¹ Jehosafat i dai na ol i planim em wantaim ol lain tumbuna bilong em long biktaun bilong Devit. Orait Jehoram, pikinini man bilong em i kisim ples bilong em na i kamap king. ² Jehoram i gat ol brata bilong em, em ol pikinini man bilong Jehosafat. Nem bilong ol, Asaria, Jehiel, Sekaraia, Asariau, Maikol na Sefatia. Ol dispela em ol pikinini man bilong Jehosafat, king bilong Israel. ³ Papa bilong ol i bin givim planti presen olsem silva, gol na ol arapela gutpla samting. Em i givim tu ol strongpela biktaun bilong Juda, tasol em i givim kingdom i go long Jehoram. ⁴ Na taim Jehoram i lukautim olgeta kingdom bilong papa bilong em, orait em i strongim em yet olsem king na em i kilim i dai olgeta brata bilong em long bainat wantaim sampela ol hetman bilong Israel. ⁵ Jehoram i bin 32 yia taim em i kamap king na em i bosim Jerusalem long 8-pela yia. ⁶ Em i bihainim ol pasin bilong ol king bilong Israel olsem ol famili bilong Ahab i bin wokim, long wanem em i maritim pikinini meri bilong Ahab na em i mekim pasin nogut long ai bilong God Yawe. ⁷ Tasol God Yawe i no laik long bagarapim ol tumbuna bilong Devit, long wanem em i mekim promis wantaim Devit, olsem na em i promis long givim laip long em wantaim ol lain tumbuna bilong em. ⁸ Taim Jehoram i stap king, ol lain Idom i pait bek long rausim ol yet long han bilong ol Juda na ol i makim king bilong ol yet. ⁹ Orait Jehoram i go kamap long narapela sait wantaim ol nambawan ofisa bilong ami na ol karis bilong pait. Em i kirapim pait wantaim ol lain Idom long nait tasol ol i banisim em wantaim ol karis na ol ofisa bilong em. ¹⁰ Olsem na ol Idom i no wanbel long ol Juda i lukautim ol i kam inap nau. Ol lain Libna tu i les long kain pasin bilong ol tu, long wanem Jehoram i lusim pinis God Yawe, dispela God bilong tumbuna bilong em. ¹¹ Antap long dispela, Jehoram i bin wokim ol ples antap long ol maunten bilong Juda na mekim ol manmeri bilong Jerusalem long stap olsem ol pamuk meri na em i larim ol lain Juda i go bagarap. ¹² Wanpela pas bilong Jehoram i kam long profet Ilaija. Pas i tok,"Dispela em wanem God Yawe, God bilong Devit, tumbuna bilong yu i tok, yu no bin bihainim tingting na pasin bilong Jehosafat papa bilong yu na tu no ken bihainim Asa, king bilong Juda, ¹³ tasol yu bin bihainim tingting na pasin bilong ol king bilong Israel na mekim Juda na ol manmeri bilong Jerusalem long kamap olsem ol pamuk meri, olsem ol lain bilong Ehap i bin wokim na tu yu bin kilim ol brata bilong yu long famili bilong papa bilong yu, ol man husat i gutpela moa long yu yet, ¹⁴ lukim, God Yawe bai bagarapim yu, ol pikinini bilong yu, meri bilong yu wantaim olgeta manmeri na ol kago samting bilong yu. ¹⁵ Yu yet bai kisim planti sik nogut long wanem yu gat sik pinis insait long rop bilong bel, dispela sik nogut i stap insait long yu olgeta dei bai mekim na ol rop bilong bel bilong yu bai pundaun na kam aut." ¹⁶ God yet i kirapim bel nogut insait long ol Filistia wantaim ol lain Arap, ol lain husait i stap klostu long Kus long pait wantaim Jehoram. ¹⁷ Ol i bagarapim ol Juda na i go insait na kisim olgeta gutpela kago ol i lukim long haus bilong king. Ol i kisim tu ol pikinini man na ol meri bilong em i go. Ol i no lusim wanpela pikinini man tu, tasol Jeoas laspela liklik pikinini man tasol ol i lusim em. ¹⁸ Bihain long ol dispela samting, God Yawe i givim sik long em insait long rop bilong bel bilong em wantaim sik i no gat marasin bilong em. ¹⁹ Bihain long tupela yia na taim bilong em i kamap nau na dispela sik nogut i mekim rop bilong bel bilong em i kam aut na pundaun na em i dai long dispela sik nogut. Ol manmeri bilong em i tingim em na ol i no mekim paia wankain olsem ol i save wokim long ol tumbuna bilong ol. ²⁰ Em i bin kamap king taim em i stap 32-pela yia na em i lukautim Jerusalem inap long 8-pela yia. Taim em i dai i no gat wanpela i sori long em. Ol i planim em long biktaun bilong Devit, tasol i no insait long ples matmat bilong ol king.