i kam long Juda na Jerusalem na ol i kilim olgeta lida bilong ol manmeri na salim olgeta samting ol i bin kisim i go long king bilong Damaskas. ²⁴ Olsem tasol ol ami bilong ol Aram i kam wantaim liklik lain soldia, tasol God Yawe i laik mekim save long King Joas olsem na em i helpim ol long winim ol bikpela lain soldia bilong Joas long wanem Juda i bin givim baksait long God Yawe, God bilong ol tumbuna bilong ol. Long dispela rot ol Aram i givim hevi antap long Joas. ²⁵ Na long taim ol lain bilong Aram i go pinis, Joas i bin kisim bikpela bagarap na ol wokman bilong em i pasim tok long kilim em, long wanem em i bin kilim ol pikinini man bilong pris Jehoaida. Ol i kilim em long bet bilong em na kisim go planim em long biktaun bilong Devit, tasol ol i no planim em wantaim ol king. ²⁶ Dispela ol man i bin pasim tok na kilim em, em Jabad pikinini man bilong Simit, wanpela meri bilong Amon na Jehosabad pikinini man bilong Simrit em wanpela meri bilong Moab. ²⁷ Ol stori bilong ol pikinini man bilong em na ol bikpela tok profet ol i bin autim long em na ol stori bilong em i bin stretim haus bilong God. Ol i raitim dispela olgeta stori long buk bilong ol king. Bihain Amasia pikinini man bilong em i kisim ples bilong em na i kamap king.